Pinakpakan na Kapangganahan kan Samothrace.

An estatwa kan diyosang Nike

Pinakpakan na diyosang si Nike

An Pinakpakan na Kapangganahan kan Samothrace, (c. 220-185 BC) na inapod man Nike kan Samothrace, sarong iskultorang marmol sa panahon na Helenistiko, representasyon kan diyos-diyosan na Nike kan Griyego na saboot nahaman kan ika2ng Siglo BC. Poon pa kan 1884, ining rebultong marmol prominenteng nakadispley sa Museo nin Louvre asin iyo an saro sa inoomaw nanggad na iskultura sa bilog na kinaban. Saro sana ini sa kakadikit na estatwang Helenistiko na sa orihinal, bakong kahuwad na kopya na Romano.

An pinakpakan na diyosa nin kappangganahan sinasabing nakatindog sa dulong nin bapor sa isla nin Samothrace. An monumento daa sarong pag-atang kan banwaan nin Rhodes sa pagromdom kan sarong kapangganahan sa ralaban sa dagat kaamayi kan ika2ng siglo BC. An tindog niya na garo sa teatrong postura, mabagsik sa aktong paghiro asin sulot na nag'aalon-alon sarong iskulturang Helenistiko sa Periodong Klasiko bago mag-abotan istilong baroque kan mga iskultor na Pergamene.

An pigura

An pigura mismo gibo sa marmol na Parian asin an baroto asin tugmaran na tongtongan gibo sa abohon na marmol na Rhodian. An langkaw kan tindog naabot 8 pye (2.44 metro). An enterong pigura natao nin sentido na garo hale sa langit asin maliksing naghugpa sa dulong kan baroto sa akto nin panggana, pagdominar manta an saiyang bulos naglaladawan nin maarteng pagbabado na garo ipigduduros kan makusog na hoyop sa dagat.

Sinasabing an pagsinsil kan estatwa iyo an pagselebrar nin sarong laban sa dagat na hinuhuna iyo an Batalya nin Salamis kan 306 BC o an iba man pwede daang an Batalya nin Actium kan 31 BC. Nadukayan an estatwa kan taon 1863 kan si Pranses na arkeologong si Charles Champoiseau sa isla nin Samothrace sa pira-pidasong kamugtakan ta posible nagkabaraak huli kan linog kan ikaanom na siglo A.D., dinara sa Paris asin binilog asin dinispley sa Museo nin Louvre pero kulang nin payo, mga takyag asin mga kamot.