Speis

Der Artikl is im Dialekt Weanarisch gschriem worn.

Frans Snyders, De Speis

A modeane Speis

A Speis is a klaana Raum, dea wos ois Vuarotskauma fia Speisn und Drangln gnutzt wiad.

Meistns is de Speis a Nemraum vo da Kuchl, se kaun owa a im Kölla plaziat sei. A Speis hot Regale, Kistn und Behöta zum Logan vo Lemsmittl und Drangln.

Vua da Moakteifiahrung vom Eiskostn und vo da Gfriatruchn hod praktisch a jeds Haus a Speis ghobt, wei des fia de Vuarotshoitung lemswichtig woa. Heit san Speiskauman wieda a wengal meah gfrogt. Zum aan, zweng da Nostalgie und zum aundan zweng da Vuarotshoitung fia Krisnzeitn.

Planung und Technik

A Speis wiad in da Regl auf da Noadseitn vom Haus eigricht, weu so de Wäamestrohlung duach de Sun vahindat wiad. A Vuarotskauma soi meglichst dunkl sein und konstante Temperatuan aufweisen. Hoche Regale suagn fia de entsprechendn Stöflächn. Aus praktischn Grindn is de Speisekauma a Nemraum vo da Kuchl oda si wean im Kölla eigricht. A modeane Speis hod zmindast no an Ventilator eibaut, maungmoi a Klimatechnik.

Wos glogad wiad

Tradizionö

• Blechkonseavn
• Eimochglasln
• Derrobst
• Eadäpfen, Hüsnfricht, Äpfen
• Soiz, Zugga, Möh, Kafää
• Drickade Schwammal, Kraita usw.
• Gsöchts Fleisch: Schinkn, Speck und graichate Wuascht
• Schmoiz, Essig und Öi
• In a Sur einglegts Fleisch (pökln)
• Eigsaiats Gmias, vo oim Sauakraut oda Guakaln
• Drangln: Wein, Most, Bier, Saftln

Modean

• Ois wos in de Gfriatruchn passt
• Konservn olla Oat
• Drangln olla Oat

Literatua

• Hildegard Rust: Praktische Vorratshaltung zu Hause. Gefrieren, Haltbarmachen, Lagern. Ratgeber Haushalt, Knürr Verlag, 4. Auflage, 2008. ISBN 3928432176

Im Netz

• diemodernespeisekammer.de
• oegeschichte.at Voratshaltung