The Boondocks
| The Boondocks | |
|---|---|
| ing. The Boondocks | |
 | |
| Yaş reytinqi | R |
| İstehsalçı ölkə | |
| İl | 6 noyabr 2005 – 23 iyun 2014 |
| Dil | ingilis dili[1] |
| Mövsüm sayı | 4 |
| Seriya sayı | 55 |
| Davametmə müddəti | 19–23 dəq. |
| Telekanal | Adult Swim |
| IMDb | ID0373732 |
| boondockstv.com | |
The Boondocks — "Adult Swim"də yayımlanmış anime üslublu ABŞ cizgi serialı.[2] Yetkin auditoriya üçün nəzərdə tutulub. Aron Makqruder[ing.] tərəfindən yaradılmışdır. Serial onun eyniadlı[ing.] komiks stripinə əsaslanır. "The Boondocks"un ilk nümayişi 6 noyabr 2005-ci ildə baş tutub. Serialdakı hadisələrin mərkəzində qaradərili uşaqlar olan Hui və Rayli qardaşları və onların babası dayanır. Hər iki uşaq serialın əvvəlində babalarının yanına – ağdərililərin hegemon olduğu xəyali şəhərətrafı bölgə olan Vudkrestə köçür.[3]
Baş qəhrəmanlar əqidəcə, xasiyyətcə bir-birinə ziddir. Belə ki, böyük qardaş olan Hui stereotipik qaradərililərdən[ing.] fərqli olaraq intellektli, savadlı bir gəncdir. Lakin onun balaca qardaşı Reyli isə tam bir baş bəlasıdır. O, demək olar ki, qaradərili stereotipinə uyğun gəlir — qanqster və küçə mədəniyyətinin təəsübkeşidir.
Serial 2014-cü ilə qədər 4 mövsüm 55 epizod davam edib. 2006-cı ildə "Return of the King" epizoduna görə "Pibodi" mükafatı qazanıb.[4]
Personajlar
[redaktə | vikimətni redaktə et]- Hui R. Friman (ing. Huey R. Freeman) — 10 yaşı var. Recina Kinq[ing.] tərəfindən səsləndirilib. Balaca qardaşı kimi Çikaqonun Cənub bölgəsində doğulub (South Side). Valideynlərinin öldüyü güman edilir. Babasının yanında İllinoys ştatının uydurma şəhərətrafı bölgəsi olan Vudkrest (Woodcrest)-də yaşayır. Zəkasına görə hər kəsdən seçilir. Qaşqabaqlı uşaqdır və nadir hallarda gülür. Mahir döyüş bacarıqlarına sahibdir. Az yaşı olmasına baxmayaraq siyasətlə, xüsusən də afroamerikalıların hazırkı vəziyyəti ilə dərindən maraqlanır. İstər cəmiyyəti, istərsə də qaradərililərə edilən ayrı-seçkiliyə və bərabərsizliyə görə cari ABŞ rejmini daim tənqid edir. Qara Pantera partiyasını təsis edən siyasi fəal Hui P. Nyutonun[ing.] adını daşıyır.
- Rayli Friman (ing. Riley Freeman) — 8 yaşı var. O da Recina Kinq tərəfindən səsləndirilib. Qanqster həyat tərzi yaşayır. Görünüşcə qardaşına çox oxşayır. Arxaya hörülmüş kornros[ing.] stilində saçı var. O, stereotip qaradərililər kimi rep dinləyir, danışıq qabiliyyəti ürəkaçan deyil (zəif qrammatika) və kriminal aləmlə bağlantılı repçiləri özünə nümunə götürür. Airsoft silahları var, cinayətə də meyillidir. Bunlara baxmayaraq o, qardaşı qədər zəkalıdır. Amma ki, üsyankardır — heç vaxt babasının sözlərinə baxmır. İnsanlara sataşmağı xoşlayır. Qadınları əşya kimi görür. Onları "bitches" və "hoe" adlandırır. Əlbəyaxa döyüş bacarıqlarına sahibdir. Amma digər ailə üzvlərinə baxanda o, ən bacarıqsızıdır. Qardaşına "n**ga, you gay" deyərək təhqir edir.
- Robert Friman (ing. Robert Jebediah Freeman) — yaşı 80–120 arasıdır, ancaq onu müdrik ağsaqqal saymaq olmaz, çünki ağılsızın biridir. O, ciddi nizam-intizama inanır, lazım gəldikdə uşaqları kəmərlə yaxşıca döyür. Amma onun müsbət tərəfləri də var. Məsələn, İkinci Dünya müharibəsi iştirakçısıdır. Belə ki, müharibə zamanı ilk qaradərili hərbi hava qüvvələri olan "Tuskegee Airmen[ing.]"in üzvü kimi orduda xidmət edib. O, bununla yanaşı ABŞ vətəndaş hüquqları hərəkatı zamanı Alabamada yaşayırdı. O, xatırlayır ki, yağış paltarını[ing.] unutduğu üçün yürüşə gec gəlmişdi. Con Viterspun[ing.] tərəfindən səsləndirilib. Hər iki qardaşın ata tərəfdən babasıdır və onlara qəyyumluq da etməkdədir. Robert qorxağın biri olub, istəsə dostlarını və ailəsini də atıb gedə bilməkdədir. O, özünü "Vətəndaş hüquqları əfsanəsi" adlandırsa da, buna heç kim inanmamaqdadır. Ləqəbi "Mr. Bitches"dir. Yalan danışmağı özünə adət etmişin biridir. Nəvəsi yaşlarında olacaq qadınlarla yaxınlıq qurur. Döyüş zamanı kəmərindən istifadə edir. Soul food[ing.] restoranı açmışdır.
İstinadlar
[redaktə | vikimətni redaktə et]- ↑ fernsehserien.de (alm.).
- ↑ Outlaw, Kofi. "'The Boondocks' Season 4 Is In The Works". Screen Rant. 23 iyul 2011. 7 aprel 2022 tarixində arxivləşdirilib.
- ↑ McGruder, Aaron. "The Boondocks by Aaron McGruder for October 18, 2007". GoComics. 18 oktyabr 2007. 21 yanvar 2022 tarixində arxivləşdirilib.
- ↑ "The Boondocks: The Return of the King". The Peabody Awards (ingilis). 2024-12-07 tarixində arxivləşdirilib. İstifadə tarixi: 2024-12-05.
Xarici keçidlər
[redaktə | vikimətni redaktə et]| Tematik saytlar |
|---|
