Fortol (Potos flavus)
Fortol ![]() Potos flavus | ||
![]() | ||
giltafa pulara | ||
Bliind | Animalia | |
Dansok | Chordata | |
Volveydansok | Vertebrata | |
Pula | Mammalia | |
Volveypula | Theria | |
Tolvolveypula | Eutheria | |
Veem | Carnivora | |
Yasa | Procyonidae | |
oxi | ||
Potos | ||
E. Geoffroy Saint-Hilaire and F. G. Cuvier, 1795 | ||
katca | ||
Potos flavus | ||
Schreber, 1774 | ||
|
![](http://upload.wikimedia.org/wikipedia/commons/thumb/1/10/Kinkajou_area.png/310px-Kinkajou_area.png)
Fortol (Potos flavus) tir tana moukolafa katca ke Potos oxi vey Procyonidae yasa ke CARNIVORA veem ( CANIFORMIA volveyveem ). Gan Schreber bak 1774 taneon zo pimtayar.
Pimtara
[betara | va krent betá]Fortol koe istefa Amerika isu geefa vageu Mexika kale Mato Grosso gola koe Brasila blir. Inaf rodapnaris ault anamkaf vox otson gemaf tir riwe abrotcaf lion dam alto ise tir besanaf gu vaf myot. Kota bewa sotir trelafa vox gijarotifa. Pivot abrotcaf vas bareaca va gelteem kagluyar. Kota kotca tir livafa is cuynafa. Dunol tir azernavlas.
Nazbalkera va lan cadim me dikir. Viele fortolye vanlanir, pune penkesa fortolya solwion ve kizoyur. Va toloy mouk anton sodir ise arti ocagugal vas 115 viel, va tanoy ok toloy oc nazbar. Aldo ke oc tir vas mon 190 g- isen abrotce vas 30 cm-. Oc tir besanaf gu pibafa moavukafa saya tcastafa keve dalkava. Oblakaf stiteem arti alubda sye fenkuwer azen iteem wali pereaf viel isu tol-san-taneaf. Ault wali toleaf is san-bareaf aksat en turo-dapnarisawer. Fortoloc va delaf tor wali alub-san-balemeaf viel isu lerd-saneaf. Ulkoyara ba balemoy aksat sokir numen batvielu oc en tir volruptes.
Va dika giva icde malestusa vertuma ke fortol koe tuwava dadit. Lana dizvera va gralomeyen katcolk nubazed da in dalon tir bezatoraf is ilttoraf. Me nutir wivgusik. Inaf yoy rotir abrotcaf vas 12 cm-. ise tir enrosotcen. Batkane va cot ke ilt rodemaltiolter ise va beza talasa ok tigisa koe begama rogralomer ike va molt gu blatak dace rodivnarir. Va blot kan abdueinieem gir ise nubar.
Fortol ( Potos flavus ) tir aalfamaf is dalon mielon dunol. Koe gralomexo, nekev lor afizcekon zavzar yalestaf solve mielon tir tegipis. Koe tuwava fortol va mielon irubaxo milo dam telo ke afizon gojukol kereler. Afizon koe suxoma ke aal gelber oke vanmiae vaf toeem va int bravar, besason va iteem kan abdueinieem. Viele ba miel divmoder, pune pilkovon altosotcer. Taneon masotcer aze wirker ise yoysotcer ; azon viele debanyar, pune gesoar ise wal inieem aultsoar.
Fortol tir antaf cottoraf dunol ( do smankol (Arctictis binturong) ) dis va rodapnaris ault. Pokeon sutuson va oc, gadikya va ault romalsaver. Bat biugboldunol koo aala tuzapon vox memaakton lanir ise rumkur. Viele va aal ticlanir oke titlanir, pune va ault aname gama dun vider vieli nugeem va warzafa altogisa uta trasir. Va ault gumilbavatason dere malsaver kotviele keno gama ik gefesta gozar. Ilt bene gama va fortol nusumpapad. Va kozwin ilt rontion vanlanir numen jontikviele konak milkatcik mo mil aal artlanid. Vucon ied ise belcon azdad. Kan abdueinieem va ilt dapnarid aze pezid aze toz estud. Estuson, fortol va jontikeca tirka rovanikatcur. Ton titeon taka dace ronubagir, dem ilt koe abdueinieem is geltgison kan ault is radimeinieem va kona gefesta.
Kira
[betara | va krent betá]- Veem : Carnivora
- Yasa : Procyonidae
- Lum : varafe abrotce vas 81 ik 103 cm-
- Talgeem : 36 talga
- Nazbarugal : betviele bak tanda
- Ocagugal : 115 viel
- Occek : 1 is 2
- Ikralukruca : ba 18 aksat ke fortolye ; ba 27 aksat ke -olya
- Blirugal : tuwavon 19 tanda
Vexala dem apteem
[betara | va krent betá]Sedme Mammal Species of the World (siatos ke 2005), bata katca vas 7 apta ruldar :
- Fortol (Potos flavus flavus) (Schreber, 1774)
- Fortol (Potos flavus chapadensis) (J. A. Allen, 1904)
- Fortol (Potos flavus chiriquensis) (J. A. Allen, 1904)
- Fortol (Potos flavus megalotus) (Martin, 1836)
- Fortol (Potos flavus meridensis) (Thomas, 1902)
- Fortol (Potos flavus modestus) (Thomas, 1902)
- Fortol (Potos flavus nocturnus) (Wied-Neuwied, 1826)
Pulasa vuestexa is xantaza
[betara | va krent betá]
- (en) vuest- : Mammal Species of the World (v- 3, 2005) : Potos flavus (Schreber, 1774)
- (en) vuest- : CITES : Potos flavus
- (en) vuest- : UICN : katca Potos flavus (Schreber, 1774)
- (en, fr) vuest- : ITIS : Potos flavus (Schreber, 1774)
- (en) vuest- : Tree of Life Web Project : Potos flavus
- (en) vuest- : Catalogue of Life : Potos flavus (Schreber, 1774)
- (en) vuest- : Paleobiology Database : Potos flavus (Schreber, 1774)
- (en) vuest- : Animal Diversity Web : Potos flavus
- (en) vuest- : NCBI : Potos flavus
Ara vuestexa
[betara | va krent betá]- Fortol (Potos flavus) dene Wikispecies
Kotavafa vuestesa xantaza
[betara | va krent betá]- Kotava winugaf moukolaf ravlemak (Kotava, Latinava, 2019)
- Fortol dene www.europalingua.eu