República Socialista Soviética d'Armenia
| |||||
---|---|---|---|---|---|
estáu desapaecíu | |||||
| |||||
Lema nacional | ¡Proletarios de tolos países, xuníos! | ||||
Alministración | |||||
Estáu desapaecíu | ![]() | ||||
Capital | Yereván | ||||
Forma de gobiernu | república soviética | ||||
Llingües oficiales |
armeniu rusu | ||||
Xeografía | |||||
Coordenaes | 40°11′00″N 44°31′00″E / 40.1833°N 44.5167°E | ||||
![]() | |||||
Economía | |||||
Moneda | Rublu soviéticu | ||||
Más información | |||||
Estaya horaria | UTC+04:00 | ||||
![]() |
La República Socialista Soviética d'Armenia (n'armeniu: Հայկական Սովետական Սոցիալիստական Հանրապետություն, Haykakan Sovetakan Sotsialistakan Hanrapetutyun; en rusu: Армянская Советская Социалистическая Республика, Armyanskaya Sovetskaya Sotsialisticheskaya Respublika), o RSS d'Armenia foi una de los quince repúbliques miembros de la Xunión Soviética. Foi creada'l 29 de payares de 1920, cuando los soviéticos tomaron el control de la efímera República Democrática d'Armenia, y duró hasta 1991. Tamién ye denomada la Segunda República d'Armenia, yá que la so predecesora foi conocida como la ‘’Primer República d'Armenia’’.
Dende’l 1922 hasta’l 1936, formó parte de la Federación de RSS Trescaucasianes xunto cola RSS de Xeorxa y la RSS d'Azerbaixán. El 23 d'agostu de 1990 foi renomada como República d'Armenia, pero permaneció na XRSS hasta la so auto-proclamación d'independencia oficial el 21 de setiembre de 1991.
Historia
[editar | editar la fonte]Armenia ye absorbida pola Xunión Soviética
[editar | editar la fonte]Tres los doliosos asocedíos baxo’l dominiu otomanu como'l xenocidiu armeniu y la subsiguiente guerra turco-armenia, la República Democrática d'Armenia foi lliberada polos bolxeviques en 1920, y declarada una República Socialista Soviética. Tres esto, Turquía y la República Socialista nueva apautaron el tratáu de Kars, nel que Turquía dexó Ayaria a la XRSS empara del Territoriu de Kars. El territoriu vencíu a Turquía incluyía l'antiguu pueblu d'Ani y el monte Ararat, la tierra espiritual d'Armenia. Anguaño, Armenia nun reconoz el tratáu de Kars.
Dende'l 12 de marzu de 1922 hasta'l 5 d'avientu de 1936, formó parte de República Federal Socialista Soviética Trescaucásica xunto cola RSS de Xeorxa y cola RSS d'Azerbaixán. Baxo’l dominiu soviéticu la población armenia esfrutó d'un periodu de relativa estabilidá. Recibíen medicines, comida, y otres provisiones de Moscú y el réxime comunista foi un bálsamu en contraposición al turbiu final de los años del Imperiu otomanu. La situación foi, sicasí, difícil pa la Ilesia, entartallada baxo’l dominiu soviéticu.
El réxime de Stalin
[editar | editar la fonte]Tres la muerte de Lenin en 1924, Josif Stalin tomó les riendes del poder. La sociedá armenia y la so economía fueron camudaes dramáticamente por Stalin y el so gabinete políticu moscovita.
![](http://upload.wikimedia.org/wikipedia/commons/thumb/a/a6/Soviet_Propaganda_in_the_Armenian_SSR_1937.jpg/230px-Soviet_Propaganda_in_the_Armenian_SSR_1937.jpg)
En 1936, la República Federal Socialista Soviética de Trescaucasia foi eslleida y Armenia, Azerbaixán, y Xeorxa convirtiéronse en repúbliques independientes separtaes. Nel escudu d'armes de la RSS d'Armenia incluyóse'l monte Ararat, lo que provocó protestes per parte de Turquía yá que l'Ararat yera parte del so territoriu. El Kremlin respondió que, anque'l símbolu turcu yera la lluna creciente, eso nun quería dicir qu'ellos diben esguilala.[1] Tres esto, Armenia sufrió otra perda territorial cuando Stalin tresfirió les árees de Naxçıvan y Nagorno Karabakh a Azerbaixán, dambes rexones fueren prometíes a Armenia polos bolxeviques en 1920.
Nun periodu de venticinco años, Armenia foi industrializada y educada baxo unes condiciones puramente prediseñaes, y el nacionalismu foi fuertemente suprimíu. Stalin tomó midíes bien severes pa persiguir la Ilesia apostólica armenia amás de dellos intentos de tornar ruses les costumes armenies. Nos años venti la Ilesia foi desaposiada de les sos posesiones, na década siguiente los soviéticos siguieron con ataques de desprestixu escontra la Ilesia apostólica armenia que remataron col asesinatu del patriarca Khoren I en 1938, como parte de la Gran Purga. La Ilesia, sicasí, sobrevivió escondida y na diáspora.
Como otres minoríes étniques que vivíen na Xunión Soviética de Stalin, millones d'inocentes armenios fueron executaos y deportaos. En 1936, xunto con Lavrenti Beria, Stalin trabayó pa deportar a los armenios a Siberia nun intentu de dexar la población d'Armenia per debaxo de los 700.000 homes y entós xustificar la so anexón por Xeorxa.[2] Baxo’l so mandu, el Partíu Comunista d'Armenia usó'l terror policial pa fortalecer les sos idees polítiques na población y desaniciar toa espresión de nacionalismu armeniu. Munchos escritores, artistes, científicos y líderes políticos fueron executaos o unviaos al exiliu.
Armenia na Segunda Guerra Mundial
[editar | editar la fonte]Armenia llibró de la devastación y destrucción que solmenó gran parte de la Xunión Soviética mientres la Segunda Guerra Mundial. Los nazis enxamás llegaron a El Cáucasu Sur. Sicasí, Armenia xugó un papel importante ayudando a los aliaos cola so industria y la so agricultura. Amás, los armenios de la 89ª División Soviética Tamanyan llibraron brutales combates escontra la Wehrmacht na batalla del Cáucasu, la batalla de Crimea, la ofensiva del Bálticu, la ofensiva del Vístula-Óder, y la batalla de Berlín. Mientres un ataque na Ciudá Heroica de Novorosíisk que fuera tomada por Alemaña, munchos armenios entraron na llista d'Héroes de la Xunión Soviética.[3]
El xeneral armeniu Hovhannes Bagramyan (Iván Bagramián) más llueu mariscal de la Xunión Soviética, foi'l primer comandante non eslavu asignáu pa ser el comandante del Primer Frente Bálticu en 1943, que la so misión yera reconquistar el ríu Dniéster. En 1955 concedióse-y el títulu d'Héroe de la Xunión Soviética.[4]
Nikita Khrushchov
[editar | editar la fonte]![](http://upload.wikimedia.org/wikipedia/commons/thumb/8/8c/Nikita_Khrusjtsjov.jpg/180px-Nikita_Khrusjtsjov.jpg)
Tres la muerte de Stalin en 1953, Nikita Khrushchov convirtióse nel nuevu líder del país. El Kremlin tornóse permisivu a les demostraciones nacionalistes. El procesu de dexar atrás les polítiques de Stalin, afaláu por Khrushchov sollivió los mieos de munchos soviéticos. Amás él emplegó más recursos pa la producción de bienes de consumu. Casi de secute, Armenia empezó una rápida renacencia cultural y económica, onde se permitieron llibertaes relixoses que se punxeron de manifiestu cuando'l católicu Vazgen I asumió los deberes del so oficiu en 1955.
El 24 d'abril de 1965, miles d'armenios manifestáronse nes cais d'Yereván nel cincuenta aniversariu del xenocidiu armeniu. Les tropes soviétiques entraron na ciudá ya intentaron restablecer l'orde. Para previendo qu'esto asocediera nuevamente, el Kremlin aceptó tener un monumentu n'honor a los que perdieren la vida mientres aquelles otomíes. En 1967, el monumentu, fechu polos arquiteutos Kalashian y Mkrtchyan foi completáu en Yereván. El monumentu de 44 metros simbolizaba la renacencia nacional de los armenios.[5] Asitiáronse dolce llosetes nun círculu, representando les 12 provincies perdíes, naquel tiempu en manes de Turquía. Nel centru del círculu, con una fondura de 1,5 metros, había una llapada que nun s'apagaba nunca. A lo llargo del parque del memorial hai un muriu de 100 metros colos nomes de los pueblos onde se sabe que tuvieron lugar matances.
Perestroika
[editar | editar la fonte]![](http://upload.wikimedia.org/wikipedia/commons/thumb/4/42/Gorbatschow_DR-Forum_129_b2.jpg/180px-Gorbatschow_DR-Forum_129_b2.jpg)
La política de Mikhaíl Gorbachov, la llamada Perestroika, alimentó les esperances d'una vida meyor baxo’l dominiu soviéticu nos armenios. Los hamshenis que fueren deportaos por Stalin a Kazakstán entamaron a pidir que se-yos mandara de vuelta p'Armenia, treslláu que foi refugáu pol Kremlin debíu a la medrana de que los musulmanes hamshenis empecipiaren conflictos colos sos primos armenios cristianos. Los armenios de la rexón denomada Nagorno Karabakh, que fuera prometida a Armenia polos bolxeviques y tresferíes a la República Socialista Soviética d'Azerbaixán por Stalin, empezaron un pacíficu y democráticu movimientu pa unificar la zona con Armenia. La mayoría de la población armenia de la zona taba cansada de la forzada adautación a la cultura d'Azerbaixán.[6] El 20 de febreru de 1988, los diputaos armenios del Conceyu Nacional de Nagorno Karabakh votaron unificar esa rexón con Armenia. Seya comoquier, los disturbios étnicos empezaron llueu con una xebra ente la población d'Armenia y Azerbaixán, previniendo polo tanto una unificación sólida de la zona.
Independencia
[editar | editar la fonte]El 23 d'agostu de 1990, un añu enantes de la desapaición de la XRSS, Armenia declaró la so independencia. Esto nun foi reconocíu oficialmente hasta'l 21 de setiembre de 1991. Foi nesti día cuando la nueva República d'Armenia foi declarada y establecida. Inda asina, les tensiones ente Armenia y Azerbaixán siguieron creciendo, llegando a la Guerra de Nagorno Karabakh. A pesar d'un altu'l fueu temporal dende 1994, Armenia sigue ensin resolver el so conflictu con Azerbaixán sobro l'enclave de Nagorno Karabakh, a pesar de tener sol so control más d'un 30 % del territoriu azerbaixanu. Amás d'esto, Armenia esperimentó un desenvolvimientu sustancial dende la independencia, y a pesar del bloquéu de Turquía y d'Azerbaixán, caltién rellaciones amistoses colos demás estaos vecinos Rusia, Xeorxa, ya Irán.
Ver tamién
[editar | editar la fonte]- Armenia
- Xunión de Repúbliques Socialistes Soviétiques
- Altu Karabakh
- Josif Stalin
- Nikita Khrushchov
- Trescaucasia
- República Federal Socialista Soviética de Trescaucasia
Referencies
[editar | editar la fonte]- ↑ Louis, Victor y Jennifer. The Complete Guide to the Soviet Union. New York, 1976.
- ↑ Bauer-Manndorff, Elisabeth. Armenia: Past and Present. New York: Armenian Prelacy, 1981 p. 178.
- ↑ (Armenian) Hambartsumyan, Victor et al. Armenian Military Divisions in the Great Patriotic War. Soviet Armenian Encyclopedia. Yerevan, Armenian Soviet Socialist Republic, 1979 p. 175.
- ↑ Jukes, Geoffery. «Ivan Khristoferovich Bagramyan» en Stalin's Generals. Ed. Harold Shukman. Phoneix, Arizona: Phoneix Press, 2001 p. 25. ISBN 1-84212-513-3.
- ↑ April 24th in Armenia. Recuperáu'l 6 de febreru de 2007.
- ↑ Karagiannis, Emmanuel (2002). Energy and Security in the Caucasus. Routledge (UK), p. 37. ISBN 0-7007-1481-2.
Bibliografía
[editar | editar la fonte]- Bauer-Manndorff, Elisabeth. Armenia: Past and Present. New York, 1981
- Bournoutian, George A. A Concise History of the Armenian People. Costa Mesa, California: Mazda, 2006
- (n'armeniu) The Soviet Armenian Encyclopedia. Yerevan, Armenia Soviet Socialist Republic, 1979-1987 ed. Verluise, Pierre y Levon Chorbajian. Armenia in crisis: the 1988 Earthquake. Detroit: Wayne State University Press, 1995
- Walker, Christopher J. Armenia: The Survival of a Nation. Londres: Palgrave Macmillan, 1990
Enllaces esternos
[editar | editar la fonte]