Saltar al conteníu

María Goyri

De Wikipedia
María Goyri
Vida
Nacimientu Bilbao[1], 29 d'agostu de 1873[2]
Nacionalidá España
Residencia Algorta (es) Traducir
Getxo
Madrid
Llingua materna castellanu
vascu
Muerte Madrid[1], 28 de payares de 1954[2] (81 años)
Familia
Padre valor desconocíu
Madre Amalia Goyri
Casada con Ramón Menéndez Pidal
Fíos/es
Familia
Estudios
Estudios Universidá Central
Llingües falaes castellanu
vascu
Oficiu llingüista, historiadora, filósofa, crítica lliteraria, pedagoga
Cambiar los datos en Wikidata

María Amalia Vicenta Goyri (29 d'agostu de 1873, Bilbao – 28 de payares de 1954, Madrid), conocida como María Goyri, foi una escritora, investigadora nel campu de la lliteratura española, filóloga y profesora española.[3] Foi tamién la primer estudiante oficial de Filosofía y Lletres de la Universidá Española y formó parte de la vanguardia de defensores de los derechos de la muyer. Los sos estudios sobre'l romanceru español, al pie del so home Ramón Menéndez Pidal, sentaron les bases de la investigación nesti campu.[4]

Biografía

[editar | editar la fonte]

Yera fía natural de Amalia Goyri, de gran calter y cultura, qu'educó a la so fía ensin tener en cuenta les convenciones de la dómina, Inscribióla nun ximnasiu y a los dolce años nuna Escuela de Comerciu de l'Asociación pa la Enseñanza de la Muyer, onde llogró los títulos de profesora de Comerciu ya Institutriz.[5] De familia vasca instalada dende los cinco años en Madrid, con 16 años empezó a estudiar na Facultá de Filosofía y Lletres (cursu 1891–1892) como oyente, ensin matriculase, pidiendo autorización al Ministeriu de Fomentu p'abrir una matrícula femenina. Concedióse-y pal cursu siguiente, pero cola condición de nun permanecer nos pasiellos, entrar na aula xunto al catedráticu, y nun sentase en clase al pie de los sos compañeros, sinón nuna siella al llau del profesor. Foi la primer estudiante oficial de Filosofía y Lletres. Llicencióse en 1896 y doctoróse en 1909.[5][6]

Conoció a Ramón Menéndez Pidal, de quien foi alumna na Escuela d'Estudios Cimeros, nuna conferencia que dio Marcelino Menéndez Pelayo na Escuela d'Estudios Cimeros del Atenéu, y casóse con él en 1900.[5] El so viaxe de novios foi polos pueblos de les rutes del Cid, recoyendo versiones de romances hispánicos de tradición oral. Nel "Archivu del Romanceru Menéndez Pidal/Goyri» caltiénse'l rellatu de dalgunos de los sos afayos nesi viaxe: cuando pararon n'El Burgo de Osma aloxaronse nuna pensión y, a la mañana, tando María Goyri y l'asistenta faciendo la cama, entamó a canturrear el romance de «El Conde Sol», y l'asistenta díxo-y qu'ella tamién sabía dalgunos. Ente los romances que-y cantó había unu desconocíu hasta entós: el Romance de la muerte del Príncipe don Xuan».[7]

Dedicó tola so vida a la investigación de too lu rellacionáu cola Filoloxía y la Historia, y al pie de Ramón Menéndez Pidal, fixo inventariu de les distintes versiones de tresmisión oral del Romanceru, que güei se curia, a disposición del los estudiosos, na Fundación Ramón Menéndez Pidal.[8]

Na so trayeutoria como profesora de 1916 a 1920 impartió lliteratura na Residencia de Señorites, creada en 1918. Al pie de María de Maeztu, redactaron los programes d'enseñanza del español pa neños d'ocho a diez años y encargóse de la direición y el siguimientu de los programes de Llingua y Lliteratura Española nel Institutu-Escuela de la que tuvo especialmente implicada.[5] El 23 d'ochobre de 1933 foi nomada vocal del Patronatu de dicha Institución al pie de José Gabriel Álvarez Ude, Blas Cabrera, Luis Calandre, Antonio García Tapia, Inocencio Jiménez, María de Maeztu, Luis Zulueta y Escolano y dos profesores delegaos, na Xunta p'Ampliación d'Estudios. Trabayó hasta la Guerra Civil na Institución Llibre d'Enseñanza. Collaboró con una seición propia, titulada «Cróniques femenines» na Revista Popular.[9]

La Guerra Civil sorprendió al matrimoniu María Goyri y Ramón Menéndez Pidal, na so casa de campu de San Rafael (Segovia), al pie de la so fía Jimena, el so xenru, Miguel Catalán Sañudo, y el so nietu, Diego Catalán, en zona controlada polos militares que s'alzaren escontra la República. Los bombardeos de les avionetes de Cuatro Vientos los obligaron a fuxir hasta El Espinar y, más tarde, a Segovia. Nel Archivu Xeneral de la Guerra Civil Española consta que dende Burgos, onde taba la Xunta de Defensa Nacional al mandu de Franco, pidieron el 2 de xunetu de 1937 a les autoridaes de Segovia «un informe ampliu y ecuánime de les actividaes según la ideoloxía política antes del Gloriosu Movimientu Nacional» de los miembros de la familia Menéndez Pidal-Catalán. «Interesa tamién sían vixilaos d'una manera discreta, según les amistaes qu'operen alredor d'esta familia. En casu de que convenga sía-y intervenida la correspondencia».

Nel informe que s'unvió a Burgos diz de Ramón Menéndez Pidal: «Presidente de l'Academia de la Llingua. Persona de gran cultura, esencialmente bonu, débil de calter, totalmente apoderáu pola so muyer. Al serviciu del Gobiernu de València como propagandista en Cuba»; y de María Goyri: «Persona de gran talentu, de gran cultura, d'una enerxía estraordinaria, que malvó al so home y a los sos fíos; bien persuasiva y de les persones más peligroses d'España. Ye ensin dulda una de los raigaños más robustos de la revolución». Dichu tou este, consiguió treslladase col so home al Madrid republicanu y de la mesma, en setiembre de 1936 fueron llevaos a Valencia y dende ellí, marcháronse a Estaos Xuníos y dempués a Francia; a partir y al términu de la Guerra Civil, tornó'l matrimoniu a España y dambos dedicáronse a les sos actividaes profesionales (ella, al frente del Colexu Estudios).

Al acabar la guerra, l'Institutu Escuela y toes los centros docentes auspiciados pola Xunta p'Ampliación d'Estudios d'idees lliberales y educación mista foron prohibíos, y a determinaos maestros, prohibióse-yos exercer mientres unos años el so maxisteriu. María Goyri, estremada de la docencia,dedicóse hasta'l final de la so vida a investigar, arrexuntar y sistematizar les distintes versiones de romances de la tradición oral pal Archivu del Romanceru, y escribió artículos como «Aplicación del modelu romanceru d'analís a la balada vasca: bereterretxen khantoria», ente otros, y dio visu a los sos llibros De Lope de Vega y del Romancero y Romancero tradicional de las lenguas hispánicas.

La so correspondencia colos investigadores ya hispanistes de tol mundiu, nos que se dan cuenta pormenorizada y xenerosamente de los afayos, les sos notes, escritos y artículos inéditos custódiase na Fundación Menéndez Pidal, nel Olivar de Chamartín, u vivió y trabayó dende 1917 hasta la so muerte, y son una fonte imprescindible pa los estudiosos del Romanceru.

Tuvo tres fíos del so matrimoniu: Ramón, que finó na niñez, Jimena y Gonzalo. Morrió en Madrid en 1954.

Obres

[editar | editar la fonte]
  • «Romance de la muerte del Príncipe D. Juan» en The Bulletin Hispanique, volume IV (1902).
  • «Romances que deben buscarse en la tradición oral» en Revista de Archivos, Bibliotecas y Museos (1907).
  • Dellos artículos sobre El Conde Lucanor, en Revue Hispanique (1899).
  • Romania (1900).
  • «La difunta pleiteada en la literatura española: estudio de literatura comparada» en Revista de Archivos (1909).
  • La difunta pleiteada, Madrid: T. Fortanet, 1909. Ensayu.
  • Fábulas y cuentos en verso (seleición y notas), Madrid: Sucesores de Hernando, 1933. Cuentos.
  • Don Juan Manuel y los cuentos medievales, Madrid: Instituto Escuela, 1936. Ensayu.
  • De Lope de Vega y del Romancero, Zaragoza: Librería General, 1953. Ensayo.
  • Romancero tradicional de las lenguas hispánicas, Madrid: Gredos, 1957.
  • “Lo que piensan las mujeres de su educación. Una información”, Escuela Moderna, III (1893), núm. 23, 82-86 [ap. C. Flecha].
  • “Crónicas femeninas”, Revista Popular, I, 16-XII (1898), y 30-XII (1898) [ap. J. Caso].
  • “El próximo Congreso Feminista”, Boletín de la Institución Libre de Enseñanza, XXIII (1899), num. 470 (31 mayu), 131-133.

Premios María Goyri

[editar | editar la fonte]

La Universidá del País Vascu estableció'l Premiu María Goyri a la inclusión de perspeutiva de xéneru nos trabayos de fin de máster" qu'apurre dende'l 2012 en marzu pa conmemorar el Día Internacional de les Muyeres.[10]

Bibliografía

[editar | editar la fonte]
  • Mariano Pérez Galán. La enseñanza en la Segunda República española. Madrid, Edicusa, 1979.
  • Germán Somolinos. El Instituto-Escuela. Boletín de la Corporación de Antiguos Alumnos de la Institución Libre de Enseñanza, del Instituto-Escuela y de la Residencia de Madrid; Grupo de Méxicu. Circular nᵘ 37; 7 de xunu de 1961.
  • José Manuel Sánchez Ron. Miguel Catalán, su obra y su mundo. Madrid. Consejo Superior de Investigaciones Científicas, Fundación Ramón Menéndez Pidal, 1994.
  • Diego Catalán. El archivo del romancero: historia documentada de un siglo de historia. Madrid. Fundación Ramón Menéndez Pidal, 2001.

Referencies

[editar | editar la fonte]
  1. ↑ 1,0 1,1 Afirmao en: Real Academia de la Historia.
  2. ↑ 2,0 2,1 Afirmao en: Diccionario biográfico español. Identificador DBE: 38447/maria-goyri-goyri. Apaez como: María Goyri Goyri. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.
  3. ↑ Archivum, https://books.googlede/books?id=YsoATiOdawwC&lpg=PA205&ots=J3_g99Ty_e&dq=Mar%C3%ADa%20Goyri%20falleci%C3%B3&pg=PA205#v=onepage&q&f=false 
  4. ↑ Páxina de María Goyri en la Fundación Ramón Menéndez Pidal Consultáu en marzu de 2014.
  5. ↑ 5,0 5,1 5,2 5,3 (2009) Ni tontas ni locas. Las intelectuales en el Madrid del primer tercio del siglo XX, Fundación Española para la Ciencia y la Tecnología, páx. 76. ISBN 978-84-691-8464-6.
  6. ↑ Biografía en blog dedicado a María Goyri Consultáu en marzu de 2014.
  7. ↑ Audio-video en el Archivo del Patrimonio inmaterial de La Rioja Música tradicional, cultura oral y folklore riojano Consultáu en marzu de 2014
  8. ↑ Archivo del Romancero Consultáu en marzu de 2014
  9. ↑ «Bibliografía en los archivos de la Fundación Ramón Menéndez Pidal.». Archiváu dende l'orixinal, el 2016-02-16.
  10. ↑ «Entregados los permios Francisca de Aculodi, Maria Goyri y Micaela Portilla» (6 de marzu de 2015). Consultáu'l 18 de setiembre de 2015.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=María_Goyri&oldid=4260067»