عيد الام
عيد الام ، عيد سنوى بيحتفل بيه فى مصر و اوروبا و امريكا و بلاد كتيره فى العالم. فى مصر بيحتفل بيه فى يوم 21 مارس لتكريم الأمهات بدأ الاحتفال بيه سنة 1956. اول دعوه لعيد الام فى مصر قام بيها الصحفى و الكاتب المصرى مصطفى امين سنة 1943 فى كتابه "امريكا الضاحكه" لكن ما حدش وقتها اخد باله من الفكره لكن بعدها بعشر سنين راحت واحده ست لمصطفى امين فى مكتبه فى "اخبار اليوم" و حكت له عن قصة كفاحها فى تربية ولادها بعد ما اتوفى جوزها و ما اتجوزتش و كرست حياتها لتربية عيالها. و بقى ابنها دكتور و بعد ما خطب واحده دفعت له المهر و فرشت له الشقه لكن للأسف لما عزل لبيت الزوجيه مشى من بيت امه من غير حتى ما يقولها ميرسى.
| ||||
|---|---|---|---|---|
| يوم الام - Mother's Day | ||||
  | ||||
| يسمى أيضا | عيد الام | |||
| يحتفل به | العديد من الدول | |||
| نوعه | عالمى | |||
| أهميته | يوم تكريم للام والامومة | |||
| تاريخه | يوم 21 مارس فى العالم العربي وتواريخ أخرى حسب البلد | |||
| متعلق بـ | يوم الاب، يوم الطفل | |||
| اليوم السنوي | 3 مارس ، و8 مارس ، و21 مارس ، و25 مارس ، و7 ابريل ، و10 مايو ، و15 مايو ، و27 مايو ، و30 مايو ، و12 اغسطس ، و1 يونيه ، و15 اغسطس ، و8 ديسمبر ، و22 ديسمبر ، ويناير [1]، و14 اكتوبر [2] | |||
تعديل  |
||||
اتاثر مصطفى امين بالقصه و فكر فى جحود الاولاد فإبتدا ينادى تانى بفكرة الاحتفال بعيد الام لتكريم الأمهات. اياميها كانت افكار العروبه لسه مسيطره فى مصر عن طريق الپروپاجاندا اللى النظام الناصرى كان مدورها وقتها و مالى بيها روس المصريين ، فهاجمت الجرانيل مصطفى امين و اتهمته بإنه بيشغل المصريين عن موضوع غزو تركيا لسوريا، و جمال عبد الناصر نفسه اللى كان وقتها ملهى و لاهى المصريين فى مشاكل العرب بدل ما يشوف مشاكل مصر و ينهض بيها اعتبر فكرة الاحتفال بالام و تكريمها فكره سخيفه، لكن مصطفى امين استمر فى دعوته و راح لكمال الدين حسين اللى كان وقتها وزير التعليم و عرض عليه الفكره. كمال الدين حسين كان بيحب امه قوى فقبل الفكره و رحب بيها و اتكلم مع جمال عبد الناصر فى الموضوع و قدر يقنعه لإن عبد الناصر كان بيحبه.
نجحت الفكره و بدأ الاحتفال بعيد الام فى مصر فى 21 مارس 1956. و استمر الوضع على الحال ده لغاية سنة 1965 لما عبد الناصر اعتقل مصطفى امين و سجنه، و خاف النظام الناصرى ان الاحتفال بعيد الام كل سنه ممكن يخلى المصريين يفتكرو صاحب الفكره مصطفى امين، فراح مغير اسم عيد الام لعيد الاسره، لكن برقيات الامهات من كل النواحى انهالت على الديكتاتور فإضطر إنه يرجع اسم عيد الام.
فى عيد الام بيهنى الاطفال و الكبار امهاتهم و بيهدوهم هدايا و ساعات بيتعمل احتفال اسرى صغير مليان بجو الحب و بتنتشر فى هوا مصر اغانى بتمجد الام و من اشهر الأغانى دى اغنية " ست الحبايب " من ألحان الموسيقار المصرى محمد عبد الوهاب.
اتعرض عيد الام و اسم عيد الام لهجوم من المتطرفين الظلاميين عدوين الفرحه الانسانيه و الحب و بهجة الاعياد و بحقوق الستات وبالتالى الأمهات ، فقالو انه بدعه و ان كلمة "عيد" المفروض تبقى "يوم" بس عشان يفضو محتوى الفكره الجميله من معانيها و يقضو عليها، لكن العيد و اسمه استمرو و فضل المصريين يحتفلو بيه و يكرمو امهاتهم كل سنه فى 21 مارس مع بداية فصل الربيع رغم كل المحاولات الاستبداديه و الظلاميه اللى اتعرض لها العيد.
لينكات خارجيه
- عيد الام Archived 2010-04-28 at the Wayback Machine
- هجوم على عيد الام Archived 2010-03-26 at the Wayback Machine
- أبشرو عيد الام و شم النسيم و عيد تحرير سينا حرام Archived 2009-04-28 at the Wayback Machine
- و يقولون لك : عيد الام حرام Archived 2011-02-21 at the Wayback Machine
مصادر
- المصرى اليوم ، عدد 2106 ، 20 مارس 2010.
