سانرايز (ستوديو)

	سانرايز (ستوديو)
	معلومات أساسية
نوع د لمؤسسة	استوديو رسوم متحركة
لبلاد	چاپون
لموضع	Kami-Igusa
تاريخ د تّأسيس	شتنبر 1972
سّيت رّسمي	bnfw.co.jp
	معلومات إضافية
أعضاء/ڭزوات	Sunrise
فروع	بانداي نامكو بكتشرز; آكتيس; 8-بت
أملاك	Hajime Yatate; Sunrise

مقالة ؤلا فقرة ناقصينها عيون لكلام.
لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها عيون لكلام باش تكون موتوقة. شوف هنا كيفاش تزيد لعيون.
ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!

بانضاي نامكو فيلمووركس ( ب لجاپونية: 株式会社バンダイナムコフィルムワークス، كابوشكي ݣايشا بانضاي نامكو فيرومووآكوسو)، كان و مازال معروف ب سمية سانرايز، هي شاريكة جاپونية مملوكة من لهولدينݣ د بانضاي نامكو، الشغل ديالها كايركز على لينتاج، التخطيط و ليدارة ديال لآنيمي.

التاريخ و لبدية د الستوديو

ف السبعينات كان واحد الستوديو معروف ب سمية موشي پروداكشن، و ف لوقيتة د بدية السبعينات الستوديو كانو كايواجهوه صوعوبات مادية، ب سباب هادشي، بزاف من لموضافين د السطاف بداو كايمشيو ف حالهوم من لخدمة، و موراها ب شوية الستوديو جاتو فاييتت ف 1973. واحد لموشكيل كان عند بزاف د لموضافين د هاد الستوديو هو أوصامو طيزوكا كان مترأس الستوديو و ݣاع لمشاريع كانو متمحورين على لأفكار ديالو، ف لوقيتة لي هادشي حاجة مزيانة ب سباب التقل د أوصامو طيزوكا ف صناعة لآنيمي و لمانݣا، لموضافين حسو بلي ليبداع ديالهوم كان محدود، حيت كانو كاملين كايتبعو لڤيزيو د راجل واحد .

ف 1972 ݣروپ من لموضافين السابقين من السطاف لپرو تجمعو معا بعضياتهوم و كونو الستوديو ديالهوم، سماوه نيپون سانرايز. كان من لأهداف لأساسية ديالهوم قبل مايتصاوب الستوديو، هو صنيع بيئة فين يقدرو يحطو بزاف د لأفكار لأصلية و ينميوها و من بعد يبتوها ف التلفازة. كانو باغيين يلقاو بلاصة فين مايكونوش مجبورين على إينتاج آضاپطاسيوات د لمانݣا بحال لي دارو ف موشي پرو، فين بزاف من لآضاپطاسيوات كانو مبازيين على لمانݣات د طيزوكا. ف 1994 ستوديو سانرايز تملك من لهولدينݣ د بانضاي نامكو.

الستوديوات د سانرايز و لآنيميات ديالهوم

باش تقدر تصايب سيريات من بزاف د لمونتيجين و لموخريجين لي مترأسين بزاف د لأقسام، سانرايز نشآت بزاف د الستوديوات لفرعية ف هاد السنين لي فاتو. كل ستوديو ف هاد الستوديوات لفرعية مترأسو مونتيج، ولا تستيفة د لمونتيجين، طاقم إيبداعي، طيمة ولا ستيل.

ستوديو 1: تصاوب ف لوقيتة لي تنشأت سانرايز ف 1972. من أبرز لأعمال ديالهوم، لكوستيم لمتنقل ݣانضام، سپايس راناواي إيدييون، لقطعان لمدرعة ڤوطومز، پاطلايبور و إينوياشا. زيد الستوديو هو لي كان مسؤول على أغلب لكمالات د لفرونشيز د ݣانضام.
ستوديو 2: تصاوب ف لوقيتة د 1974-75، و شي موضافين مشاو من هاد الستوديو ل ستوديو بونز ف 1998. من أبرز لأعمال د هاد الستوديو، أورا باتلر ضانباين، وشي أجزاء من ݣانضام بحال زي زي، ڤيكتري، زيطا، لكونطراطاك د تشار و إف 91. زيد الستوديو نتج الرؤيا د إيسكافلون و كاوبوي بيبوپ، و عاون ف إينتاج آضاپطاسيوات د أفلام د هاد جوج آنيميات ب شركة معا ستوديو بونز.
ستوديو 3: تصاوب ف 1975 لأعمال لوالا ديالو منها النيزك الزرق إس پي تي لايزنر و سيتي هانتر. هاد ستوديو صاوب شي أجزاء من ݣانضام بحال، 0083، لفرقة د إم إس التامنة و سيريات تلفازية من هاد لفرونشيز بحال 00، آيدج، بيلد فايترز تراي، ليتيم لي دمو فيه لحديد، و لموشعويدة من زوحال.
ستوديو 4: تصاوب ف 1979، من أبرز لأعمال د هاد الستوديو، لآنيمي أولترامان، الستوديو تجمد ف 1987. الستوديو 4 د دابا بدا ك عوين لستوديو 2، و كان معروف ب سمية ستوديو لوݣي (井荻スタジオ). أول عمل كبير لاستوديو كان هو ديرتي پير ف 1985، أعمال اخرى د هاد ستوديو منها پلانيطيس، إس كرايد و كوض ݣييس.

ستوديو 5: حتى هو تصاوب ف 1979. من أبرز لأعمال ديالو، قمة النجوم، لافلام د إينوياشا، لحياة ليومية د وليدات التانوية، آيكاتسو!، ݣووظ لاك ݣورل! ݣينطاما، لكوستيم لمتنقل إس دي ݣانضام و لكوستيم لمتنقل ݣانضام 0080: حرب ف الجيب.

ستوديو 6: تصاوب ف عام 1983، أبرز أعمالو ذا بيݣ أوو، الجرانة كيرو و بابر & قنية. هما لي دارو لآنيماسيو ل باطمان: السيرية لمتحركة بلا ماتدكر سميت الستوديو، شي خداما مشاو من هاد الستوديو باش ينشؤو بريدج ف 2007
ستوديو 7: تصاوب ف 1985، أول عمل كان فيه، هو لكارتوون لميريكاني سينتورينس: پاور إكسترييم، و معروف عاوتاني ب سايكرد سيڤن، و السيريات د يووشا. شي خداما مشاو من هاد الستوديو باش ينشؤو مانݣلوب ف 2002.
ستوديو 8: بدا ف لوقيتة د 1995، معروف ب ماي هيمي، بادي كومپليكس، لبنت لي نقزات عبر لفاضاء، أوفوق وسط لخلا، عالم آكسيل، و بغي عيش!.
ستوديو 9: ستوديو توام معا ستوديو 7، تصاوب ف 1996، معروف ب ݣاساراكي، ريڤيوس الامتناهي، لكوستيم لمتنقل ݣانضام سييد و لماصير د سييد، أرجينطو صوما و باتل سپيريتس.
ستوديو 10: ستوديو توام معا ستوديو 5، تنشأ ف لوقيتة د 1996، معروف ب آوتلوو سطار، مليك الديناصورات و في براين: پازل أوف ݣود.
ستوديو 11: ستوديو توام معا ستوديو 8 تصاوب ف 2009 و خدم على كوروكامي و إس دي ݣانضام صانݣوكدين برايڤ باتل ويرييرز.

ستوديو دي آي دي: ستوديو مختص ب لانيماسيو د لأورديناطور خدم ب هاد الطيكنيك معا بزاف د الستوديوات لخرين د سانرايز من لأعمال ديالو، بابر & قنية، زيݣاپاين، كروس آنج، ڤالڤرايڤ لمحرر، ݣانضام إم إس إݣلو و ݣانضام لأصل. خدمو عاوتاني لآنيماسيو د لأورديناطور ل ستوديوات اخرين بحال، سپايس باتلشيپ ياماطو 2199 د ستوديو كسيبيك.

عيون لكلام