The Hobbit: An Unexpected Journey
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
The Hobbit: An Unexpected Journey | |
---|---|
Ficha tecnica | |
Dirección | Peter Jackson |
Producción | Carolynne Cunningham Zane Weiner Fran Walsh Peter Jackson |
Guión | Fran Walsh Philippa Boyens Peter Jackson Guillermo del Toro |
Musica | Howard Shore |
Fotografía | Andrew Lesnie |
Montache | Jabez Olssen |
Actors | Ian McKellen Martin Freeman Richard Armitage James Nesbitt Ken Stott Cate Blanchett Ian Holm Christopher Lee Hugo Weaving Elijah Wood Andy Serkis |
Datos y cifras | |
País(es) | Nueva Zelanda Estaus Unius |
Anyo | 2012 |
Chenero(s) | Cine de fantasía Cine d'aventuras |
Durada | 169 min. |
Idioma(s) | Anglés |
Companyías | |
Productora(s) | New Line Cinema Metro-Goldwyn-Mayer WingNut Films |
Distribución | Warner Bros. Pictures |
Presupuesto | 200–315 millions de dólars |
Informacions en bases de datos especializadas: | |
![]() ![]() ![]() ![]() ![]() ![]() ![]() ![]() ![]() ![]() ![]() ![]() |
The Hobbit: An Unexpected Journey (títol orichinal en anglés, enguerada en Aragón con o títol en castellano El hobbit: un viaje inesperado) ye una cinta estausunidense de cine d'aventuras fantasticas de l'anyo 2012, dirichida por Peter Jackson y producida por Carolynne Cunningham, Zane Weiner, Fran Walsh y Peter Jackson con guión de Fran Walsh, Philippa Boyens, Peter Jackson y Guillermo del Toro, protagonizada por Ian McKellen, Martin Freeman, Richard Armitage, James Nesbitt, Ken Stott, Cate Blanchett, Ian Holm, Christopher Lee, Hugo Weaving, Elijah Wood y Andy Serkis.
Le siguen The Hobbit: The Desolation of Smaug (2013) y The Hobbit: The Battle of the Five Armies (2014), y chuntas actúan como una precuela d'a trilochía cinematografica d'o sinyor d'os aniellos de Peter Jackson.
Reparto
[editar | modificar o codigo]- Martin Freeman como o choven Bilbo Baggins.[1]
- Ian Holm como o viello Bilbo Baggins .[2]
- Ian McKellen como Gandalf lo Griso.[3]
- Richard Armitage como Thorin Oakenshield II.
- Ken Stott como Balin.
- Graham McTavish como Dwalin.
- Aidan Turner como Kíli.
- Dean O'Gorman como Fíli.
- Mark Hadlow como Dori y Olog-hai.
- Jed Brophy como Nori.
- Adam Brown como Ori.
- John Callen como Óin.
- Peter Hambleton como Glóin y William lo troll.
- William Kircher como Bifur y Tom lo troll.
- James Nesbitt como Bofur.
- Stephen Hunter como Bombur.
- Cate Blanchett como Galadriel.
- Hugo Weaving como Elrond.[4]
- Christopher Lee como Saruman lo Blanco.[5]
- Elijah Wood como Frodo Baggins.[6]
- Sylvester McCoy como Radagast lo Pardo.
- Andy Serkis como Gollum.[7]
- Manu Bennett como Azog.
- Barry Humphries como lo Rei Goblin.
- Conan Stevens como Bolg, fillo d'Azog.
- Bret McKenzie como Lindir.
- Jeffrey Thomas como Thrór.
- Stephen Ure como Fimbul.
- Michael Mizrahi como Thráin II.
- Benedict Cumberbatch como la voz d'o dragón Smaug y como lo nigromant.[8]
Argumento
[editar | modificar o codigo]Un viello hobbit Bilbo Baggins ye punto de complir 111 anyadas d'edat, y decide escribir pa lo suyo sobrino Frodo a narración completa sobre l'inasperau viache en o cual s'embarcó fa sixanta anyos. Prencipia narrando l'historia d'o fabuloso reino nano d'Erebor, baixo a Montanya Solitaria, en a cual os nanos extrayeban metals preciosos baixo o reinau de Thrór, o rei baixo a montanya. Manimenos, tals riquezas dispertoron l'angluzia de Smaug, o mas gran d'os dragons d'o Norte, y atacó Erebor y Dale, forachitando a los nanos d'o suyo reino y apoderando-se de l'inchent tresoro. Dende alavez, os nanos d'Erebor se convirtioron en un pueblo errant y dondioron per muitas tierras, pero nunca ixuplidoron l'ataque de Smaug y o viello reino que les perteneixeba. Dimpués de contar l'historia d'Erebor, Bilbo pasa a recontar as suyas aventuras, encomenzadas anyos dezaga, cuan, en un afable maitín mientres fuma debant d'o suyo forau-hobbit, se troba con o mago Gandalf lo Griso. Gandalf busca a belún aventurero, pero Bilbo se niega rotundament, ya que aborreix as aventuras tanto como toz os hobbits d'a Comarca.
En a tardi d'o día siguient, Bilbo cuasi no s'alcordaba d'a cita con Gandalf cuan siente clamadas en a puerta. D'o tot perplexo, veye cómo cuantos nanos se presentan en a suya casa saludando como qui no quiere a coseta. Finalment, se presenta Gandalf con un nano que pareix ser d'alto rango, cosa mas y cosa menos que Thorin "Escudo de Caixico", principe nano nieto de Thrór, o zaguer Rei Baixo la Montanya. Thorin y os doce nanos que l'acompanyan han veniu a la casa de Bilbo en busca d'un espullador de tresors que les recomendó Gandalf, pus tienen l'obchectivo de viachar a la Montanya Solitaria pa reconquerir o viello tresoro que usurpó Smaug. Bilbo tasament ye capable de mantener-se en piet en sentir que quieren trayer-lo a una aventura, y fuye a la suya cambra pa adormir no guaire tiempo dimpués de que os nanos le expliquen o suyo plan. Bilbo se dispierta lo maitín siguient con a sensación de que a visita d'os nanos estió nomás un suenio, en descubrir que anueit le deixoron una nota decindo que si quereba acceptar o treballo d'espullador, que se reuniera con éls en Delagua. Sin saber él mesmo lo que fa, un extranyo sentimiento aventurero l'enzuriza a salir d'o suyo forau y correr precipitadament a Delagua a reunir-se con a Companyía de Thorin. Allí, con bel pesar, descubre que a mayoría d'os nanos no pensaban que s'atrivise a acompanyar-los y heban feito una apuesta en a cual ganan Balin y Gandalf, que confía en l'hobbit y sabe que ye capable de fer mas d'o que piensa.
Lo primer problema surte trascruzando o Selva d'os Trols, an os trece nanos son atrapaus per os trols Bert, Tom y William. Bilbo, a pesar de tremolar de piez a tozuelo, aconsigue entretener-los dica l'amaneixer, inte en o cual Gandalf os exposa a la luz d'o sol y os trols se converten en pietra. No guaire luent troban o cado d'os tres trols, an Gandalf prene a "Glamdring", una espada que heban furtau os trols; y entrega una chicota daga a Bilbo (a la que mete o nombre de Dardo), que brila cuan bi ha orcos amán. Per a suya parti, Thorin prene a Orcrist. Amán d'o vado d'o Bruinen, o grupo se troba de botepronto con Radagast lo Pardo, un mago de l'orden d'os Istari, a la cual perteneix Gandalf y la resta de magos. Radagast le conta a Gandalf temerosament que en a Gran Selva Verda, an él vive, o mal ye tornando a la selva a resultas de que un misterioso nigromant s'ha instalau en Dol Guldur, una antiga fortaleza que perteneixeba a Mordor, agora en ruinas, construyida antis d'a segunda redota d'o Sinyor Fosco. En ixe mesmo inte, un grupo d'orcos amontaus en huargos ataca a lo grupo, que aconsigue fuyir a la val secreta de Rivendell gracias a que Radagast os distraye y un grupo d'elfos amaneix de sopetons.
En Rivendell, Elrond, o sinyor d'os elfos, aculle a la companyía de Thorin, encara que os nanos no se troban muit a gusto a resultas de que en o pasau, o rei Thranduil (d'os elfos d'a Selva Negra) no os aduyó cuan cayió a montanya Erebor debant d'o dragón Smaug. Galadriel y Saruman lo Blanco (lider d'os magos istari) tamién se troban en Rivendel, a causa que se troban enteraus d'o mal que ha surtiu en a Selva Negra. Asinas peus, en Rivendel tien puesto o concilio blanco entre Elrond, Galadriel, Gandalf y Saruman. Gandalf sospeita que o Nigromant no ye unatro que Sauron, ya que no estió destruyiu d'o tot a causa d'a perda de l'aniello unico per parti d'Isildur. Manimenos, l'opinión de Saruman prevaleix, y opina que l'aniello unico s'ha perdiu pa cutio baixando d'o río Anduin a la mar, adhibindo que o Nigromant sía de seguras o rei bruixón con una nueva ofensiva. Entremistanto, en Amon Sûl, os orcos que heban atacau a Thorin y companyía en o vado d'o río Bruinen avisan l'a suya sinyor Azog que o nano Thorin ye encara vivo. Cuantos sieglos dinantis, Thorin i heba feriu seriosament a Azog, en a batalla d'Azanulbizar debant d'as menas de Moria, y Azog churó vengar-se d'él dende alavez. En Rivendell, Thorin, Bilbo y os doce nanos parten de nuevo mientres Gandalf contina en o concilio. Pa continar o suyo viache han de cruciar as periglosas Montanyas Nubles, en as cuals un día de tronada sobre ellas presencian un impresionant combate entre chigants de pietra. Pa refuchiar-se d'a titanica batalla, se refuchian en una espelunga. Bilbo, dimpués de veyer os periglos d'as montanyas, creye que ha visto masiau y se disposa a tornar ent'o suyo país per a suya cuenta mientres os nanos aduermen. Bofur manimenos lo descubre, y cómo creye en él, Bilbo decide quedar-se. Manimenos, Thorin, a lo qui l'hobbit no le fa goyo, opina que a Bilbo no le intresa a expedición y que nomás será un estorbo.
En ixe inte, una crepa s'ubre en l'espelunga y multitut de goblins les salen a la trobada y capturan a lo grupo, pus l'espelunga yera una d'as muitas dentradas d'un sistema de túnels de goblin. Bilbo y Thorin y companyía son conducius debant d'o Rei Goblin, que os acusa de querer furtar y ordena matar-los. En ixe inte, Gandalf amaneix y remata con o Rei Goblin y cualques mas. Thorin, Gandalf y os nanos fuyen precipitadament, pero Bilbo se caye y se desepara d'o grupo, cayendo en una espelunga en que o suyo solero troba un aniello misterioso. Bilbo l'alza sin mas y plega a un laco subterranio, an Gollum, una viella creatura fambrosa que fabla con un tal `` tresoro ``, le proposa chugar a las devinetas. Si Bilbo gana, Gollum le amostrará a salida d'os túnels, pero si o ganador difuera Gollum, se mincharía a lo hobbit. Os dos van lanzando dovinallas estranyament parellanas y finalment Bilbo, nervioso chuguetia con l'Aniello que alza en a suya pocha, preguntando-se a él mesmo «Qué tiengo en a mía pocha?». Gollum l'interpreta como una devineta, y en no encertar-lo, en cuenta de complir a suya promesa se disposa a ir a la suya isla d'o laco, an alza o suyo `` tresoro ``, un aniello machico que fa invisible a qui se lo mete en o dido, pretendendo matar a Bilbo per sorpresa. En no trobar-lo, Gollum, muit alterau, descubre que Bilbo tien o suyo aniello, que habió de cayer-se-le mientres cazaba a un goblin. Gollum se disposa a rematar con Bilbo, pero iste aconsigue veyer-lo de luent y, casualment, en ficar una man en a suya pocha, l'aniello se le esliza a lo dido y Bilbo descubre que l'obchecto lo fa invisible. Bilbo aprofita ista propiedat pa seguir a Gollum y buscar cualsequier salida. En bel punto, se siente tentau a degollar a Gollum con a espada Dardo, pero un sentimiento compasivo le fa apiadar-se d'él.
Bilbo s'achunta de nuevo con o grupo de Thorin en sentir as suyas voces, pero no le diz cosa a dengún sobre la troballa de l'aniello. Dimpués d'una persecución per a subterrania Ciudat d'os Goblins, a companyía de Thorin, Gandalf y Bilbo sale a l'exterior nomás pa cayer agora en terreno d'una ramada d'immensos lupos huargos, que se mete a acazar-los immediatament. Os quince miembros se puyan a un abet situau a lo costau d'una clamor pa salvar-se d'os huargos cuan descubren que o rabanyo yera capitaniau per l'orco Azog, que iba en busca de Thorin. Cosa mas veyer-se, Azog y Thorin salen a lo trobada pa enfrontinar-se, pero Thorin recibe un truco de l'orco que lo tira a lo solero. Un inasperau truco de valentía amaneix en Bilbo, que baixa de l'arbol tamién pa protecher a Thorin tot y con l'espanto que siente. Os atros nanos lo siguen pa enfrontinar-se a los atros orcos d'Azog en un desasperau combate. Per suerte, un grupo d'alicas, amigas de Radagast, baixa d'as altarias d'as montanyas y replegando a los miembros d'a companyía de Thorin, os traye a un puesto seguro que mira enta l'este, sobre o río Grande y a Selva Negra, alufrando-se, bien luent, a Montanya Solitaria. Lo grupo ye en as Tierras Salvaches, y Thorin, que yera inconscient per a caita, se reanima y pide perdón a Bilbo per a suya desconfianza, pleno de gratitut enta l'hobbit per haber-lo salvau. Mientres os viachers contemplan o suyo destín, una torda devanta o vuelo y plega a la Montanya Solitaria, an captura un caragol y lo truca contra una pietra pa trusquir-lo. L'eco d'os trucos resuena en l'interior d'a montanya, an o dragón Smaug dispierta dando final a la cinta.
Producción
[editar | modificar o codigo]Una adaptación cinematografica d'a novela de J.R.R. Tolkien O Hobbit (1937) va estar en desembolique mientres cuantos anyos dimpués de l'exito critico y financiero d'a trilochía cinematografica Lo sinyor d'os aniellos (2001-2003), coescrita, coproducida y enfilada per Peter Jackson. Jackson inicialment iba a producir una adaptación de dos cintas de Lo Hobbit, que iba a estar enfilada per Guillermo del Toro. Manimenos Del Toro deixó lo prochecto en mayo de 2010, dimpués d'arredol de dos anyos de treballar con Jackson y o suyo equipo de producción,a resultas de retardos causaus en parti per problemas financiers en Metro-Goldwyn-Mayer. Jackson estió asinas anunciau como director en octubre.
As cintas de Hobbit se producioron una dimpués d'unatra, como as cintas de Lo sinyor d'os aniellos. A fotografía prencipal d'as cintas de Lo Hobbit prencipió lo 21 de marzo de 2011 en Nueva Zelanda y remató lo 6 de chulio de 2012, dimpués de 266 días de rodache. Se asperaba que o treballo en a cinta se completase o 26 de noviembre, nomás dos días antis de l' enguero d'a cinta en Wellington. Jackson comentaría mas tardi que a repentina salida de Del Toro creyó problemas, ya que sintió que tenió un tiempo de preparación inadecuau, lo que lo levó a filmar as cintas con guions sin rematar y sin guions graficos.
Se veiga tamién
[editar | modificar o codigo]Referencias
[editar | modificar o codigo]- ↑ (en) . United Kingdom. https://www.bbc.co.uk/news/entertainment-arts-11604193.
- ↑ (en) Busis, Hillary (22 April 2011). "'The Hobbit': Ian Holm is officially in as old Bilbo". Entertainment Weekly. http://insidemovies.ew.com/2011/04/22/the-hobbit-ian-holm-is-officially-in-as-old-bilbo/. Retrieved 26 November 2012.
- ↑ (en) "Ian McKellen as Gandalf in The Hobbit". McKellen. http://www.mckellen.com/cinema/hobbit-movie/. Retrieved 11 January 2011.
- ↑ (en) . The Dominion Post. http://www.stuff.co.nz/entertainment/film/4948801/Kiwi-actor-steps-into-Hobbit-breach.
- ↑ (en) "Christopher Lee Talks Saruman in The Hobbit: An Unexpected Journey". 31 December 2011. http://www.movieweb.com/news/christopher-lee-talks-saruman-in-the-hobbit-an-unexpected-journey. Retrieved 26 November 2012.
- ↑ (en) "New Hobbit: An Unexpected Journey Pics: Elijah Wood Returns as Frodo; Martin Freeman's Bilbo Gets His Sword". 18 October 2012. http://au.eonline.com/news/355189/new-hobbit-an-unexpected-journey-pics-elijah-wood-returns-as-frodo-martin-freeman-s-bilbo-gets-his-sword. Retrieved 26 November 2012.
- ↑ (en) . Deadline Hollywood. https://www.deadline.com/2011/01/andy-serkis-signed-to-reprise-gollum-in-the-hobbit/.
- ↑ (en) Fleming, Mike (16 June 2011). "Benedict Cumberbatch To Voice Smaug in 'The Hobbit'". Deadline.com. https://www.deadline.com/2011/06/benedict-cumberbatch-to-voice-smaug-in-the-hobbit/. Retrieved 8 January 2013.
- Cintas por títol
- Cintas de 2012
- Cintas con banda sonora orichinal de Howard Shore
- Cintas con dirección de fotografía d'Andrew Lesnie
- Cintas con guión de Fran Walsh
- Cintas con guión de Guillermo del Toro
- Cintas con guión de Peter Jackson
- Cintas con guión de Philippa Boyens
- Cintas con montache de Jabez Olssen
- Cintas de Nueva Zelanda
- Cintas d'Estaus Unius
- Cintas de cine d'aventuras
- Cintas de cine de fantasía
- Cintas en anglés
- Cintas dirichidas por Peter Jackson
- Cintas interpretadas por Andy Serkis
- Cintas interpretadas por Cate Blanchett
- Cintas interpretadas por Christopher Lee
- Cintas interpretadas por Elijah Wood
- Cintas interpretadas por Ian McKellen
- Cintas producidas por Carolynne Cunningham
- Cintas producidas por Fran Walsh
- Cintas producidas por Peter Jackson
- Cintas producidas por Zane Weiner