Comercio
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
O comercio[1] ye una actividat economica humana que consiste en l'intercambio de biens (u de servicios) entre personas u entidaz (interpresas) en intercambiando-los por d'atros biens u servicios o por o suyo contravalor en diners.
O comercio historicament ha adoptau formas bien variadas, evolucionando en a suya complexidat tanto respecto d'o tipo de biens que en son obchecto como d'o tipo de contraprestacions que s'han ufriu. La forma mas antiga de comercio ye la clamada economia d'o regalo, en a que los biens u servicios no se mercan ni se venden, so que se entregan sin recibir garra cosa, siquiera la promesa d'una recompensa esdevenidera. Ixe primer nivel de comercio no amenista la existencia de diners ni de formas de calcular o contravalor d'as mercadurías. Lo siguient paso en a evolución d'o comercio se produció en amanixer o trescambio, ye decir, cuan un bien u servicio s'intercambiaba contra unatro bien u servicio. Lo siguient paso estió la invención d'os diners; ye en ixe inte cuan se produz un intercambio d'o bien u servicio por o suyo contravalor calculau en diners como un medio abstracto que facilita l'intercambio. Un paso mas estioron os bancos con as suyas letras de cambio o os cheques, que facilitoron amplament o comercio. Modernament, o zaguer paso en a evolución d'o comercio ha estau lo clamau comercio electronico, que ha desembolicau o comercio a nivel mundial.
L'actividat d'o comercio amanixe cuan bella comunidat humana, por un regular como consecuencia d'a división d'o treballo produz un excedent d'un determinau bien, excedent que puet fer servir ta intercambiar-lo con una atra comunidat vecina por un bien que la comunidat con excedent ameniste, en estar un bien que no en puet producir u que no produz en la cantidad (u calidad) necesaria. alavez aparixe la figura d'o comerciant, que ye una persona lo treballo d'a cual consiste nomás que en mercar (y vender) l'excedent, en obtenindo un beneficio en ixe proceso como contraprestación a lo suyo treballo. Ixe beneficio d'o comerciant pende d'a diferencia entre lo precio de compra y lo precio de venda, parando cuenta que lo precio de mercau d'a mercadería puet variar entre lo suyo lugar de compra y lo suyo lugar de venda.
En primeras, os mercaders nomás feban que mercar un bien en orichen, fer-ne lo suyo transporte y vender-lo directament a lo comprador en o puesto de destín. Tanimientres, bien luego se produció la especialización d'os comerciants, que dende o punto d'anvista d'a venda establioron puestos fixos en mercaus u en botigas expecializaus en a venda d'un bien determinau (carnecerías, pescaterías, zapaterías...). Amanixe asinas la diferencia entre lo comercio minorista, que ye la venda de biens en chicotas cantidaz, y lo comercio mayorista, que ye la venda de biens en grans cantidaz. Antiparte, tamién se produció una evolución d'os puestos de venda, que pasoron d'estar puestos especializaus en la venda d'un bien u tipo de biens (as botigas) a estar grans almagacens a on se i puet mercar una gran variedat tipolochica de productos.
En desembolicar-se la Civilización, o comercio ha estau un d'os campos a on ixos abances han estau bien fundos, en facilitando-lo con o desembolique d'os medios de transporte, o desembolique d'a producción, mas que mas con a Revolución industrial, o desembolique d'os medios de pago y o desembolique d'os puestos de venda.
Historia d'o comercio
[editar | modificar o codigo]Encara que en as sociedaz de tipo nomadas dedicadas a la ganadería y la recolección podeba haber bella clase de comercio puntual, os fundamentos d'o comercio se troban en o periodo Neolitico, cuan se produz la invención de l'agricultura y la sedentarización; encara que inicialment se tractaba nomás que d'una agricultura de subsistencia, a on los biens d'orichen agricola y ganader que se produciban nomás cubriban que las necesidaz basicas d'a población, en aplicar-se los descubrimientos tecnolochicos (como l'aladro y atras ferramientas) en o campo d'a producción agricola augmentó la producción, plegando-se asinas a tener un excedent de producción. Se plegó asinas a establecer un intercambio con comunidaz vecinas que teneban necesidat d'ixos biens excedentarios y que, como contraprestación, podeban ufrir a la comunidat os suyos propios excedents d'atros biens que la comunidad amenistaba. Antiparte, ixe excedent de biens d'alimentación permitió o desembolique d'atros oficios de tipo industrial (alfarería, metalurchia, armas...). Cada comunidat explotaba os suyos propios recursos naturals ta producir os biens que teneban mayor facilidat ta producir-se-ie y albandonaba la producción de bellos biens que yera mas rentable mercar u intercambiar con d'atras comunidaz.
Asinas, de conchunto con o comercio, se produciba un intercambio d'ideas, d'inventos y d'innovacions tecnolochicas, fendo asinas abanzar los procesos productivos. L'alfarería con o torno permitió una mayor producción de recipients que facilitoron la conservación y lo transporte de biens liquidos (como l'aceite u lo vin) pero tamién de cerials (como lo trigo, l'hordio u lo roz); y lo descubrimiento succesivo d'os metals y d'a metalurchia (cobre, bronce, fierro...) permitió fabricar nuevas ferramientas ta millorar la producción agricola (falces, aladros, trillos de metal...) augmentando tamién asinas la producción. Antiparte, lo descubrimiento d'a navegación facilitó lo transporte maritimo y fluvial d'as mercaderías.
O trescambio
[editar | modificar o codigo]O trescambio[1] ye la forma mas primitiva d'o comercio en mas as antigas civilizacions, y consiste en l'intercambio directo d'un bien por un atro bien. Lo suyo principal inconvenient ye que cal que o bien que una comunidat amenista seiga exactament o bien d'o que l'atra comunidat en tien un excedent, y viceversa, fendo asinas difícil un intercambio regular de mercaderías. Ixe sistema obligaba a almagacenar l'excedent en bel almagazén y de bella traza (en recipients d'alfarería, por eixemplo) dica conseguir l'intercambio amenistau, con os risques consiguients ta l'almagacenista por perdidas d'o producto por causas naturals u no.
O dinero
[editar | modificar o codigo]En inventar-se o dinero se facilitó a-saber-lo lo comercio, en traducir-se cada bien enta un valor de traza mas clara que en un intercambio directo, a on de vegadas se feba prou difícil. As primeras formas de dinero estioron prou variadas, no estando en o fundo so que bels biens emplegaus por toz como elemento común (bellas conchas, animals, lingotz de metals,...) pero lo bien mas emplegau universalment estió l'oro (chunto con l'archent, considerau de siempre como de menos valor) dica la invención d'a moneda, en primeras con o suyo valor exacto en metal puro, y dimpués, en establir-se los primers estaus consolidaus que refirmaban la suya propia moneda, con aliacions de menos valor pero refirmaus por l'Estau emisor.
O prencipal problema d'as primeras formas de diners no monetarios yera que o valor de cada bien quedaba restrinchiu a bellas comunidaz, pero fuera d'istas comunidaz que lo acceptaban no en teneba garra, de valor. O solo elemento que tenió un valor universal, a lo menos en las sociedaz d'Europa, Asia y Africa estió l'oro, chunto con os lingoz d'atros metals como lo bronce, lo fierro u l'archent. En civilizacions como la civilización azteca, lo bien prencipal que se feva servir como dinero yeran las simients d'o cacau; y en bellas sociedaz de l'Oceano Pacifico yeran determinadas conchas d'animals marins. Un d'os biens que en primeras se facioron servir en Europa estió la sal: en ixas envueltas o pago ta los soldaus d'as lechions d'a Republica Romana se feba en sal, d'a on procede la voz salario; en os tiempos d'o reino de Roma, anteriors a la Republica, lo bien que s'emplegaba yera lo ganau (pecus en latín, d'a on dimana la voz pecuniario.[2]
As rotas comercials
[editar | modificar o codigo]![](http://upload.wikimedia.org/wikipedia/commons/thumb/9/9b/Rota_do_%C3%A2mbar.jpg/250px-Rota_do_%C3%A2mbar.jpg)
Bien luego amanixioron as primeras rotas comercials. Unas d'as primeras rotas comercials conoixidas ye la rota de l'ambre, que conectaba os territorios productors d'ambre en a mar Baltica (y en bellas partes d'a mar d'o Norte, por un regular a peninsula de Chutlandia u la isla de Gran Bretanya) con a peninsula italica y con l'Antiga Grecia, plegando dica l'Antigo Echipto, encara que ista rota existiba antes d'os diners, arredol de l'anyo 1700 aC, funcionando lo suyo comercio a traviés d'o trescambio.[3] En a rota de l'ambre, l'ambre marchaba dende lo norte enta lo sud, mientres que dende lo sud enta lo norte marchaban ixo que los arqueologos denominan biens de prestichio, ye decir, biens de luxo destinaus a lo consumo d'a clase dirichent (vins, alfarería d'alta calidat d'orichen echipciano, griego u romano, armas de fierro, choyas...). Ixa rota terrestre connectaba con una atra rota maritima que dende Italia y Grecia marchaba enta Echipto, dende on connectaba con rotas que se dirichiban enta l'este d'Africa.
O comercio en istas rotas d'una largaria tan gran no yera directo, con un mercader fendo la rota completa, so que se tractaba d'un comercio indirecto, a on los biens cambeaban de mans cuantas vegadas mientres o suyo camín, y favoreixioron la consolidación d'as primeras formas estatals, necesarias ta la protección d'os comerciants y d'as suyas mercaderías. Simultaniament, o comercio consolidaba lo poder d'as clases gubernants, en permitir-les o consumo de biens de luxo procedents de territorios bien aleixaus y inaccesibles ta los suyos subditos.
Una atra rota comercial destacada estió la rota d'as especias, que conectaba los territorios productors d'especias (India y atros territorios d'Asia sudoriental, chunto con Africa) con os centros consumidors d'Europa. Ista rota se consolidó dende o sieglo II u lo sieglo III en tiempos de l'Imperio Romano, encara que ya existiba con anterioridat, y se mantenió en os sieglos posteriors con a Republica de Chenova y dimpués con a Republica de Venecia como dominadors d'a rota en o suyo trampo europeu, en estar as potencias dominants en a Mediterrania oriental dica que l'Imperio Otomán crebó lo suyo poder maritimo dende o sieglo XV. En interrumpir-se ista rota, o Reino de Portugal trobó con os viaches de Vasco da Gama una nueva rota comercial maritima marchando enta lo sud dende Portugal dica lo cabo de Buena Asperanza y dimpués enta lo norte por a costa oriental africana dica la peninsula arabica y por a mar Arabica enta la India. Por a suya parte, o reino de Castiella, que plegó mas tarde en ixa rota comercial, prebó con os viaches de Cristofo Colombo una rota diferent, que finalment li permitió de descubrir y colonizar America.
A tercera rota comercial con gran importancia historica ye la rota d'a seda, dica lo punto que la UNESCO ha declarau un trampo d'a rota, de bels 5.000 km, como Patrimonio d'a Humanidat. Se conoix con iste nombre en estar la seda producida por los cucos de seda un d'os productos de mas valor que se i transportaban, encara que tamién se transportaba archent, choyas y piedras preciosas, entre d'atros. La rota d'a seda connectaba China con Europa y las suyas orichens se troban, seguntes André Leroi-Gourhan, ya en o Paleolitico, pero no ye que dica lo sieglo I que se puet charrar d'a rota d'a seda como una rota consolidada, coincidindo amás con la substitución de l'austeridat propia d'a Republica Romana por l'afición a lo luxo propio de l'Imperio Romano y con a clamada Pax Augusta que dio seguridad a lo comercio en o territorio romano, y que potenció l'excelent rete de calzadas que trescruzaban l'Imperio.[4] Dense alavez la seda se convertió en Roma en un simbolo de poder economico, dica lo punto que en Roma s'aproboron leis que restrinchiban lo suyo emplego, ta frenar la perdida de metals preciosos que comportaba la suya importación. La rota d'a seda feneixió cuan as potencias europeas, en primeras Portugal y Espanya, y dimpués as Provincias Unidas, lo reino d'Anglaterra (y lo suyo succesor, o reino de Gran Bretanya) y lo reino de Francia troboron as suyas propias rotas maritimas ta connectar-se con Asia.
As rotas comercials estioron la razón d'o creiximiento de bellas ciudaz u estaus. Asinas s'escaició con a ciudat de Palmira (en l'actual Siria), que tenió una gran prosperidat con o comercio de caravanas de camellos a traviés d'o disierto d'Arabia en una d'as brancas d'a rota d'a seda, dica que en o tercer cuarto d'o sieglo III la reina d'a ciudat, Zenobia, prebó de liberar-se d'o chugo de Roma y fundó l'Imperio de Palmira, con una existencia efimera, entre l'Imperio Romano y l'Imperio Sasanida. Tamién la ciudat de Costantinoble prosperó en estar un d'os intermediarios claus en ixa mesma rota d'a seda, mantenindo-se parcialment l'Imperio Bizantín gracias a lo suyo papel d'intermediario entre l'Imperio Sasanida a l'este y los mercaders procedents de Chenova y de Venecia a l'ueste, dica que los turcos establioron l'Imperio Otomán, en interrumpindo ixa rota comercial, rematando por conquerir la propia ciudat de Constantinoble.
O papel d'os bancos
[editar | modificar o codigo]Dica finals de l'Edat Meya, cuan un comerciant vendeba lo suyo producto y recibiba una cantidad de diners, teneba que tranportar-los con él dica cualsiquier atro puesto a on mercar nuevos biens. Ixo feba que de forma constant se veyese obligau a portar con él grans cantidaz de monedas, con os problemas que comportaba lo suyo transporte por o suyo peso y por os risques de perdida u de robo. Ta evitar ixos inconvenients amanixioron os primers bancos. La duya función yera de permitir que un comerciant entregase los diners producto d'una venta en un puesto y, dimpués, se tresladase él sin os suyos diners enta un atro puesto a on podeba retirar los suyos diners ta mercar nuevas mercaderías u ta invertir-los en cualsiquiera atra cosa. Istos primers bancos yeran asociacions de banquers que alcordaban ixe servicio entre éls. Y lo que feba posible tot ixo yera la letra de cambeo, que consistiba en un reconoiximiento de deuda que feba lo banquer dipositario en favor de qui heba dipositau os diners, de traza que lo dipositario podeba retirar-los de cualsiquier atro banquer asociau contra l'entrega d'a letra u reconoiximiento de deuda. A mas, la mesma letra de cambeo podeba ser obchecto de comercio u servir como moneda ta mercar biens u servicios.
Os primers banquers yeran nomás que cambistas, que feban o cambeo de moneda d'un país a moneda d'un atro país y que gosaban montar as suyas oficinas en os mercaus u ferias que se celebraban en a ciudaz, tenendo alcuerdos con atros cambistas d'atras ciudaz. Pero en o Renaiximiento amanixioron bellas familias de banquers, con alcuerdos que abastaban cuasi toda Europa, en destacando los Medici, los Fugger y los Welser; istas familias ya manellaban grans cantidaz de diners, dica lo punto que yeran capables de prestar elevadas sumas de diners a contes y reis; estando los Fugger y los Welser banquers oficials de l'Imperio Espanyol, en recibindo como contraprestación o control de la mayor parte d'o comercio procedent d'America y l'explotación d'os suyos recursos.
Era d'os descubrimientos
[editar | modificar o codigo]En primerías d'o sieglo XV se producioron tres feitos destacaus que bloquiaron a rota d'a seda, que sin de garra dandalo yera en ixas envueltas la mas destacada rota comercial d'o mundo: en primeras, a desaparición de l'Imperio Mogol, que controlaba la rotas comercials dende India y China a traviés d'Asia Central enta l'ueste; d'atra man, o creiximiento territorial de l'Imperio Otomán que bloquiaba lo curso meyo d'a rota d'a seda en Mesopotamia, la peninsula d'Anatolia, la mar Negra y la mar Echea, amás de Palestina; y l'esboldregamiento de l'Imperio Bizantín que yera qui dica l'inte controlaba ixos territorios, fendo posible la continidad d'o comercio en a redolada.
Antiparte, en Europa Occidental ya se veyeban os primers broz d'o que dimpés estió lo capitalismo, empentando asinas lo deseyo de trobar rotas comercials substitutivas ta reprener o lucrativo comercio d'a seda y d'as especias, que amás yeran alavez imprecindibles ta la conservación d'os alimentos. La unión d'istos dos elementos impulsó en Europa la clamada Era d'os descubrimientos.
Portugal
[editar | modificar o codigo]En Europa estió lo reino de Portugal o primer país en explorar nuevas rotas comercials enta la India y Extremo Orient. Henrique de Portugal, mas conoixiu como Henrique lo Navegant, fillo de Chuan I de Portugal y infante d'o reino, en trobar bloquiada la expansión d'o reino en Europa por o reino de Castiella, ponió los suyos uellos en primeras en o norte d'Africa, en convencindo a su pai ta conquerir la ciudat de Ceuta en agosto de 1415, establindo asinas l'inicio d'o comercio con o sud, a traviés d'o disierto d'o Sahara y con l'este, con os países musulmans d'a marguin sud d'a mar Mediterrania. Henrique establió una base naval en a ciudad de Lagos, en o sud de Portugal, dende on marchoron expedicions d'esploración enta lo sud y enta l'ueste: en os anyos 1420 João Gonçalves Zarco y Tristão Vaz Teixeira descubrioron y colonizoron l'archipielago de Madeira, en l'Oceano Atlantico y dende 1426 se produció lo descubrimiento y poblamiento de l'archipielago d'as Azores por Gonçalo Velho Cabral. Dende 1433, en puyar en la cadiera reyal Eduardo I de Portugal, chirmán d'Henrique, lo nuevo rei refirmó las actividaz d'Henrique lo Navegant, en concedindo-le dreitos comercials sobre cualsiquier tierra explorada u descubierta dillá d'o cabo Bojador, que yera en ixas envueltas o punto situau mas luent enta lo sud a on i heban plegau las expedicions europeas, y que Gil Eanes trescruzó ya en 1434.
En 1437 Henrique estió qui organizó lo setio de Táncher, a on os portugueses fracasoron, quedando prisionero un atro chirmán, Ferrando de Portugal, qui morió cautivo seis anyadas dimpués. Dende alavez, Henrique se concentró en as exploracions comercials, aprofitando-se d'un descubrimiento crucial en ixe inte, la carabela, lo primer barco de vela en poder fer navegación contra lo viento. Con as suyas carabelas, os navegants portugueses facioron importants abances: en 1441 Nuno Tristão y Antão Gonçalves plegoron en o cabo Blanco, en 1443 plegoron en a badía d'Arguin, y en 1444 Dinis Dias plegó en l'actual Cabo Verde. Prencipió a fluyir enta lo reino de Portugal una gran cantidad d'oro, con o que se cudioron os primers cruzaus d'oro portugueses. En 1455 o Papa Nicolau V sinyó la bula Romanus Pontifex, que concediba a lo reino de Portugal bellos dreitos exlusivos en a costa occidental africana. En 1473 Lopo Gonçalves trescruzó la linia de l'Ecuador y en 1487 Bartolomeu Dias plegó en o cabo de Buena Asperanza, dentrando asinas ya los portugueses en l'Oceano Indico, ubrindo-se asinas lo rota maritima enta la India. O 17 de mayo de 1498 una expedición portuguesa plegó en Kappad, amán de Calcuta, quedando asinas ubierta ista rota comercial.
Espanya
[editar | modificar o codigo]En os atros reinos peninsulars, nomás o reino de Castiella teneba bel intrés en a expansión enta lo norte d'Africa. Lo Reino d'Aragón no teneba opcions de comercio maritino, y los condaus catalans, que ya heban conformau Catalunya, y los reinos de Valencia y Mallorca, con os reinos extrapeninsulars de Cerdenya, Sicilia y Nápols no teneban intrés so que en o comercio en a mar Mediterrania. Tanimientres, marins malloquins, chenoveses y portugueses descubrioron y vesitoron as islas Canarias dende lo sieglo XIV, escomencipiando la suya colonización dende 1402 por os normandos Jean de Bethencourt y Gadifer de la Salle, intresaus en a explotación d'un tinte obteniu d'a especia Roccella canariensis y que se feba servir ta obtener la color porpra, estando muit apreciada en os mercaus chenoveses y venecianos. Yera asinas una colonización que no yera organizada por a Corona, so que por particulars, dica que lo reino de Castiella remató la conquiesta d'as islas en os zaguers anyos d'o sieglo XV, permetendo asinas o control castellano d'as islas. La importancia d'iste feito radica en que dende las islas Canarias ye mas fácil la navegación enta l'ueste, estando ista la rota que emplegó Cristofo Colombo en o suyo primer viache enta America en 1492.
Con o descubrimiento d'America por Colón s'ubrió una nueva rota comercial de gran importancia, que connectaba lo continent americano y lo continent europeu. Oro, archent, choyas y atros materials preciosos plegoron en Espanya dende alavez, encara que tal como i dentraban en marchaban, en destinar-se los ingresos d'a Corona a pagar a los banquers que financiaban las tropas que partecipaban en as guerras en Europa contra lo reino de Francia, los protestants alemans en o norte d'o Sacro Imperio Romano Chermanico, lo reino de Suecia y lo reino d'Anglaterra. Antiparte, bien luego amaneixioron os ataques de piratas contra los barcos espanyols que feban la clamada carrera d'Indias, contra los puertos de destín d'as mercaderías y mesmo contra las ciudaz de l'America espanyola, en ocupando bellas chicotas islas en a mar Caribe como base naval ta los suyos espullamientos en a redolada. D'una man a traviés d'os intreses pagaus por la Corona y por los capitals invertius en as guerras; y d'atra man a través d'as actividaz de piratería, en zagueras estió la naixient burguesía d'o norte d'Europa y d'as islas britanicas qui acumuló un gran capital que remató desembolicando en a primera Revolución Industrial. Naixioron asinas os grans bancos modernos en Europa, como lo Banco d'Anglaterra, lo Banco d'Amsterdam u lo Banco de Suecia.
Atras nacions europeas
[editar | modificar o codigo]As Provincias Unidas estioron un d'os primers países europeus en demsebolicar o suyo propio imperio colonial. En America d'o Norte ocuporon un chicot territorio en parte d'o que hue ye la ciudat de Nueva York, que bien luego vendioron a los angleses. En a mar Caribe ocuporon, a sobén a traviés de piratas bellas chicotas islas (Aruba, Curaçao y Sint Maarten encara hue fan parte d'o Reino d'os Países Baixos) y una part d'a Guyana (independient dende 1975 con o nombre de Surinam). Pero la suya gran expansión estió enta Africa y Extremo Orient: s'instaloron en parte de l'actual Sudafrica, y en bellas factorías en Africa y en India, en luitando contra portugueses y espanyols. Ta comerciar (u piratear, si s'escaiciba) en America fundoron a Companyía Neerlandesa d'as Indias Occidentals y ta comerciar en Orient fundoron a Companyía Neerlandesa d'as Indias Orientals, estando en Orient a on i tenioron mas exito dende las expedicions de Jan Huygen van Linschoten y Cornelis de Houtman enta la isla de Chava en 1592 que estió l'inicio d'o dominio neerlandés en ixa redolada. En a suya maxima extensión plegoron a dominar u controlar Ceilán, Malaca, Bengala, Taiwan y Cantón, con factorías en o mesmo Chapón, tot ixo en competencia con o reino de Portugal y con l'Imperio Espanyol asentau en as Filipinas. Tanimientres, dende zaguerías d'o sieglo XVIII perdioron qusi toz os suyos territorios en favor de lo Reino de Gran Bretanya.
O reino d'Anglaterra y los suyos estaus succesors (reino de Gran Bretanya, Reino de Gran Bretanya y Irlanda y Reino de Gran Bretanya y Irlanda d'o Norte) tenioron muito mas exito. En primeras, colonizoron a costa oriental d'America d'o Norte, o territorio d'as clamadas Trece colonias, pero s'apropioron tamién de muitas chicotas islas (y no tan chicotas, como Chamaica) en a mar Caribe, amás de bellas zonas de costa, como Belize. Pero lo suyo principal exito estió la Companyía Britanica d'as Indias Orientals, la primera companyía d'ista traza en establir-se, arredol de 1600, y que fació fuera d'India a portugueses, neerlandeses y portugueses dica rematar dende meyaus d'o sieglo XIX en a conquiesta total d'a India por os britanicos. A mas ocuporon Singapur y Malaisia, y establioron una factoría en Hong Kong. D'atra man, en Africa adquirioron un amplo imperio colonial dende la suya primera conquiesta d'Echipto, ocupando cuasi toda una francha vertical dende Echipto dica Sudafrica, amás d'atros mas chicoz territorios, como Gambia u Nicheria. L'Imperio Britanico que formoron encara hue conserva una part d'os suyos dominios colonials.
O reino de Francia prebó as suyas propias rotas comercials y las subsiguients conquiestas colonials, en primeras en Canadá (dica la suya expulsión por os angleses) y dimpués con a fundación en 1664 d'a Companyía Francesa d'as Indias Orientals, con poders ta comerciar en as costas d'Africa, India y Extremo Orient, establindo-se en Reunión, isla de Francia y bellas factorías en India. Tanimientres, a Guerra d'os Siet Anyos remató en una redota francesa y, por o Tractau de París, en a perdida d'iste primer imperio colonial francés, mesmo en Canadá que en India. Napoleón Bonaparte, mientres as Guerras revolucionarias francesas, prebó de crebar o dominio britanico en conquistando Echipto, con a intención de plegar dimpués en India, pero fracasó en o suyo intento encara que redotó a los angleses en batallas terrestres en estar redotada la flota francesa en a batalla d'Abukir (1799), quedando los britanicos en posición de dominar India, como facioron pocas decadas dimpués, en establindo-ie lo clamau Raj britanico y controlondo lo rico comercio indio dica la independencia d'ixe país en 1947.
Atras nacions europeas parteciporon en ista primera cursa comercio-colonial, pero la suya partecipación estió muit minoritaria. Asinas, Dinamarca dende Cristián IV de Dinamarca establió las bases d'o suyo Imperio Colonial Danés, establindo bellas factorías en as costas d'o Golfo de Guinea (que vendioron en 1850 a los britanicos que i creyoron a suya colonia d'a Costa d'Oro) y India, a on en 1620 l'almirant Ove Gjedde i establió un fuerte u factoría en Trankebar, dica que en 2805 en o marco d'as Guerras napoleonicas os britanicos conquirioron o lugar y l'adhibioron a lo suyo propio imperio colonial. Dinamarca tamién colonizó parte d'as islas Vírchens en America, que manntenioron dica 1917, cuan las vendioron a los Estaus Unius, estando hue las clamadas islas Vírchens d'os Estaus Unius. O reino d'Escocia tamién tenió bellas chicotas factorías en America, pero no resultoron en garra resultau efectiu y los escoceses las albandonoron bien luego.
O comercio trasatlantico
[editar | modificar o codigo]Dica lo sieglo XIX o transporte maritimo se feba en barcos de vela, que dependeban d'a enerchía eolica ta lo suyo funcionamiento, asinas que no siempre yera posible asegurar un tiempo determinau ta fer o trachecto maritimo dende lo puerto d'orichen dica lo puerto de destín; ixo sin parar cuenta d'os periglos inherents a la navegación. Tanimientres, en o sieglo XIX se descubrió la maquina de vapor, que transformaba en una caldera caldiada con carbón l'augua en vapor d'augua, que moveba unas ruedas que feban abanzar o barco. En aplicar-se la maquina de vapor en a navegación maritima, ista s'independizó en gran parte d'as inclemencias climatolochicas y tamién permitió asegurar los tiempos d'o transporte de mercaderías de puerto a puerto, fendo posible una gran expansión d'o comercio maritimo, sobre tot en o comercio entre America y Europa, que creixió muitismo en consecuencia, permetendo que mercaderías procedents d'a explotación d'os territorios que los Estaus Unius colonizaban enta l'ueste plegasen con seguridat y regularidat en Europa; tot ixo contribuyó a fer d'Estaus Unius una gran potencia comercial.
Antiparte, lo puerto de Nueva York estió lo puesto a on se i concentró la mayor parte de trafico maritimo con os Estaus Unius, convertindo-se en asinas o prencipal puerto de comercio y transporte maritimo d'o mundo. A nueva York no nomás i plegaban as mercaderías procedents de toda Europa y d'atros puestos d'arredol d'o mundo, so que amás estió lo puerto a on se i concentraba la recepción d'inmigrants procedents de toz los países (mas que mas de países europeus). Os inmigrants plegaban en a isla Ellis, una chicota isla situada en o puerto de Nueva York, y estió lo puesto a on se i feba lo control legal y medico d'os inmigrants que plegaban en lo país.
Atras innovacions en o transporte
[editar | modificar o codigo]O comercio se benefició tamién muito con atras innovacions en os medios de transporte y las comunicacions. Dica lo sieglo XIX o transporte tesrrestre de mercaderías yera caro, lento y perigloso, pero la Revolución industrial provocó un cambeo importantismo en a situación. Asinas, la incención d'a maquina de vapor, en aplicar-se en o transporte terrestre, dió orichen a lo primer ferrocarril, que permeteba lo transporte de forma fácil, barata y rapeda de mercaderías producidas en cualsiquier puesto luent d'un puerto ta la suya distribución por tot o país u, a traviés d'as rotas maritimas u d'as connexions internacionals de ferrocarrils, por tot lo mundo. Amás, cuan amanixió lo motor de combustión y con él l'automobil y lo cambión s'expandió exponencialment lo rete de carreteras, facilitando encara mas o comercio, en permitir-se la producción y lo subsiguient consumo de cualsiquier mercadería en cualsiquier lugar d'o mundo.
En o sieglo XX, en amanixer l'avión, con l'avión comercial, se facilitó lo transporte rapedo de mercaderías, encara que la parte substancial d'o transporte de mercaderías no se fa por transporte aerio, so que se fa por medio d'o transporte por carretera, o transporte por ferrocarril y o transporte maritimo (y en bels puestos lo suyo chirmán mas chicot, lo transporte fluvial).
En os zaguers anyos d'o sieglo XX pero muito mas encara en o sieglo XXI s'ha cheneralizao l'emplego de contenedors ta favoreixer o dito transporte intermodal de mercaderías. Os contenedors son d'a mida adecuada y estandarizada ta lo suyo transporte en un cambión u en un vagón de ferrocarril, y la suya manipulación se fa con grans grúas que lo descargan un medio de transporte y lo cargan en un atro mediode transporte, sin necesidat de trasvasar la carga que contienen, nomás que manipulando lo contenedor. Ixo facilita lo treballo d'os estibadors en o puerto y achiliza la carga y descarga de mercaderías, que en minutos permiten tresladar un contenedor dende un barco enta un cambeón u vagón de ferrocarril u viceversa, cuan d'antis mas caleba fer la descarga d'un cambeón poquet a poquet. Asinas han amaneixiu os grans barcos portacontenedors.
La globalización
[editar | modificar o codigo]La clamada globalización (u también mundialización) ye un fenomeno comercial, economico, politico y social prou recient, produciu dende meyaus d'o sieglo XX y que encara ye en funcionamiento en o sieglo XXI, y que ha portau enta la interdependencia de toz los países en os retes comercials. L'abaratamiento d'o transporte ha portau a la deslocalización industrial, en veyer-se que los costes de producción son variables en cada país en función d'as suyas propias caracteristicas. Las interpresas, hue a sobén convertidas en multinacionals, buscan producir en os puestos a on los suyos costes de producción d'un producto seigan menors, ta tener mayor beneficio u marchen comercial en vender-los dimpués. Ixo comporta una especialización de bels puestos en bels productos concretos. Asinas, por eixemplo, los semiconductors que actualment consume la industria mundial y que equipan cualsiquier vehiclo, electrodomestico u ordinador proceden en a suya mayor parte d'Extremo Orient, especialment de Malaisia, Singapur, Taiwan y China.
Tanimientres, bels sectors d'a sociedat en son contrarios, a la globalización. D'una man, a globalización troba la oposición d'os grupos ecolochistas, que li dan una peinada en estar un sistema de producción que consume una gran cantidad de recursos naturals, mas que mas en o proceso de transporte de mercaderías de cabo ta ran d'o mundo. D'atra man, tamién en son contrarios os sendicatos, en producir-se con a globalización no nomás la deslocalización d'a producción industrial, so que tamién a deslocalización d'os puestos de treballo, en estar o salario d'os treballadors (o salario directo y lo salario indirecto en forma de cotitzacions socials y similars) un d'os elementos que mas influyen en os costes de producción d'un producto.
Tipos de comercio
[editar | modificar o codigo]O comercio puet clasificar-se de muitas formas, estando una d'ellas la que diferencia o comercio en función d'a cantidat de mercadería d'a venda, estando lo comercio mayorista lo comercio a on no se vende directament o producto a lo consumidor, so que se vende a un intermediario, a sobén en grans cantidaz de mercadería, ta que o comprador faiga lo comercio minorista, en o cual vende directament o producto a lo suyo consumidor final.
Una atra clasificación d'o comercio se fa en función d'as partes intervenients en o contracto de compra-venda. Si las dos partes se troban en un estau diferent se clama comercio exterior y si las dos partes se troban en o mesmo estau, se li diz comercio interior.
Tamién puet diferenciar-se seguntes o medio utilizau para lo transporte d'a mercadería: comercio terrestre cuan lo suyo transporte se fa por tierra (transporte por carretera u transporte por ferrocarril); comercio maritimo si se fa por la mar (transporte maritimo); comercio fluvial cuan s'efectúa por un río (transporte fluvial); y comercio aerio si se fa por l'aire (transporte aerio).
Una atra clasificación pende d'a posición d'o comprador d'o bien u mercadería; se diz comercio por cuenta propia cuan lo mercador compra lo bien ta lo suyo propio consumo, y se diz comercio por comisión cuan qui compra lo fa por cuenta d'un tercer, de qui en ye lo clamau comisionista.
Ta rematar, se charra hue de comercio electronico, ta referir-se a transaccions comercials a on se fan servir os retes socials y Internet ta poner en contacto a lo comprador con o vendedor.
Sistemas comercials
[editar | modificar o codigo]Mercantilismo
[editar | modificar o codigo]O mercantilismo, como conchunto d'ideas de tipo politico y economico se desembolicó en Europa mientes o sieglos XVI y XVII y la primera metad XVIII, caracterizando-se por l'intervencionismo de l'estau en a vida economica que se traduciba en a vida politica con l'absolutismo. Respective d'a Economía, se pensaba que en mercar biens foranos se producía un empobreiximiento d'o país, asinas que se practicaba un cerenyo proteccionismo comercial, tendent a reducir a lo minimo las importacions en enfortindo tanimientres as exportacions. Ta lograr ixo, se gravaba la importación de biens foranos con grans arancels y se favoreixeba la producción industrial interna con subvencions a la producción y a la exportación. Tamién se prohibiba la exportación d'oro y archent, que s'amenistaban ta producir monedas ta enamplar la masa monetaria en circulación, en favoreixendo asinas lo crecimiento economico y, en consecuencia, os ingresos fiscals, tot ixo con l'obchectivo d'enfortir lo poder de l'estau.
Con ixes presupuestos, lo corolario evident yera que caleba que l'estau enamplase lo suyo territorio ta controlar materias primas que no producise, ta enamplar la suya base productiva y ta disponer d'un mercau mas gran de consumidors. Ixo se tradució en adoptar una politica colonialista, en una cursa d'as nacions por apropiar-se'n de territorios colonials en Africa y Asia, en estar ya America baixo lo control de l'Imperio Espanyol y de l'Imperio Portugués, con a excepción d'as Trece colonias en os actuals Estaus Unius y de Canadá, que perteneixeban a l'Imperio Britanico.
Se veiga también
[editar | modificar o codigo]Referencias y notas
[editar | modificar o codigo]- ↑ 1,0 1,1 Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
- ↑ (es) Hermann Kinder y Werner Hilgemann: Atlas histórico mundial. De los orígenes a la Revolución Francesa, p.75. Ediciones Istmo, Madrit, 1975, 6ena edición. ISBN 84-7090-005-6
- ↑ (es) Hermann Kinder y Werner Hilgemann: Atlas histórico mundial. De los orígenes a la Revolución Francesa, p.19. Ediciones Istmo, Madrit, 1975, 6ena edición. ISBN 84-7090-005-6
- ↑ (es) Hermann Kinder y Werner Hilgemann: Atlas histórico mundial. De los orígenes a la Revolución Francesa, p,107. Ediciones Istmo, Madrit, 1975, 6ena edición. ISBN 84-7090-005-6