Talos
![](http://upload.wikimedia.org/wikipedia/commons/thumb/c/c8/Didrachm_Phaistos_obverse_CdM.jpg/220px-Didrachm_Phaistos_obverse_CdM.jpg)
De Talos (griechisch Τάλως, Τάλων isch i de griechische Mythologii e Riis us Bronze, wo d Insle Kreta biwacht hett. D Saage öber en sind nöd aihaitlich.
De Talos isch e Riis us Bronze gsii und hett nume ai Oodere mit Götterbluet, em Ichor, ghaa, wo vom Hals bis zo de Chnöchel ggangen isch. Dai bi de Ferse isch die Oodere miteme Nagel verschloose wore. Er isch vom Zeus a de Europa gschenkt wore, demit er si bschütze tüeg. Nochere andere Version hett de Götterschmiid Hephaistos en em Minos gschenkt.
De Talos isch draimool im Tag um Kreta ume gwanderet und hett findlichi Schiff mit Staiwörff vertribe. Wo d Argonaute uf Kreta hend wöle lande, het er si am Lande ghindered, doch d Medeia hetten mit Magie waansinig gmacht und er isch mitem Chnöchel anen Fels stupft, debii isch de Nagel uusgrisse und de Ichor uusgloffe, oder d Medea selber het de Nagel usegrisse. Noch anderne söll de Argonaut Poias en miteme Pfillschuss in Chnöchel tött haa.
De Pausanias het gschribe, indem er de Kinaithion zitiert, ass de Talon e Soo vom Kres sai und de Vatter vom Hephaistos, wo de Vatter vom Rhadmanthys sai. Die Genealogii isch e Wortspill zwösched em Schmiidgott Hephaistos und em Ortsname Phaistos, wo de Talos noch Uuswiis vo Münze woll vereert woren isch. Au isch de Rhadamanthys, normalerwiis de Brüeder vom Minos, nochem Mythos König vo Phaistos gsii. Antiki Münze us Phaistos zaiget nämmli e blutte Maa mit Flögel, wo Stai i de Füüst hett und de Inschrift ΤΑΛΩΝ.
Quelle
[ändere | Quälltäxt bearbeite]- Apollodor: Bibliotheke 1.140f.
- Apollonios vo Rhodos: Argonautika 4.1639-1693
- Pausanias: Raise z Griecheland 8.53.5
Literatur
[ändere | Quälltäxt bearbeite]- Costis Davaras: Guide to Cretan Antiquities. ISBN 0-8155-5044-8. S. 314, Stichwort Talos.
- Edward Tripp: Reclams Lexikon der Antike Philipp Reclam jun. Stuttgart (1991), 5. Uuflaag. Lemma: Talos, S. 491.