Museumsbahn Blonay–Chamby

Dialäkt: Bärndütsch

E Zug vor Museumsysebahn uf der Ysebahnstrecki vo Blonay nach Chamby im Summer 2010

E historische Triibwage vor Monthey–Champéry–Morgins-Bahn im Summer 2015

D Museumsbahn Blonay–Chamby (BC), uf Französisch Chemin de Fer-Musée Blonay-Chamby, isch im Jahr 1968 entstande, u isch somit die eutischti Museumsysebahn i der Schwiiz.

A de Wucheändi i der Summerseson bietet d Museumsysebahn ir Region Montreux-Vevey ar Waadländer Riviera Bahnvergnüege pur bi re Fahrt mit eim vo ire Züg mit Dampf- oder Elektrotraktion. Z Chaulin, wo vom Bahnhof Blonay här uf der Bahnstrecki nach Chamby erreichbar isch, wird die schwiizwit gröschti Sammlig a betribsfähige historische Meterspur-Fahrzüg zeigt.

D Museumsbahn wird dür Freiwilligi betribe. Die unterhaute ou dä i zwe Haue usgsteuti einzigartig Fahrzügpark, wo us über 70 Dampflokomotive, Elektrolokomotive, Elektrotriibwage, Tram, Personewäge u Güeterwäge us de Jahr 1874 bis 1948 besteit. D Fahrzügsammlig giut aus eini vo de repräsentativste z Europa.

Die vo der Museumsbahn befahreni Bahnstrecki vo Blonay nach Chamby stammt us em Jahr 1902 u isch drei Kilometer läng. Z bekantischti Bouwärk isch der 78 Meter längi u 45 Meter höchi Steibogeviadukt über der Schlucht "Baye de Clarens".

Literatur

• Sébastien Jarne (Hrsg.): Le chemin de fer touristique Blonay–Chamby. Lausanne 1986. 
• Alain Castella und Charles-Maurice Emery: Faire La Voie, Chemin de fer-Musée Blonay–Chamby. Departement für Bildung, Jugend und Kultur (DFJC) – Amt für Kultur (SERAC) des Kanton Waadt, Lausanne 2010. 

Weblink

 Commons: Museumsbahn Blonay–Chamby – Sammlig vo Multimediadateie

• Museumsbahn Blonay–Chamby (BC)