Hippokrates vo Kos
![](http://upload.wikimedia.org/wikipedia/commons/thumb/c/cb/Hippokrates.jpg/220px-Hippokrates.jpg)
Dr Hippokrates vo Kos (altgriech. Ἱπποκράτης ὁ Κῷος, Hippokrátēs ho Kōios; * um 460 v. d. Z. uf dr griechische Egeisinsle Kos; † um 370 v. d. Z. z Larisa, Thessalie) gältet as dr berüemtisti Arzt im Alterdum.
Dr Hippokrates isch scho zu Läbzite hooch vereert worde. Er het natürligi Ursache für d Chrankhäite gsuecht und gältet dorum as dr Begründer vo dr Medizin as Wüsseschaft. Im 2. Joorhundert n. d. Z. isch s zun ere Hippokrates-Rönessans choo, wo dr Galen vil drzue biidräit het. Uf koische Bronsemünze us dr früeje römische Kaiserzit isch e Bild von em.
Lääbe
[ändere | Quälltäxt bearbeite]Dr Hippokrates isch vom Gschlächt vo de Asklepiade abgstammt, wo sich sälber uf e Häilgott Asklepios zrugggfüert häi; sini Eltere häi Heraklides und Phänarete (Φαιναρέτη) ghäisse.
Zerst het em si Vater Underricht gee und denn u. a. au dr Herodikos vo Selymbria und dr Filosoof Demokrit vo Abdera. As wandernde Arzt isch er vil und wit dur Griecheland und Chläiasie gräist. Under anderem het er sich drei Joor lang uf dr Insle Thasos ufghalte. Er het e groosse Biidraag zur koische Ärztschuel gmacht. Iim zu Eere isch en Orientalischi Platane in Kos-Stadt noch im benennt worde.[1]
Sini Söön Drakon und Thessalos und si Schwiigersoon Polybos häi d Familiedradizion witergfüert.
S Graab vom Hippokrates isch im Joor 1826 entdeggt worde. Es befindet sich in dr Nööchi vo dr griechische Stadt Larisa. Wäge däm het mä iim zu Eere in Larisa e Dänggmol ufgstellt.
D Leer
[ändere | Quälltäxt bearbeite]Die hippokratischi Medizin isch passiv gsi und het sich zum e groosse Däil uf die häilendi Chraft vo dr Natur verloo. D Hippokratiker häi d Chrankhäite druf zrugggfüert, ass d Körpersäft (Bluet, Schliim, gääli und schwarzi Galle, zum Däil au Wasser) nid im Gliichgwicht si. Dr Arzt het brobiert, sini Paziänte mit Rue, Änderige im Lääbensstiil, mit Diät, Arzneimiddel und mit operative Iigriff wider gsund z mache. Us dr hippokratische Säftleer si e Hufe Behandligsmaassnaäme abgläitet worde, bsundrigs dr Aderlass, s Schröpfe und d Aawändig vo Abfüermiddel, wo bis in die früeji Nöizit gang und gääb gsi si. E wichdige Begriff isch dä vo dr Kriise gsi, wo sich entschäidet, öb e Chranke stirbt oder wider gsund wird.
Litratuur
[ändere | Quälltäxt bearbeite]- Hippokrates: Works (änglisch, übersetzt vo dr Francis Adams)
- Hippokrates: Sämtliche Werke. Übersetzt und kommentiert vom Robert Fuchs. Verlag H. Lüneburg, Münche 1895–1900
- Die Werke des Hippokrates. Die hippokratische Schriftensammlung in neuer deutscher Übersetzung. Uusegee vom Richard Kapferer und Georg Sticker, I–V, Stuttgart 1933–1940
- Werner Golder: Hippokrates und das Corpus Hippocraticum. Eine Einführung für Philologen und Mediziner, Königshausen & Neumann, Würzburg, 2007, ISBN 978-3-8260-3335-3
- Jutta Kollesch, Diethard Nickel: Antike Heilkunst – Ausgewählte Texte. Philipp Reclam jun., Stuttgart 1994, ISBN 978-3-15-009305-4
Weblingg
[ändere | Quälltäxt bearbeite]![](http://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Michael Boylan: Yytrag in dr Internet Encyclopedia of Philosophy (änglisch mit Literaturaagabe)
- Liste vo de Schrifte vom Corpus Hippocraticum uf gottwein.de
- Wärk vom Hippokrates: Teggst, Konkordanze und Frekwänzliste
Fuessnoote
[ändere | Quälltäxt bearbeite]- ↑ Baedeker Allianz Reiseführer: Kos. Verlag Karl Baedeker, 3. Auflage 2007, S. 151
![]() |
Dä Artikel basiert uff ere fräie Übersetzig vum Artikel „Hippokrates_von_Kos“ vu de dütsche Wikipedia. E Liste vu de Autore un Versione isch do z finde. |