as-Salih

Dr Al-Malik as-Salih Nadschm ad-Din Ayyub (arabisch أبو الفتح الملك الصالح نجم الدين أيوب بن ناصر الدين محمد, Umschrift: Abū l-Fatiḥ al-Malik aṣ-Ṣāliḥ Naǧm ad-Dīn Aiyūb b. Nāṣir ad-Dīn Muḥammad, Übername: Abu al-Fituh أبو الفتوح; gstorbe 22./23. November 1249) isch vo 1240–1249 dr sächst Sultan vo de Ayyubide z Ägypte gsi.

Dr As-Salih Ayyub isch dr eltist Sohn vom Sultan al-Kamil und ere sudanesischi Sklavin gsi. Der Dod vo siim Vater im März 1238 het e Bürgerchrieg under de Ayyubide entfesslet. Dr As-Salih Ayyub isch denn im Norde gsi, isch aber sofort gege Damaskus gmarschiert, wo ein vo de Neuveux vom al-Kamil, dr al-Dschauad, d Macht ergriffe het. Mit dr Hilf vo choresmische Freischärler het er si Cousin abgsetzt. Si jünger Bruder al-Adil II. isch underdesse als Sultan z Ägypte iigsetzt worde. Dr As-Salih het die riichsti Provinz vo siim Vater für sich beasprucht, aber won er ufbrochen isch, für zum in Ägypte iizfalle, isch er vom ene Staatsstreich z Damaskus zugunste vo siim Unggle as-Salih Ismail endront worde. Uf der Flucht nach Süde het en dr Emir vo Kerak, dr an-Nasir Dawud, gfange gnoh. Em As-Salih isch s glunge, e Bündnis mit em an-Nasir zu schliesse, und dä het em Druppe für en Invasion vo Ägypte glehnt. Dört het er sofort Erfolg gha: em Al-Adil siini Minister hai ihn im Juni 1240 gstürzt und ermordet gha und hai jetzt dr as-Salih als dr neu Sultan vo Ägypte begrüesst. Dr An-Nasir Dawud isch mit em Boste vom Militärgouverneur vo Palästina belohnt worde.

Dr Ismail isch Sultan vo Damaskus bliibe und währed em nechste Johrzähnt isch die ayyubidischi Wält vo dr Rivalität zwüschem Unggle und em Neveu verrisse worde. Zerst het er sich mit em Königriich Jerusalem müesse beschäftige. Dört isch 1239 e Chrüzfahrerarmee under em Theobald IV. vo Champagne iidroffe, wo die ägyptischi Gränze bedroht und scho im November 1240 bi Gaza e chliiners Gfächt mit de ägyptische Druppe vom al-Adil II. gfüehrt het. Underdesse hai sich d Chrüzfahrer mit em Ismail gege dr as-Salih verbündet, und dr Ismail het ene drfür Galiläa abdräte. Ändi 1240/1241 het dr as-Salih d Glägeheit usgnützt e Neutralitätsabkomme mit de Chrüzfahrer abzschliesse, und het ene drfür d Gebiet nördlig vo Gaza und westlig vom Jordan überlo.

Dr As-Salih het im Kampf gege si Unggle herrelosi choresmischi Freischärler in Nordsyrie agworbe, wo dörte d Gegend verwüestet hai. Die si 1244 nach Palästina zoge, wo si Tiberias blünderet hai. Denn hai si Jerusalem eroberet und usblünderet, und so het dr as-Salih de Chrüzfahrer d Stadt ändgültig entrisse. Die hai sich druf mit em Ismail und andere syrische Ayyubide verbündet. Ihri Allianzarmee isch aber in der Schlacht vo La Forbie vernichtend gschlage worde, und denn het dr as-Salih 1245 Damaskus eroberet und s Ayyubideriich wider zum grösste Deil chönne vereinige.

Für zum die unruehige Söldnerdruppe vo de Choresmier chönne under Kontrolle z hebe, het under em as-Salih dr versterkt Ufbau vo türkische Sklavedruppe (die sog. Mameluke) agfange. In der Folg het er nit nume 1246 d Choresmier chönne besiige, sondern 1247 au Tiberias und Askalon vo de Chrüzfahrer chönne zruggerobere. Allerdings hai die Erfolg vo de Ayyubide z Palästina zum Sächste Chrüzzug (1248–1254) gfüehrt, wo im Juni 1249 zum ene Agriff in Ägypte glandet isch.

Dr as-Salih isch in der Nacht vom 22. auf den 23. November 1249 noch ere schwere Chrankhet gstorbe. Si Lieblingsfrau, d Schadschar ad-Dur, het d Dronfolg vo siim Sohn Turan Schah (1249–1250), wo bis denn z Mesopotamie gregiert het, chönne duresetze.

Literatur

• Mayer, Hans Eberhard: Geschichte der Kreuzzüge, Verlag W. Kohlhammer GmbH, 1995. S. 226
• Runciman, Steven: Geschichte der Kreuzzüge, Sonderausgabe in 1 Band, Verlag H.C. Beck, München 1978. S. 990,992

Dä Artikel basiert uff ere fräie Übersetzig vum Artikel „As-Salih“ vu de dütsche Wikipedia. E Liste vu de Autore un Versione isch do z finde.