Gaan na inhoud

Oldeuboi (2003 rolprent)

in Wikipedia, die vrye ensiklopedie
Oldeuboi
Musiek deur Cho Young-wuk
Kinematografie Chung Chung-hoon
Ateljee Egg Film
CJ Entertainment
Verspreider Show East
Speeltyd 120 minute[1]
Land Suid-Korea
Taal Koreaans
Begroting $3 miljoen[2]
Bruto wins $17.1 miljoen[3]

Oldeuboi, ook bekend as Oldboy (Koreaans: 올드보이, Oldeuboi of Oldŭboi), is 'n aksieriller rolprent uit 2003[4][5] wat geregisseer en medegeskryf is deur Park Chan-wook. Dit is losweg gebaseer op die gelyknamige Japannese manga. Die rolprent gaan oor die verhaal van Oh Dae-su (vertolk deur Choi Min-sik), wat vir 15 jaar gevange gehou word in 'n selkamer wat lyk soos 'n hotelkamer, sonder dat hy bewus is van die identiteit van sy ontvoerder of diè se motiewe. Wanneer hy finaal vrygelaat word bevind Dae-su hom in 'n mengelmoes van sameswering en geweld, terwyl hy wraak soek teen sy enigmatiese ontvoerder, (vertolk deur Yoo Ji-tae). Sy soeke na sy ontvoerder raak uiteindelik verstrengel met 'n liefdesverhouding wanneer hy verlief raak op 'n jong sushisjef, Mi-do (vertolk deur Kang Hye-jung).

Oldeuboi het wêreldwyd kritiek lof ontvang en het die Grand Prix tydens Cannes-rolprentfees 2004 ontvang, waar dit groot lof van Quentin Tarantino, die president van die beoordelingspaneel, ontvang het. In die Verenigde State het die rolprentresensent Roger Ebert verklaar dat Oldboy 'n "kragtige rolprent is, nie weens dit wat uitgebeeld word nie, maar as gevolg van die diepte van die menslike hart wat dit ontbloot". Die rolprent se aksietonele, veral die geveg in 'n gang, het ook lof ontvang.

Die rolprent se sukses het gelei tot twee verwerkings: 'n ongemagtigde Hindi-verwerking uit 2006, en 'n amptelike Amerikaanse verwerking uit 2013. Dit is die tweede aflewering in Park Chan-wook se Wraak-trilogie, na Sympathy for Mr. Vengeance (2002) en die gevolglike Lady Vengeance (2005).

In 2008 is Oldeuboi 64ste geplaas op Empire se lys van die top 500 rolprente van alle tye.[6] In 2020 het The Guardian dit gelys as nommer 3 in 'n lys van klassieke moderne Suid-Koreaanse films.[7]

Verhaal

[wysig | wysig bron]

In 1988 word die sakeman Oh Dae-su vir openbare dronkenskap in hegtenis geneem, wat veroorsaak dat hy sy dogter se vierde verjaardagpartytjie misloop. Nadat sy vriend Joo-hwan hom by die polisiestasie oplaai word Dae-su ontvoer waarna hy hy wakker word in 'n hotelkamer, waar kos deur 'n klein deurtjie aangegee word, en die enigste vorm van afleiding 'n televisie is. Oh Dae-su verneem dat sy vrou vermoor is en dat hy deur sy ontvoerders as die hoofverdagte beskou word. Soos die jare verbygaan, raak Dae-su versteurd. Hy probeer selfmoord pleeg deur sy polse te sny, maar word aan die lewe gehou deur sy ontvoerders. Hierna spandeer Dae-su jare daaraan om gevegskuns teen die muur te beoefen, en probeer hy om 'n ontsnaptonnel te grawe sodat hy wraak kan neem op sy ontvoerders.

In 2003, na 15 jaar se gevangenisskap, word Dae-su skielik vrygelaat nadat hy verdoof en gehipnotiseer is. Dae-su word wakker op 'n dak waar hy 'n man ontmoet wat selfmoord wil pleeg. Nadat hy sy vegvaardighede op 'n groep boewe getoets het, gee 'n geheimsinnige bedelaar vir hom geld en 'n selfoon. Dae-su gaan 'n sushi-restaurant binne waar hy Mi-do, 'n jong sjef, teëkom. Nadat hy 'n telefoonoproep van sy ontvoerder ontvang en 'n lewendige seekat verorber, stort hy inmekaar en word deur Mi-do ingeneem. Dae-su probeer om Mi-do te verkrag en probeer dan om haar woonstel te verlaat, maar hulle raak versoen en begin 'n noue band vorm. Sodra hy herstel het, probeer Dae-su om sy dogter op te spoor, maar staak sy soektog nadat hy verneem dat sy aangeneem is ná sy ontvoering. Hierna fokus hy op die identifisering van sy ontvoerders. Dae-su vind die Chinese restaurant waar sy tronkkos voorberei is, en volg dan 'n afleweringsman om die hotelkamer te vind.

Dae-su verneem daar dat die hotel 'n private tronk is waar mense betaal word om ander op te sluit. Hy martel en ondervra die bewaarder, mnr. Park Cheol-woong, wat verklap dat Dae-su gevange geneem is omdat hy "te veel gepraat het". Mnr. Park se wagte val Dae-su aan, en 'n hewige bakleiery volg in 'n gang. Dae-su word gesteek, maar slaag tog daarin om al sy vyande te verslaan. Sy ontvoerder word dan onthul as die ryk sakeman, Lee Woo-jin, wat Dae-su 'n ultimatum stel: As hy die motief vir sy gevangenisskap binne vyf dae kan ontsyfer, sal Woo-jin homself doodmaak; anders sal hy Mi-do doodmaak. Dae-su en Mi-do groei nader en het uiteindelik seks.

Joo-hwan kontak Dae-su met belangrike inligting, maar word deur Woo-jin vermoor terwyl Joo-hwan op die foon is. Dae-su onthou dat hy en Woo-jin dieselfde hoërskool bygewoon het, waar hy gesien het hoe Woo-jin bloedskande pleeg met sy suster, Lee Soo-ah. Dae-su het vir Joo-hwan vertel wat hy gesien het, wat daartoe gelei het dat sy klasmaats geskinder het oor Soo-ah. Soo-ah pleeg later selfmoord na 'n vals swangerskap, wat die geteisterde Woo-jin daartoe noop om wraak te neem. In die hede kap Woo-jin mnr. Park se hand af, en mnr. Park en sy bende span kragte saam met Dae-su. Dae-su verlaat Mi-do saam met mnr. Park en gaan na Woo-jin.

In sy dakwoonstel wys Woo-jin vir Dae-su 'n gesinsalbum met foto's van Dae-su, sy vrou en sy babadogter van vyftien jaar vroeër. Terwyl hulle vorder na foto's van sy dogter soos sy grootword, word dit onthul dat Mi-do Dae-su se dogter is. Woo-jin onthul dat hy gebeure deur hipnose georkestreer het om Dae-su na die restaurant te lei sodat hy en Mi-do verlief sou raak, sodat Dae-su dieselfde pyn van bloedskande kon ervaar as wat hy ervaar het. Woo-jin onthul dat mnr. Park steeds vir hom werk en dreig om vir Mi-do die waarheid te vertel. Dae-su vra desperaat om verskoning vir die verspreiding van die gerug wat gelei het tot die selfmoord van Woo-jin se suster. Dae-su smeek dat Mi-do nie daarvan te wete kom dat hy haar vader is nie, en verneder homself deur handeviervoet te bedel, soos 'n hond op te tree en Woo-jin se skoene te lek. Wanneer Woo-jin onbewoë is, sny Dae-su sy tong uit as boetedoening. Woo-jin aanvaar uiteindelik Dae-su se verskoning en gee aan mnr. Park opdrag om nie die waarheid aan Mi-do te openbaar nie. Hy laat val dan die afstandbeheer, wat hy beweer sy pasaangeër kan stop, en loop weg. Dae-su aktiveer die toestel in 'n poging om Woo-jin dood te maak, net om te vind dat dit die afstandbeheerder vir 'n bandopnemer is wat 'n oudio-opname deur luidsprekers speel van Dae-su en Mi-do wat seks het. Terwyl Dae-su wanhopig ineenstort, gaan Woo-jin die dakwoonstel binne en, terwyl hy sy betrokkenheid by sy suster se selfmoord onthou, skiet hy homself in die kop.

'n Rukkie later vind Dae-su die hipnotiseur op en skryf aan haar om te versoek dat sy sy herinneringe uitvee dat Mi-do sy dogter is, sodat hulle saam gelukkig kan bly. Aanvanklik vertel sy hoe sy hom nie wou help nie, maar deur 'n spesifieke reël in sy brief geraak is, iets wat die man gesê het op die dak waar Dae-su die eerste keer vrygelaat is.[8] Die hipnotiseur lei Dae-su daartoe om hom voor te stel hoe die deel van hom wat die waarheid ken, sterf. Daarna ontmoet Mi-do Dae-su waar hy in die sneeu lê, maar daar is geen teken van die hipnotiseur nie. Mi-do bely haar liefde vir hom, en die twee omhels mekaar. Dae-su glimlag breed, wat stadigaan vervang word deur 'n gemartelde grynslag.

Rolverdeling

[wysig | wysig bron]
Choi Min-sik het die hoofrol vertolk in Oldeuboi as Oh Dae-su.
  • Choi Min-sik as Oh Dae-su, 'n sakeman wat wraak soek nadat hy vir 15 jaar in 'n geheimsinnige tronk gevange gehou is. Choi Min-sik het beurtelings gewig verloor en aangesit vir sy rol, afhangende van die filmskedule. Hy het ook vir ses weke geoefen en die meeste van die gevaarlike tonele self waargeneem.
    • Oh Tae-kyung [오태경 (배우)] as die jong Dae-su.
  • Yoo Ji-tae as Lee Woo-jin, die man agter Oh Dae-su se gevangenskap. Park Chan-wook se ideale keuse vir die rol van Woo-jin was Han Suk-kyu, wat voorheen die rol vertolk het van Choi Min-sik se mededinger in Shiri en No. 3. Choi het Yoo Ji-tae voorgestel vir die rol, ten spyte daarvan dat Park geglo het dat hy te jonk was daarvoor.[9]
    • Yoo Yeon-seok as die jong Woo-jin.
  • Kang Hye-jung as Mi-do, Dae-su se groot liefde.
  • Ji Dae-han [지대한] as No Joo-hwan, Dae-su se vriend en die eienaar van die internetkafee.
    • Woo Il-han [유일한 (배우)] as die jong Joo-hwan.
  • Kim Byeong-ok as Mr. Han, Woo-jin se lyfwag.
  • Yoon Jin-seo as Lee Soo-ah, Woo-jin se suster.
  • Oh Dal-su as Mnr. Park Cheol-woong, bewaarder van die privaat tronk.
  • Oh Kwang-rok as die man wat selfmoord pleeg.

Verwysings

[wysig | wysig bron]
  1. ↑ "Oldboy". British Board of Film Classification. Geargiveer vanaf die oorspronklike op 31 Januarie 2020. Besoek op 26 Maart 2018.
  2. ↑ "Oldboy (2003) - Financial Information". The Numbers. Geargiveer vanaf die oorspronklike op 16 Februarie 2019. Besoek op 16 Februarie 2019.
  3. ↑ "Oldboy (2005)". Box Office Mojo. Geargiveer vanaf die oorspronklike op 27 Oktober 2017. Besoek op 3 September 2023.
  4. ↑ "OLDBOY (2003)". British Board of Film Classification. Geargiveer vanaf die oorspronklike op 10 November 2020. Besoek op 10 November 2020.
  5. ↑ "From Mind-Numbing Thrillers To Refreshing Rom-Coms, 15 Korean Movies You Need To Watch ASAP!". Indiatimes]]. 30 Maart 2019. Geargiveer vanaf die oorspronklike op 13 Julie 2019. Besoek op 7 Augustus 2019.
  6. ↑ Sciretta, Peter (5 Oktober 2008). "Empire Magazine's 500 Greatest Movies Of All Time". /Film. Geargiveer vanaf die oorspronklike op 23 Februarie 2022. Besoek op 23 Februarie 2022.
  7. ↑ Bradshaw, Peter (13 Februarie 2020). "Classics of modern South Korean cinema – ranked!". The Guardian. Geargiveer vanaf die oorspronklike op 30 Mei 2020. Besoek op 16 Maart 2020.
  8. ↑ Alhoewel ek nie veel beter is as 'n wilde dier nie, beskik ek tog oor die reg om te lewe.
  9. ↑ Cine21 onderhoud oor Park se wraak-trilogie; 27 April 2007.
Ontsluit van "https://af.wikipedia.org/w/index.php?title=Oldeuboi_(2003_rolprent)&oldid=2672112"