Gene Hackman

Gene Hackman
Hackman in Junie 2008.
Geboortenaam	Eugene Allen Hackman
Geboorte	30 Januarie 1930 (1930-01-30)
Aktiewe jare	1956–2004

Eugene Allen "Gene" Hackman (gebore op 30 Januarie 1930) is ’n Amerikaanse akteur en romanskrywer met 'n toneelspelloopbaan van vyf dekades.

Loopbaan

Hackman in 1972.

As akteur

Hackman het verskeie klein rolle gespeel, soos in die televisiereeks Route 66 (1963), en in Off-Broadway-toneelstukke. Sy eerste rolprentrol was in Lilith (1964, met Warren Beatty in die hoofrol). Hy het in 1967 algemeen bekend geraak vir sy spel as Buck Barrow in Bonnie and Clyde, waarvoor hy die eerste keer vir ’n Oscar benoem is. Ná ’n paar TV-rolle was hy in 1969 te sien in Downhill Racer en Marooned.

Sy bekendste prente daarna sluit in The French Connection (1971), French Connection II (1975), The Poseidon Adventure (1972), The Conversation (1974), Superman (1978), waarin hy Lex Luthor gespeel het, Hoosiers (1986), Mississippi Burning (1988), Unforgiven (1992), The Firm (1993), Crimson Tide (1995), Get Shorty (1995), The Birdcage (1996), Enemy of the State (1998), Behind Enemy Lines (2001) en The Royal Tenenbaums (2001).

Gedurende sy loopbaan is Hackman vyf keer vir ’n Oscar benoem, waarvan hy twee gewen het: vir beste akteur vir The French Connection en beste manlike byspeler vir Unforgiven. Hy het ook drie Golden Globes en twee Baftas ingepalm.

Aftrede

Op 7 Julie 2004 het Hackman ’n seldsame onderhoud met Larry King gehad waarin hy gesê het hy het geen verdere rolprentprojekte in die vooruitsig nie en dat hy dink sy toneelloopbaan is verby. In 2008 het hy bevestig dat hy uit die rolprentbedryf getree het.

As romanskrywer

Hackman het saam met die ondersese argeoloog Daniel Lenihan drie historiese fiksieromans geskryf: Wake of the Perdido Star (1999), Justice for None (2004) en Escape from Andersonville (2008). Die eerste boek wat hy alleen geskryf het, ’n storie van liefde en wraak wat in die Ou Weste afspeel, Payback at Morning Peak, is in 2011 uitgereik. ’n Polisieriller, Pursuit, het in 2013 gevolg.

Eksterne skakels

• Gene Hackman in die Internet-rolprentdatabasis
• Gene Hackman in die TCM-rolprentdatabasis
• Wikimedia Commons het meer media in die kategorie Gene Hackman.
• Hierdie artikel is vertaal uit die Engelse Wikipedia