Cliveden
in die Chiltern Hills, Buckinghamshire
Engeland Verenigde Koninkryk
Opgerig
Vanaf 1851
Boustyl
Italianate
Argitek
Sir Charles Barry
Webtuiste
Cliveden House
Cliveden [ˈklɪvdən] is 'n herehuis en landgoed in besit van die National Trust, geleë in die Engelse graafskap Buckinghamshire digby die grens met Berkshire. Die herehuis in die Italianate-boustyl staan amptelik bekend as Cliveden House en is in 1666 deur die 2de hertog van Buckingham as 'n geskenk vir sy geliefde opgerig. Cliveden House het op 'n bergrug teen die rand van die Chiltern Hills ontstaan, digby die klein nedersetting Taplow en twee myl buite Maidenhead. Die huidige gebou met drie verdiepings het in 1851 volgens 'n ontwerp van Sir Charles Barry ontstaan nadat die vorige herehuis deur 'n brand vernietig is. Bewaar gebly het die oorspronklike baksteenterras wat teen die middel van die 17de eeu gebou is, met 'n lengte van 400 voet en 'n wydte van 20 voet.
![](http://upload.wikimedia.org/wikipedia/commons/thumb/6/60/Camino_della_sala_grande_nel_Palazzo_di_Cliveden.jpg/220px-Camino_della_sala_grande_nel_Palazzo_di_Cliveden.jpg)
Die herehuis is op die oewer van die Teems geleë, sowat 130 voet of 40 meter bo die rivierloop, op hellings wat afwaarts na die rivier daal. Cliveden het as woning vir 'n graaf, drie gravinne, twee hertoë, 'n Prins van Wallis en die Visegrawe Astor gedien. Cliveden is een van die National Trust se gewildste eiendomme, met 487 679 betalende besoekers in 2017.
As woning van Nancy en Waldorf Astor het Cliveden gedurende die 1920's en 1930's as ontmoetplek vir die sogenaamde Cliveden Set gedien - 'n groep van intellektueles uit die hoërklas en bekende persoonlikhede soos uitgewers en politici wat voor die Tweede Wêreldoorlog 'n invloedryke rol in die Verenigde Koninkryk se politieke lewe gespeel het - onder wie die Duitse ambassadeur (en latere minister van buitelandse sake) Joachim von Ribbentrop, Charlie Chaplin, David Lloyd George, Rudyard Kipling en kolonel Thomas Edward Lawrence, beter bekend as Lawrence of Arabia. 'n Kommunistiese joernalis, Claud Cockburn (1904–1981), het die groep as 'n "skadukabinet" beskryf wat moontlik pogings sou onderneem om die Britse buitelandse beleid te beïnvloed, onder meer deur 'n vernederende politieke ooreenkoms met Nazi-Duitsland.
So is in die pers na Cliveden House verwys as Nancy Astor se Schloss Cliveden. Selfs die gesiene Amerikaanse dagblad The Washington Post het die Cliveden Set as the real center of British foreign policy beskryf. Sodanige samesweringsteorieë en spekulasies het hoogty gevier nadat die destydse Britse minister van buitelandse beleid, Edward Wood, 1st Earl of Halifax, in Oktober 1937 'n besoek aan Berlyn gebring het waar hy onder meer deur Adolf Hitler onthaal is, maar was nogtans ongegrond.[1][2]
Later, in die vroeë sestigerjare, het hoofgebeure van die sogenaamde Profumo-skandaal rondom die Britse minister van verdediging, John Profumo (1915–2006), hier afgespeel. In 1961 het Profumo by die buiteswembad kennis gemaak met Christine Keeler (1942–2017), die geliefde van 'n beweerde Sowjet-Russiese spioen. Gedurende die 1970's het die herehuis as oorsese kampus vir die Kaliforniese Stanford-universiteit gedien.
Vandag word die herehuis deur die National Trust verhuur en as vyfster-luuksehotel bedryf, maar staan nogtans oop vir die belangstellende publiek as deel van National Trust-besigtigingstoere.[3] Die herehuis en hotel se alledaagse bestuur staan sentraal in 'n dokumentêr, A Very British Country House, wat deur Oxford Scientific Films (OSF) vervaardig en in 2018 deur die Britse televisiekanaal Channel 4 in vier aflewerings uitgesaai is.
Verwysings
[wysig | wysig bron]- ↑ Norman Rose: The Cliveden Set: Portrait of an Exclusive Fraternity. London: Random House 2000
- ↑ James Fox: Five Sisters: The Langhornes of Virginia. New York, NY: Simon & Schuster 2000, bl. 432
- ↑ nationaltrust.org: Cliveden's iconic mansion house. Besoek op 2 Desember 2018
Eksterne skakels
[wysig | wysig bron]- National Trust
- Media