Camogli
Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Città di Camogli Camoggi | |
---|---|
Stad | |
![]() Uitsig oor Camogli | |
Koördinate: 44°21′00″N 09°47′09″O / 44.35000°N 9.78583°O | |
Land | ![]() |
Streek | ![]() |
Provinsie | Metropolitane Stad Genua |
Antieke nedersetting | Sedert 2de eeu v.C. |
Regering | |
• Burgemeester | Francesco Olivari |
Oppervlak | |
• Totaal | 10,07 km2 (3,89 vk. myl) |
Hoogte | 32 m (105 ft) |
Bevolking | |
• Totaal | 5 300 |
• Digtheid | 526,3/km2 (1 362,5/vk. myl) |
Tydsone | UTC+1 (MET) |
• Somertyd | UTC+2 (MEST) |
Poskode | 1632 |
Skakelkodes | 0185 |
Webwerf | Comune di Camogli |
Camogli (Liguries: Kamùgi of Camoggi, in die Genuese dialek Camuggi genoem) is 'n klein seehawe met 'n bevolking van 5 300 wat administratief aan die Metropolitane Stad Genua behoort. Camogli is sowat 20 km oos van Genua aan die weskant van die Portofino-skiereiland (Promontorio di Portofino) aan die Riviera di Levante se Golfo Paradiso geleë. In die volksetimologie word die stadsnaam afgelei van die Italiaanse Casa delle mogli of "Huis van die eggenotes" - 'n verwysing na Camogli se historiese status as tuishawe van 'n groot vloot van seilskepe. Hierdie status het meegebring dat 'n groot deel van die manlike inwoners dikwels op see was.
![](http://upload.wikimedia.org/wikipedia/commons/thumb/0/00/Alture_di_Camogli_con_San_Rocco_sullo_sfondo_-_panoramio.jpg/220px-Alture_di_Camogli_con_San_Rocco_sullo_sfondo_-_panoramio.jpg)
Camogli het gedurende die laat Middeleeue tot 'n belangrike Mediterreense hawe gegroei. Sy vloot het in Camogli se bloeityd uit honderde groot seilskepe bestaan - vandaar sy bynaam «Stad van duisend wit seilskepe». Die belangrike rol, wat Camogli ten opsigte van skeepsbou en seehandel gespeel het, is reeds in historiese dokumente van 1158 beskryf. Tussen 1700 en die laat 19de eeu was Camogli se vloot een van die grootstes in Europa. Teen die middel van die 19de eeu is dit op sowat 700 seilskepe beraam - en was sodoende selfs groter as dié van groter seehawens soos Hamburg (met 450 skepe). In 1853 is die wêreld se eerste seeassuransie, die Associazione di Mutua Assicurazione Marittima, hier gestig.[1]
In 1798 het Camogli die strategiese fout begaan om 'n groot deel van hierdie skepe aan Napoléon I Bonaparte se Franse vloot beskikbaar te stel. In die seeslag naby die Egiptiese Aboekir het die Franse 'n verpletterende neerlaag teen die Britse admiraal Nelson gely.
Die vlootkollege Istituto Nautico Cristoforo Colombo, wat in 1874 gestig is, bestaan steeds as opleidingskollege vir handelskip-offisiers, net soos 'n bejaardehuis vir seekapteins. Hul getal het in 1880 nie minder as 500 beloop nie - uit 'n totale bevolking van 12 000. Met die koms van stoomskepe het toerisme die belangrikste bron van inkomste geword. Die kleurryke fasades was oorspronklik 'n visuele hulpmiddel vir Camogli se vissers wat 'n veilige navigasie na hul tuishawe vergemaklik het.
Verwysings
[wysig | wysig bron]- ↑ "The MediTelegraph, 18 November 2017: Così nel 1853 nacque a Camogli la prima assicurazione marittima / LA STORIA. Besoek op 1 September 2019". Geargiveer vanaf die oorspronklike op 1 September 2019. Besoek op 1 September 2019.