Bonn
Kaart | Wapen |
![]() | |
![]() | |
Vlag | |
![]() | |
Land | ![]() |
Deelstaat | ![]() |
Koördinate | 50° 43' N, 7° 06' O |
Stigting | 12 v.C. Romeinse voorpos |
Stadstatus | 1243 |
Oppervlakte: | |
- Totaal | 141,22 vk km |
Hoogte bo seevlak | 45,6-194,8 m |
Bevolking: | |
- Totaal (30 Junie 2017) | 323 122[1] |
- Bevolkingsdigtheid | 2 288/vk km |
Tydsone | UTC +1 (MET) |
Burgemeester | Katja Dörner (Grüne) |
Amptelike webwerf | www.bonn.de |
![](http://upload.wikimedia.org/wikipedia/commons/thumb/9/91/Bonn-1311%2C_UN-Klimakonferenz_in_Bonn_2017%2C_Bula-Zone.jpg/220px-Bonn-1311%2C_UN-Klimakonferenz_in_Bonn_2017%2C_Bula-Zone.jpg)
Die Federale Stad Bonn lê in die suide van die Duitse deelstaat Noordryn-Wesfalen langs die oewers van die Ryn. Dit is een van die oudste stede van Duitsland, met 'n geskiedenis wat oor meer as 2 000 jaar strek. Tot die einde van die 18de eeu was Bonn die hoofstad van die Keulense Keurvorste. Tydens die 19de eeu ontwikkel die Universiteit van Bonn tot een van die voorste en grootste akademiese instellings in Duitsland, met sowat 30 000 studente op hede.
In die tydperk tussen 1949 en 1990 dien Bonn as die hoofstad van die Bondsrepubliek Duitsland[2] en daarna, tot by die jaar 1999, as regeringsetel van die herenigde Duitsland. Alhoewel die parlement en dele van die regering na die historiese hoofstad Berlyn verskuif is, is daar nog steeds ses departemente in die stad, wat die amptelike naam Federale Stad Bonn gekry het.
Die voormalige hoofkantore van parlement, regering en baie departemente is deur maatskappye oorgeneem. Twaalf organisasies van die Verenigde Nasies het hulle hoofkwartiere in die stad, en die nuwe VN-Kampus, wat in Julie 2006 geopen is, huisves nou die meeste van hulle.
Geografie
[wysig | wysig bron]Bonn lê in die suidweste van die Duitse deelstaat Noordryn-Wesfalen, sowat 25 km van Keulen af, in die oorgangsgebied tussen die Rynlandse Leisteen-gebergte en die Nederrynse Vlakte. Die stad lê langs die oewers van die Ryn, met tweederdes van die stadsgebied teen die linkeroewer.
Bonn grens in die suide en weste aan die uitlopers van die Eifel-gebergte, in die noorde aan die Keulense Bog en in die ooste en suid-ooste aan die Bergiese Land. Weens sy ligging word Bonn ook die "Poort na die romantiese Middelryn" genoem.
Die hoogste bergspits in die stadgebied is die Paffelsberg met 'n hoogte van 194,8 meter. Bonn beskik oor 'n natuurpark in die stadsentrum, die Rheinaue-park, wat met sy oppervlak van 160 hektaar 'n groot deel van die vloedgebied teen die linker- en regteroewer van die Ryn beslaan. Die park is tydens die Federale Tuinskou in 1979 ingewy en word onder meer vir opelugkonserte gebruik.
Geskiedenis
[wysig | wysig bron]Steentydperk en vroeë geskiedenis
[wysig | wysig bron]![](http://upload.wikimedia.org/wikipedia/commons/thumb/2/24/Doppelgrab_von_Oberkassel_skeletons.jpg/220px-Doppelgrab_von_Oberkassel_skeletons.jpg)
Mense het hulle al lank voor die begin van ons tydrekening in hoër geleë terrein naby die Ryn gevestig. Argeologiese vondse, wat dwarsoor die stadsgebied gemaak is, dokumenteer menslike aktiwiteite in die gebied wat van die Ou Steentydperk tot in die tyd van die Germane strek. 'n Tiental vuisbyle, wat in Muffendorf, 'n stadsbuurt van Bad Godesberg ontdek is, dateer uit die Paleolitikum (Ou Steentydperk), omstreeks 50 000 v.C.[3]
Menslike oorskot, wat in die sogenaamde Dubbelgraf van Oberkassel opgegrawe is, is ongeveer 14 000 jaar oud en van die oudstes wat met die moderne mens (Homo sapiens) verbind word. Naas die geraamtes van 'n sowat 50-jarige man en 'n 20- tot 25-jarige vrou is dele van die geraamte van 'n hond en versierings ontdek.[4]
Romeinse tydperk
[wysig | wysig bron]In 12 v.C. vestig die Romeine hier onder Drusus die Classis Germanica, hulle vloot vir die Germaanse kusgebied.[5] Ná die nederlaag van die Romeinse veldheer Varus in die slag teen Germaanse krygers onder die bevel van Arminius in 9 n.C. word die stad, wat destyds Bonna genoem is, as 'n militêre voorpos vir die grens met Germanië uitgebou. In die noorde van die huidige Bonn was 'n Romeinse legioen gestasioneer. Handelaars en ambagsmanne het hulle vinnig digby die voorpos gevestig.
![](http://upload.wikimedia.org/wikipedia/commons/thumb/0/03/Post_Tower_Sch%C3%BCrmann-Bau.jpg/250px-Post_Tower_Sch%C3%BCrmann-Bau.jpg)
![](http://upload.wikimedia.org/wikipedia/commons/thumb/d/d7/Beethoven_monument_bonn_muensterplatz_2008.jpg/220px-Beethoven_monument_bonn_muensterplatz_2008.jpg)
Met die ondergang van die Romeinse Ryk in die 5de eeu begin Bonn ook agteruitgaan. In die Frankiese tydperk en veral in die 9de en 10de eeu ontwikkel Bonn tot 'n geestelike sentrum, met die Villa Basilika as sy middelpunt. In die gebied van die huidige mark het 'n Middeleeuse markdorp ontstaan.
Ná hulle neerlaag in die slag naby Worringen in die jaar 1288 het die Keulense Keurvorste Bonn naas Brühl en Poppelsdorf as een van hulle woonplekke gekies. Uiteindelik het Bonn ook hulle hoofsetel geword. Tydens die 17de en 18de eeu het die Keurvoorste 'n aantal pragtige geboue in die barok-styl in Bonn laat opgerig.
In 1794 is Bonn deur Franse troepe beset en in 1815, ná Napoléon Bonaparte se neerlaag, by die Koninkryk Pruise ingelyf. Die stad het in die 19de eeu veral danksy die plaaslike universiteit, wat teen die einde van die 18de eeu gestig en in 1818 heropen is, bekendheid verwerf.
Ná die Eerste Wêreldoorlog is Bonn eers deur Britse en daarna tot by die jaar 1926 deur Franse troepe beset. Tydens die Tweede Wêreldoorlog is groot dele van Bonn deur geallieerde bomaanvalle verwoes.
Die besluit om van Bonn, eerder as van Frankfurt am Main, die voorlopige hoofstad van die nuut gestigte Bondsrepubliek Duitsland te maak, is op 3 November 1949 geneem en het tot 'n opbloei in die stad gelei.
Verwysings
[wysig | wysig bron]- ↑ "Information und Technik Nordrhein-Westfalen: Einwohnerzahlen im Regierungsbezirk Köln. Besoek op 30 Maart 2018". Geargiveer vanaf die oorspronklike op 25 Junie 2018. Besoek op 30 Maart 2018.
- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ "Stadt Bonn | Portal Rheinische Geschichte. Besoek op 7 Mei 2020". Geargiveer vanaf die oorspronklike op 27 Junie 2020. Besoek op 7 Mei 2020.
- ↑ Bodo Harenberg (red.); Karl Gutzmer et al.: Chronik der Stadt Bonn. Dortmund: Chronik-Verlag 1988, bl. 9
- ↑ The Navies of Rome, Michael Pitassi, Boydell & Brewer, 2010, ISBN 1-84383-600-9, ISBN 978-1-84383-600-1
Eksterne skakels
[wysig | wysig bron]![]() |
Wikimedia Commons bevat media in verband met Bonn. |
- Die amptelike webwerf van Bonn Geargiveer 30 Augustus 2006 op Wayback Machine