Meermin

Skildery van 'n Meermin, deur John William Waterhouse.

'n Meermin is 'n mitologiese waterwese met die bokant van 'n vrou, maar met die stert van 'n vis in plaas van bene. Daar word selde van die manlike teenpool, die meerman, gehoor.

Meerminne kom in die verhale van verskeie volkere reg oor die wêreld voor, insluitende die Nabye Ooste, Europa, en Asië. Die eerste stories verskyn in antieke Assirië, waar die godin Atargatis haarself in 'n ​​meermin verander uit skaamte omdat sy per ongeluk haar menslike minnaar vermoor het.

Meerminne word soms uitgebeeld as gevaarlike wesens wat verband hou met vloede, storms, skeepswrakke en verdrinking. In ander stories (soms binne dieselfde kultuur) is hulle welwillende wesens wat gunste uitdeel en selfs op mense verlief kan raak.