تعالوا نفهم النهاردة كل حاجة بالتفصيل عن المدى اللي بيكون مذكور للعربيات الكهرباء وليه بتلاقيه مش دايما واقعي..؟ السبب في الفرق اللي بتشوفه في المدى ده هو اختلاف أنظمة اختبار مدى السيارات الكهربائية في الصين عن أوروبا عن امريكا عن الامارات. في الصين، يستخدموا نظام اختبار اسمه CLTC (China Light-Duty Vehicle Test Cycle)، وفي الإمارات، يستخدموا نظام WLTP (Worldwide Harmonized Light Vehicles Test Procedure). وده شرح الفرق بينهم بطريقة مبسطة: CLTC (China Light-Duty Vehicle Test Cycle): النظام ده مخصص للسوق الصيني و بيركز أكتر على ظروف القيادة في المدن، زي الوقوف والانطلاق المتكرر. السرعات: السرعات بتتراوح من صفر صفر لـ ٩٠ كم/ساعة، مع التركيز على التوقفات المتكررة والانطلاق، اللي بتمثل ظروف القيادة داخل المدينة. مدة الاختبار: بتكون حوالي ٣٠ دقيقة. المدى المحسوب: غالبًا بيكون أعلى لأن الاختبار بيركز أكتر على القيادة في المدن، اللي بتستهلك طاقة أقل من القيادة على الطرق السريعة وفي ظروف مناخية معتدلة. WLTP (Worldwide Harmonized Light Vehicles Test Procedure): و ده نظام عالمي بيستخدم في دول كتير، بما فيها الإمارات، وبيركز على ظروف قيادة متنوعة تشمل المدن والطرق السريعة والطرق العادية. - السرعات بتتراوح من صفر لـ ١٣٠ كم/ساعة، مع تقسيم الدورة لأربع مراحل تشمل القيادة جوه المدينة، في الضواحي، على الطرق الريفية، وعلى الطرق السريعة. - السرعة المتوسطة العامة خلال دورة اختبار WLTP ٤٦ كم/ساعة. - المدى المحسوب: بيكون أقل شويه لأنه بيغطي ظروف قيادة متنوعة بتشمل القيادة على الطرق السريعة اللي بتستهلك طاقة أكتر. السبب في الفرق: السبب إن CLTC بيركز أكتر على ظروف القيادة في المدن، اللي بتستهلك طاقة أقل من القيادة على الطرق السريعة. عشان كده، المدى اللي بيظهر في الموقع الصيني بيكون أكبر من المدى اللي بيظهر في الموقع الإماراتي (لتسلا مثلاً) او غيره اللي بيستخدم نظام WLTP. نيجي بقى للنظام الأمريكي واللي شايفه احسن حاجة وأقرب حاجة لينا تحسب عليها.. EPA (Environmental Protection Agency) - الولايات المتحدة (للمقارنة): - القيادة داخل المدينة بتوصل لحد ٩٠ كم/ساعة. - القيادة على الطرق السريعة بتتراوح ٨٠-١٠٠ كم/س. - السرعة المتوسطة في الاختبار المجمع حوالي ٨٠ كم/ساعة على الطرق السريعة وأقل في المدينة. - المدى المحسوب: يعتبر محافظ وأقرب للمدى الفعلي اللي بيختبره السائقين في الحياة اليومية وعندنا في مصر. نيجي بقى للنظام الأوروبي القديم وكان برده مبالغ فيه نفس النظام الصيني و تم إلغاءه لانه غير منطقي. NEDC (New European Driving Cycle) - القيادة داخل المدينة كانت بتتراوح من صفر لـ ٥٠ كم/ساعة. - القيادة خارج المدينة بتوصل لحد ١٢٠ كم/ساعة. - السرعة المتوسطة العامة حوالي ٣٤ كم/ساعة، وهي أقل بكتير من السرعات الحقيقية. - المدى المحسوب: بيكون مبالغ فيه وغير دقيق مقارنة بظروف القيادة الحقيقية. نيجي بقى لحاجات تانية إضافية بتأثر: - تشغيل التكيف: تقريباً من ٥-١٠٪ من اجمالي الرينج اللي هتاخده (يعتبر غير مؤثر اوي) - درجات حرارة الجو الغير اعتيادية: الحر الشديد او البرد الشديد وتقريباً من ١٠-١٥٪ وده في الظروف الصعبة اوي يعني مش العادي. #electricvegicles #electriccars #electrified
