【Viu】人氣女團Lolly Talk年初喺社交平台成立Lolly Talk Vision（LTV），以踢爆團員黑材料為任務，首個暗黑星團企劃，率先派出MeiMei、Ahyo上陣，帶嚟一場拳腳決鬥，「打MEIYO」擂台對決！

MeiMei同Ahyo為咗呢次拳賽，早喺半年前已開始特訓，仲請嚟香港散打運動員及業餘比賽冠軍擔任教練，親自指導兩位妹豬操練拳腳功夫，同時亦有健身教練同佢哋進行體能訓練，並嚴格執行飲食控制，呢單嘢真係唔係講笑！

其餘六位成員指MeiMei、Ahyo今次係搏到盡，放低姊妹情、衝破心理障礙「互打」！再追加踢爆平時甚少做運動嘅MeiMei竟然主動跑步、操體能，Ahyo更係即場大曬結實腹肌，豪言：「我要打低MeiMei！」望奪「打MEIYO」金腰帶！

見MeiMei、Ahyo喺3 round拳賽入面，兩位妹豬出盡食奶嘅氣力真打，埋身激戰超激烈！最終MeiMei得分較多穫勝，宣布賽果後雙方激動落淚，再嚟個友誼抱抱，喺呢個時候其他LT成員齊齊衝上台緊抱，場面感動又熱血！

賽後MeiMei笑指真係會打到腳軟，由完全唔識打拳去到練，過程中好苛刻、好辛苦：「真係會黐線！」又指終於感受到做運動員嘅辛苦，多謝Ahyo、妹妹、媽咪、LT成員嘅支持！至於落敗嘅Ahyo就喊到收唔到聲，邊喊邊話喺呢半年最大改變係心態成熟咗、堅強咗，冇以前咁軟弱：「LT入面個個都好錫我哋，都知道我哋練拳好辛苦，多謝家姐同媽咪今日都嚟支持我！」最後LT同全場波板糖大合唱新歌《數到十》，為拳賽畫上圓滿句點！