«Oıjumbaq 2» anımasııalyq fılminiń basty keıipkeri Raılıdi bloger Aqerke Estaıqyzy, ánshi ári aktrısa Gúlnar Tilebaldy, kıno, teatr jáne dýblıaj aktrısasy Alma Qylmuqan, kıno jáne teatr akteri, rejısser Rústem Janyamanov dybystaǵan. «Ninety One» boı-bendiniń solısteri – Azamat Ashmaqyn men Batyrhan Málikov, dýblıaj rejısseri Shah-Murat Ordabaev ta jobaǵa úles qosty.
«Disney» stýdııasynyń bastamasyna qoldaý bildirgen Mádenıet jáne aqparat mınıstrligi men Halyqaralyq «Qazaq tili» qoǵamy bul qadam kontent jasaýshylarǵa úlgi bolarlyq is ekenin aıtty.
«Jyl saıyn «Disney» kompanııasy fılmniń túrli tilderdegi 30-ǵa jýyq nusqasyn usynady. Qazaq tiliniń osyndaı iri tilder qataryna qosylýy – biz úshin mańyzdy oqıǵa. Bul – qazaq tilinde erkin sóıleıtin ortaǵa da, tildi úırenýshilerge de paıdaly, ári qýanyshty oqıǵa. Qazaqsha dýblıaj salasy keıingi jyldary jańa deńgeıge kóterilip keledi. Máselen, «Oıjumbaq 2» fılminiń dýblıajynda qazaq tiliniń qoldanys aıasyn, ásirese balalar arasynda sırek qoldanylatyn tól leksıkany ornyqtyrýǵa jol ashatyn mysaldar kóp. Ana tilimizdiń órisin balanyń súıikti keıipkerleri arqyly keńeıtý – óte utymdy tásil. Fılmdi kórgen ár baldyrǵan jańa sóz úırenip, ony qoldana alsa, jaqsy emes pe? Mundaı bastamany qoldap, ózgelerge mysal retinde taratýymyz kerek», dedi Mádenıet jáne aqparat mınıstri Aıda Balaeva.
«Fılmderdi ártúrli elderge beıimdep, dýblıajdaý – «Disney» kompanııasyndaǵy kontent ázirleý jumysynyń ajyramas bóligi ári burynnan qalyptasqan úrdisi. Sol sebepti «Disney Character Voices International» ujymy ár fılmniń túrli tilderge aýdarylǵan 30-ǵa jýyq nusqasyn ázirleıdi. Olardyń árqaısysyndaǵy keıipkerlerdiń biregeı beınesin saqtaı otyryp, ony kórermenderge «jaqyn» ári túsinikti etip aýdaratyn, dýblıajdaıtyn daryndy shyǵarmashylyq keńesshiler men tehnıkalyq mamandar toby jumyldyrylady, deıdi Ortalyq jáne Shyǵys Eýropa, TMD elderi, Grýzııa jáne Mońǵolııadaǵy «Disney» kompanııasynyń bas dırektory Kahaber Abashıdze.
«Disney» fılmderiniń elimizdegi resmı dıstrıbıýtory, «Meloman» kompanııasynyń bas dırektory Vadım Golenko: «Elimizdiń kórermeni memlekettik tilde kórsetiletin «Disney» premeralaryn qashanda erekshe yqylaspen qarsy alady. Bul dástúr 2024 jyly da jalǵasyn tappaq. Úlken ekrandardan qazaq tilinde kórsetilgen «Moana», «Kólikter 3», «Kokonyń qupııasy», «Arystan patsha» (2019) fılmderiniń qatary jańa týyndylarmen tolyǵady. Qazaq tilinde erkin sóıleıtinderge de, tildi endi úırenip júrgenderge de sapaly dýblıajdalǵan fılmder paıdaly bolary anyq», – deıdi ol.
«Oıjumbaq 2» fılmi kınoteatrlarda 14 maýsymnan bastap kórsetiledi. Al «Moana 2» anımasııalyq shytyrman oqıǵasyn qarasha aıynan bastap tamashalaı alamyz. Úshinshi týyndy – «Mýfasa: Arystan patsha» kórkem fılmi Mýfasanyń balalyq jáne jastyq shaǵyn, baýyry Shrammen aradaǵy óshpendiliktiń túpki tarıhyn baıandaıdy.
«Halyqaralyq «Qazaq tili» qoǵamynyń negizgi jumys baǵyty «Disney» kompanııasynyń ustanymymen úndes keledi. Bizdiń uıym memlekettik tildegi kontent qoryn, atap aıtqanda, bala tilin qazaqsha shyǵarýǵa qajet quraldardan bastap, ár adamnyń qazaq tili aıasynda tulǵa ári maman bolyp qalyptasýyna kerek mazmun qoryn arttyrýǵa basymdyq beredi. Álemdik anımasııa jaýharlary, qazaq tilindegi kınoprokat baǵytyndaǵy kontentti qazaq tiline aýdarý bastamasyn barynsha qoldaımyz. «Disney» kompanııasynyń bul bastamasy ózge de kontent óndirýshilerge óte jaqsy úlgi dep sanaımyz», deıdi Halyqaralyq «Qazaq tili» qoǵamynyń prezıdenti Raýan Kenjehanuly.
