蔣世豪
蔣世豪 | |
---|---|
出生日 | 1975年8月27號 ![]() |
出生地 | 香港 ![]() |
死亡日 | 2011年4月22號 ![]() |
死亡地 | 天水圍 ![]() |
死因 | 仆親 ![]() |
國籍 | 香港 ![]() |
母校 | 聖文德書院 ![]() |
職業 | 足球員 ![]() |
[改維基數據] | |
蔣世豪(1975年8月27號—2011年4月22號)係一個香港足球員,綽號「豪豬」,司職中場指揮官,譽為係香港足球代表隊1990年代至2000年代最叻嘅中場指揮官之一。
球員生涯
[編輯]1993年喺英國踢嘅高菲亞盃青年足球賽,當時只得18歲嘅蔣世豪,幫香港足球代表隊青年軍踢,開賽2.8秒鐘就入波,做出咗當時最快入波嘅世界紀錄,重喺1993香港傑出運動員選舉獲選做「傑出青少年運動員」。
做出呢個紀錄之後,1994年,蔣世豪得19歲就幫南華足球隊喺香港甲組足球聯賽賽事上陣,但係因為覺得好難承受嚟自球迷嘅壓力,加上佢本人對足球事業並唔感到樂觀,所以喺1995年毅然退出球壇。後來佢去咗澳門發展佢嘅電腦事業,得到屋企人同埋球迷嘅支持,大半年之後先至重返球場加盟發景體育會,1996年轉投愉園體育會。
2007年初,蔣世豪因為「城門谷事件」對代表香港足球代表隊感到心灰意冷,決定唔踢香港足球代表隊。雖然有好多足球界人士,包括球會高層、球員同埋球迷提出挽留,但係佢心意已決。當時香港足球代表隊教練黎新祥表示暫時未有蔣世豪嘅接班人,而蔣世豪就話朱兆基同埋盧均宜都有潛質。
2007年踢嘅世界盃亞洲區外圍賽,因為蔣世豪嘅恩師黎新祥教練得到邀請,復出執教香港足球代表隊,所以蔣世豪都復出踢多兩場國際賽去多謝恩師嘅提攜。喺第一圈嘅兩場比賽中,蔣世豪都被委任做隊長。喺第一回合幫香港足球代表隊以3-2喺印尼中立場打敗東帝汶,喺第二回合喺主場幫香港足球代表隊以8-1大勝東帝汶晉級第二圈賽事。喺嗰場比賽入便,佢都有一個入波同埋兩個助攻。不過,呢次亦都係佢最後一次代表香港足球代表隊出賽。
蔣世豪喺2008年7月25號宣佈結束職業足球生涯,但係又轉會嗰陣時啱啱攞到升上香港乙組足球聯賽資格嘅永義足球隊,繼續享受足球。
死
[編輯]蔣世豪喺2011年4月22號朝早同老婆因為錢同埋感情發生爭執之後,喺天水圍屋企跳樓過身,享年35歲[1][2][3][4][5][6][7]。
個人榮譽
[編輯]- 香港足球明星選舉 最佳十一人 5次(1999-00、2000-01、2003-04、2004-05、2005-06季度)
- 香港傑出運動員 傑出青少年運動員 1次(1993年)
攷
[編輯]- ↑ 前港隊隊長蔣世豪墮樓亡,明報,2011年4月22號 11:30
- ↑ 〈前足球名將蔣世豪墮樓身亡,on.cc東方互動,2011年4月22號 11:31〉. 原著喺2020年3月28號歸檔. 喺2011年4月22號搵到.
- ↑ 前足球先生蔣世豪墮樓亡 (港聞),星島日報,2011年4月22號 11:38[失咗效嘅鏈]
- ↑ 〈前港隊隊長蔣世豪天水圍墮樓死亡,商業電台,2011年4月22號 12:19〉. 原著喺2016年3月5號歸檔. 喺2011年4月22號搵到.
- ↑ 前港隊隊長自殺身亡,Goal.com,2011年4月22號 12:25[失咗效嘅鏈]
- ↑ 蔣世豪墮樓亡隊友感震驚,頭條日報,2011年4月22號 13:22
- ↑ 港足前隊長蔣世豪墜樓身亡,大公報,2011年4月22號[失咗效嘅鏈]