南斯拉夫
閱讀設定
![](http://upload.wikimedia.org/wikipedia/commons/thumb/6/6c/Yugoslavia_location_map.svg/300px-Yugoslavia_location_map.svg.png)
南斯拉夫(Jugoslavija)係歐洲巴爾幹半島一個已經冇咗嘅國家,首都喺貝爾格萊德。
史
[編輯]1918年12月1號由塞爾維亞王國國王彼得一世宣布成立。初時係叫塞爾維亞人、克羅地亞人、斯洛文尼亞人王國,1929年10月3號,國王亞歷山大一世將國名改做南斯拉夫王國。
第二次世界大戰期間嘅1941年4月6號,軸心國侵略南斯拉夫,佔領晒全境,國王同王室家族走佬去外國。南斯拉夫即刻畀鄰國分咗,匈牙利同保加利亞佔領一啲邊境地區,而克羅地亞獨立國成立,新成立嘅塞爾維亞救國政府就統治剩返嘅領土。
到1945年,德國撤出南斯拉夫。但係南斯拉夫响嗰年11月廢君主制,宣布成立共產黨政府,南斯拉夫再唔係王國。1946年1月31號,南斯拉夫組成南斯拉夫人民聯邦共和國(Federativna Narodna Republika Jugoslavija, FNRJ),1963年又改名做南斯拉夫社會主義聯邦共和國(Socijalistička Federativna Republika Jugoslavija, SFRJ)。
1991年到1992年,南斯拉夫分裂,斯洛文尼亞、克羅地亞、波斯尼亞黑塞哥維那同埋馬其頓共和國先後獨立。最後塞爾維亞同埋黑山兩個加盟國組成南斯拉夫聯盟共和國,2003年又改名做塞爾維亞黑山(簡稱「塞黑」)。2006年黑山獨立,南斯拉夫正式玩完。
多樣性
[編輯]南斯拉夫一向有「一個國家、兩種文字、三種語言、四種宗教、五個民族、六個共和國、七個鄰國、八個政治區」嘅形容,包括:
- 一個國家──南斯拉夫社會主義聯邦共和國
- 兩種文字──拉丁字母同埋基里爾字母
- 三種官方語言──塞爾維亞-克羅地亞文、斯洛文尼亞文同埋馬其頓文
- 四種主要宗教──天主教、基督新教、東正教同埋伊斯蘭教
- 五大族裔──塞爾維亞人、克羅地亞人、斯洛文尼亞人、馬其頓人同埋黑山人
- 六個加盟共和國──塞爾維亞、克羅地亞、斯洛文尼亞、馬其頓、黑山同埋波斯尼亞黑塞哥維那
- 七個鄰國──阿爾巴尼亞、希臘、保加利亞、羅馬尼亞、匈牙利、奧地利同埋意大利
- 八個政治區──塞爾維亞、克羅地亞、斯洛文尼亞、北馬其頓、黑山、波斯尼亞、科索沃自治省、禾獲甸拿自治省
![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)
維基同享有多媒體嘅嘢: