廣州廣播電視台

  提示：呢篇文講嘅唔係澳廣視。

  「GZTV」跳轉到呢度。想搵另一間簡稱做「GZTV」嘅電視台，請睇「貴州廣播電視台」。

  廣東廣播電視台喺1959年～1979年嗌過廣州電視台。

廣州廣播電視台

Guangzhou Broadcasting Network
開檔	1988年1月10號
總部地址	中國廣東廣州 越秀區環市中路231號 （內環路北邊嘅花果山上邊） 海珠區藝苑路229號 （廣州塔南邊嘅媒體港附近）
產業	傳媒
網址	WWW.GZTV.com

 廣州廣播電視台（粵拼：gwong2 zau1 gwong2 bo3 din6 si6 toi4） ，簡稱廣州台（gwong2 zau1 toi4）或廣視（gwong2 si6）或GZBN，係中國廣東省廣州市嘅市級廣播電視台同電台，係廣州市人民政府屬下嘅電視台，喺1988年1月10號啟播。佢既係中國大陸入面，可以喺大部分嘅廣播時間入面用地方語言嘅廣播電視台同電台，又係廣州有線電視嘅實際控制機構。電視台重有廣州市微波總站、廣州市音像資料館同《南方聲屏報》嘅下屬單位響度。位置喺越秀區環市中路嘅花果山上邊。廣播範圍覆蓋成個廣州同其它周邊地區。

2001年7月27號，廣州電視台同廣州有線廣播電視台合併，變成廣州電視台。2004年，經營總收入已經超過咗6億蚊人民幣。新總部喺2013年12月31號正式開檔，位置喺海珠區藝苑路229號。

佢嘅主發射站喺越秀區環市中嘅花果山上，另外喺花都、摩星嶺、帽峯山頂、黃山魯、蕉石嶺、長洲、黃埔、從化、番禺、白雲區都有好幾個發射站。

頻道

• 廣州電視台綜合頻道
• 廣州電視台新聞頻道
• 廣州電視台影視頻道
• 廣州電視台法治頻道
• 廣州電視台競賽頻道
• 廣州電視台南國都市4K頻道
• 廣州電視台移動頻道
• 廣州電視台共享課堂頻道

冇咗嘅頻道

• 廣州電視台生活頻道
• 廣州電視台少兒頻道
• 廣州電視台購物頻道
• 廣州電視台數字宣傳／精品欣賞頻道
• 廣州電視台花城頻道／花城頻道

介紹

廣州廣播電視台播緊嘅節目係每日8個半鐘度，其中：

• 無線電視：平均每日6個半鐘，播出18個鐘。
• 有線電視：平均每日2個鐘，播出72個鐘。

佢嘅無線電視節目入面，個收視已經超過咗30,000,000人嚟睇，而且係覆蓋咗成個廣州同珠三角嘅大部分地區，而佢嘅收視都喺廣州本地嘅排行都幾高下。而喺有線電視節目入面，佢係覆蓋咗廣州嘅8個老城區、重有番禺同花都嘅大部分地區、同埋從化同增城嘅少數地區。

大事

1988年

• 1988年1月10號：廣州電視台正式啟播。
• 1988年4月9號：電視台總編室重組織咗電視台嘅第一次觀眾調查。最後根據調查出嚟嘅統計結果，個電視台嘅收視到咗本地嘅第二位。
• 1988年4月15號：《廣州電視週報》開刊。
• 1988年5月：舉辦咗《廣州地區青年電視廣告模特大獎賽》嘅準決賽同總決賽，揀出嚟嘅15個男女MODEL都簽咗同電視台合作嘅上任書。
• 1988年7月5號：電視台第一次成功直播。

1989年

• 1989年2月2號：總編室同珠江經濟電台一齊，喺廣州體育館度辦《民歌回顧》晚會，電視台第一次用咗電視轉播車嚟影嘢。
• 1989年2月28號：電視小品《順意坊》開拍。《屏幕之友》4月13日出版試刊號：5月4日創刊發行。
• 1989年4月21號：電視台影嘅《商界》呢部電視連續劇，重攞咗國內電視劇入面嘅最高獎項——「飛天獎」長篇電視連續劇嘅二等獎。
• 1989年5月23號：廣州電視台同法國里昂電視台簽咗交換節目合約；
• 1989年7月14號：電視台第一次現場直播《第十屆廣州市運動會開幕式》嘅體育節目。
• 1989年9月29號：同日本福岡RKB放送株式會社簽咗友好交流合作協議書。
• 1989年12月27號：由廣州電視台舉辦嘅第12屆廣告聯播年會喺廣州賓館入面舉辦。

1990年

• 1990年10月1號：新聞部主持開咗第一屆城市電視新聞協作體嘅年會。
• 1990年10月28號：電視台喺友誼劇院入面辦咗第2屆「美在花城廣告模特新星大賽」。
• 1990年12月10號：喺廣州賓館入面辦咗中國城市電視節目研討會。

1991年

• 喺1991年之前：廣州台係重冇佢自己嘅發射塔，搞到節目嘅接收效果都冇咁好，重有廣州人邊間屋企嘅屋頂都棟住去香港嘅魚骨天線，而嗰陣嘅廣州台冇咩影響力。而1991年春節之前播嘅第一部自己整嘅劇集——《外來妹》，重用緊個BB機嘅Call台發射塔，播咗之後都冇咩人睇，同中央台播嗰陣嘅收視率都差咗好遠。
• 1991年1月1號：新起嘅電視塔同廣州電視彩電播出中心開咗。
• 1991年5月1號：啟播《城市話題》欄目。
• 1991年5月11號：同中央電視台現場直播第25期嘅《綜藝大觀》節目。
• 1991年9月4號：廣東省新聞出版局同意《屏幕之友》改成報紙嚟出版。
• 1991年12月2號——4號：辦咗全國市內電視劇研討會。

1992年

1992年，廣州電視台屬下嘅16頻道轉播CCTV-2嘅畫面

• 1992年7月，電視台開始舉辦穗台盃青年歌手大賽。
• 1992年10月1號：廣州電視台屬下嘅16頻道（而家係新聞頻道）啟播，佢轉播咗CCTV-2。

1993年

• 1993年1月10號：廣州電視台喺文化公園入面舉行咗成立五周年嘅大會。
• 1993年4月13號：中共廣州市委同廣州市人民政府批准重成立咗廣州市有線電視管理委員會，重辦咗廣州市有線廣播電視台，嗰年重起咗廣州廣播有線網路公司。
• 1993年8月18號：《廣州早晨》啟播。

1994年

• 1994年1月1號：廣州有線電視體育頻道正式開播。
• 1994年10月20號：全面推行內部體制改革。改革方針係：強化一頭，放開一片：強化新聞輿論嘅管理，放開綜藝節目嘅經營，節目部門要實行企業化嘅管理。
• 1994年12月16號：公佈廣州電視台係點分配住房法，而方案入面話到喺點樣分三元里入面嘅80套住房職工宿舍。

1995年

• 從1995年10月8號開始，《廣州電視新聞》開始搞全程直播。
• 1995年底：成立咗廣州有線廣播電視台。

1996年

• 1996年1月6號——7號，電視台8週年台慶對外開放日。佢重組織咗全市登塔比賽同台內拔河比賽。
• 1996年11月8號：電視台入面通報重表揚咗《中華民族風情錄》攝製組攞咗第2屆少數民族題材電視藝術嘅駿馬獎。

1997年

• 1997年1月10號：電視台舉辦咗9週年嘅台慶活動。
• 1997年6月1號，電視台少兒部重組織咗穗港電視嘅工作人嚟慶祝六一大型細路哥活動同香港回歸，佢重整咗好多香港回歸嘅直播節目。
• 1997年7月12號，廣州樂邦利電視直銷連鎖店（已經破咗產）總舖喺天秀大廈1樓度開張。
• 1997年8月26號——29日，電視台廣告部辦咗「97中國廣告節」嘅活動。

1998年

• 1998年1月8號：台工會舉辦咗電視台成立10周年嘅回顧攝影展。
• 1988年1月10號，舉辦公眾開放日活動，嗰晚黑重辦咗10周年嘅台慶晚會。
• 1998年6月3號——5號：電視台辦嘅「98中國電視節目交易會」喺廣州出口商品交易會度舉行。
• 1998年10月13號——14號：電視台廣告部辦咗「第45屆嘎納廣告節同98亞太廣告節獲獎作品廣州巡迴展」。

1999年

• 1999年10月30號：喺中山紀念堂入面辦咗第7屆美在花城廣告新星大賽准決賽。

2000年

• 2000年1月7號：廣州電視台响中天廣場（依家係中信廣場）度辦咗「網上賀台慶，邁向新千年——台慶網路SHOW」嘅大型戶外活動。
• 2000年1月10號：廣州電視台成立12周年嘅台慶，用咗波形嘅新台徽，而呢個新台徽講嘅係廣州電視台喺21世紀嗰陣嘅國際定位，啫係話廣州電視台會去重犀利嘅嘢去發展。
• 2000年2月5號：電視台現場直播廣州市委、市政府辦嘅「新千年騰龍舞珠江」嘅大型水上燈火匯演。
• 2000年7月16號：北京廣播學院黃升民教授等5個人嚟咗廣州電視台度睇下，重論證下可唔可以成立廣州廣電集團。喺嗰日重開播咗《中國城市報導》節目。
• 2000年8月7號——13號：廣州市人民政府新聞辦公室同電視台响英國倫敦度辦咗廣州情況介紹會暨廣州電視周啟播儀式。
• 2000年12月22號：電視台原創電視劇《紫荊勳章》喺北京度實現首播。
• 2000年12月28號：廣州電視台嘅SNG新聞衛星直播車可以用得。

2001年

• 2001年3月5號：喺嗰陣時呢個台轉播緊朱鎔基總理嘅政府工作報告就出現咗「前法輪功練習者」嘅字幕，雖然話呢個凈係持續咗秒幾，但係就搞到中共高層都驚埋。而呢單嘢就係廣州電視台嘅「3•5」重大政治事故。後嚟經過調查，原嚟係電視台新聞部嘅技術人員唔小心㩒錯掣，搞到字幕出錯。後嚟同呢單案有關嘅工作人員都炒嗮，而台長同新聞部主任都降埋職。
• 2001年3月22號晚黑，由廣州市廣告協會同廣州電視台一齊辦嘅第一屆羊城十大電視廣告頒獎典禮喺廣州友誼劇院入面舉辦。
• 2001年7月27號：廣州市機構編制委員會發咗篇嘢，批准咗廣州電視台同廣州有線廣播電視台一齊合併，之後改名嗌廣州市電視台（播出嗰陣重嗌「廣州電視台」嘅名），之後廣州有線重改名嗌廣州市廣播電視網絡有限公司，之前有線電視嘅「廣州有線電視XX頻道」冚唪唥都改嗮名嗌「廣州電視台XX頻道」。
• 為咗宣傳同迎接喺廣州市辦嘅第九屆全國運動會，電視台喺2001年8月24號開始搞咗個《走近九運》嘅系列專題片。
• 2001年9月22號晚黑：廣州電視台响天河體育中心入面辦「做好九運東道主嘅千場論壇啟動儀式」嘅活動。
• 2001年10月13號：廣州電視台喺天河體育廣場度辦「為九運加油——迎九運大型廣場文藝活動」重同時搞咗現場直播，重刷新咗廣東省戶外直播紀錄。
• 2001年11月11號：播咗《相約九運——廣州電視台13個鐘大型直播節目》創咗電視台嘅收視紀錄。

2002年

• 2002年1月24號：廣州台文藝部成功舉辦咗第一屆演藝新星大賽。其中，嚟自廣西嘅姑娘——黃潔憑就攞咗呢屆總冠軍。

而呢個台有濃厚嘅廣州特色情景短劇《開心廿四味》啟播，而呢部劇係為咗同珠江台嘅短片——《外來媳婦本地郎》爭收視率。

• 2002年3月，《府前廣場》同《講法講規》欄目一齊合埋嗌《廣州政務之窗》，而呢個節目唔單止俾廣州市政府同黨委睺實嗮，重俾好多市民都嚟關注都有。喺嗰陣時，廣州地區嘅其它台入面都重未有噉嘅黨政類欄目。
• 為咗迎接黨嘅十六大召開，呢個台重整咗啲節目畀十六大嘅，其中就整咗呢兩部大型紀錄片——《母親河》同《家在珠江》。
• 為咗實現江澤民總書記嘅三個代表重要思想同七一講話，喺2002年7月2號：台黨委喺600㎡嘅演播大廳入面辦咗個新黨員宣誓大會同黨嘅知識競賽活動。
• 2002年7月，呢個台重一次性收咗60位大學生嘅人才嚟提高咗成個台嘅隊伍素質。而嗰陣時嘅台長——李錦源同電視台嘅代表團重訪問咗韓國嘅光州電視台，重簽署咗《友好合作備忘錄》，呢個台同光州電視台一齊搞咗個友好電視台出嚟。
• 2002年9月，電視台出版嘅周刊——《新廣視》雜誌重參加咗廣州市新聞出版同廣播電視局、重有廣州市出版業協會一齊辦嘅穗版內部資料評優活動，重攞咗廣州市十佳內部資料獎。
• 2002年11月初葉，廣州電視台負責起咗間嘅廣西嘅百色電視台。
• 2002年11月14號：廣州市委常委、市委宣傳部長陳建華同志嚟咗呢個台同廣州電台睇過下，重鼓勵埋兩個台嘅幹部職工。
• 2002年12月、廣州電視台嘅比較出名嘅節目——《美在花城廣告新星大賽》已經辦到第10屆。

2003年

• 2003年1月10號：喺廣州電視台成立15周年嘅大會入面重推出咗一系列嘅台慶活動，重舉辦咗城市電視台嘅高層座談會。
• 2003年3月1號：廣州數字電視正式啟播。
• 2003年5月，廣州數字電視啟播重畀國家廣電總局批准同支持咗，廣州重列埋中國有線數字電視入面，第一批嘅試點城市，廣州有線電視網重指明咗話係廣州市數字電視嘅示範網。
• 2003年11月6號：廣州電視台網站——廣視網正式開通，廣視網有國家廣電總局頒發嘅網路視頻視聽業務許可證，廣視網入面嘅視頻都轉播到好多個廣州電視台嘅節目（除咗移動台之外）。

2004年

• 2004年5月10號：新聞頻道嘅《新聞日日睇》節目播咗三個月之後，第一次突破1點嘅收視，而呢個欄目重改咗點解廣州地區冇新聞時評類嘅節目。
• 2004年11月29號：《新聞日日睇》欄目突破咗6點嘅平均收視，而最高峰就去到7點幾。

2005年

• 2005年3月6號：廣州少兒頻道正式改版。改版之後嘅少兒頻道都係畀未入學嘅細路同小學生嘅人睇，而內容就係強調點攞知識、重有提高能力同創新意識。
• 2005年3月28號：之前嘅「廣州生活頻道」改咗名嗌「廣州英語頻道」。

2006年

2006年1月2號：之前嘅廣州十六頻道改咗嗌廣州新聞頻道。

2007年

廣州市廣播電視網絡有限公司就改咗名嗌廣州珠江數碼集團有限公司，簡單可以講廣數傳媒珠江數碼，到咗2011年就冇用到「廣數傳媒」嘅嗌法，凈係嗌「珠江數碼」四個字，不過市民重係習慣嗌佢係「廣州有線」。

2008年

• 2008年8月1號：廣州電視台綜合頻道、新聞頻道、競賽頻道都喺茂名嗰邊通過有線電視可以睇到喇。
• 2008年9月，競賽頻道中咗2010廣州亞運會嘅主播機構。

2009年

• 喺年初，經濟頻道改咗用普通話播之後，收視率出現咗極速下降。雖然話嗰陣綜合頻道嘅《午間新聞》重係用緊普通話嚟播嘅，但係由於太低收視率，所以喺2010年1月改返用粵語播。
• 2009年2月24號：廣州電視台嘅綜合頻道同新聞頻道都喺佛山度通過有線電視都可以睇到喇。
• 2009年10月11號晚黑，廣州台就試下將頻道嘅名冚唪唥都改返同香港、台灣差唔多嘅名，啫係「廣州電視XX台」嚟畀下廣州市民嘅口語習慣，但係無耐就還原咗。之前喺20世紀90年代嘅廣東電視台珠江頻道、重有衛星頻道播過嘅珠江台同嶺南台都改嗮「XX頻道」嘅名。

2010年

睇埋：廣州撐粵語行動

• 2010年6月，廣州市政協就舉辦咗一次網上嘅問卷調查，就話廣州電視台要加啲普通話嘅節目，結果問卷內容一出嚟，就搞到好多人都眼火爆，話呢個係咪廢粵噉解，收尾話有差唔多90%嘅人都反對。
• 2010年7月5號：廣州市政協提案委副主任嘅紀可光就向廣州市人民政府提交咗《關於進一步加強亞運會軟環境建設嘅建議》呢份嘢，而呢份嘢話到廣州電視台嘅綜合頻道或新聞頻道改成用普通話嚟播，結果就搞到廣州市各界好多人反對同批評。而紀可光喺接受媒體訪問嗰陣就話「市民可以引導」，重搞到一石激起千層浪，有好多人話佢係「反骨仔」，重搞到粵語係咪冇保留必要嘅激烈討論，搞到出咗單集會請願活動。而市政協就話，雖然話國家廣播電視都規定咗話電視台一定要用普通話嚟播嘅，但1988年因為考慮到廣東地區南邊冇幾遠就係港澳地區，要同香港爭收視率先至特別批准咗用粵語廣州話嘅，而呢個講法唔係對本土文化、語言同生活習慣呢啲嘢嚟保護啵。市政協就話建議改用普通話係為咗「上星」（係兜巴星噉解啩）。
• 2010年8月26號：廣州電視台同廣州電台合併咗，搞咗個廣州廣播電視台出嚟。

2011年

• 2011年11月：廣州廣播電視台同中國網路電視台一齊合作，搞咗個「中國網路電視粵語台」（簡化字：中国网络电视粤语台）。喺嗰日，廣州廣播電視台同新浪微博、美國天下衛視呢啲公司都搞合作。

• 廣州台辦緊嘅「廣州國際微電影創作大賽」（英文：Canton International Micro-movie Festival），而呢個英文就係用咗廣州嘅傳統英文名——Canton。

2012年

• 2012年11月6號，廣州電視台入面嘅其中一個主持人——羅丹（真名係龐丹晶，青海西寧人）喺經濟頻道入面嘅其中一個節目入面，其中有鬧到話粵語使用者點解講普通話點差噉嘅嘢。消息一出咗街，就猛咁俾人鬧，而羅丹重俾人搞咗搵人肉出嚟，事後重有人向咗廣東省廣電度係咪要炒咗個羅丹。後嚟根據台嘅內部消息話，羅丹俾電視台內部停播咗3個月。

2013年

2013年5月1號，廣州市中級人民法院同電視台開始同步播《法案真相》節目。

2014年

喺2014年4月1號：廣州電視台嘅綜合頻道喺晚黑7點嘅黃金時段突然開始播CCTV-1嘅《新聞聯播》節目一直到依家，而且電視台重未事先話畀公眾知（凈係得午間新聞同廣視新聞節目有講到）同整個節目調動指引出嚟，之前喺晚黑6點15分播嘅節目都係《天氣報告》同《闔家歡劇場》（都係粵語配音劇集）。根據廣州台話，《闔家歡劇場》每年嘅收視率都喺7.5以上，而且本土劇場嘅收視排行榜都係有絕對嘅優勢地位。而廣電總局嘅規定冇話到地方電視台一定要喺主頻道入面播《新聞聯播》，而且廣州電視台先後喺經濟頻道同英語頻道（今日嘅生活頻道）先後喺19:00～19:30轉播CCTV-1嘅《新聞聯播》節目，但佢之所以從2014年4月1號開始喺19:00～19:30轉播《新聞聯播》，係因為廣東省廣播電視廳（廣東電視台總部）出咗命令，要求各個地級市嘅電視台轉播新聞聯播時，都要轉到綜合頻道嚟播。有啲地級市（例如佛山廣播電視台）為咗避開呢個命令，甚至將綜合頻道同公共頻道嘅口號調轉。

台徽

呢度寫嘅係廣州電視台以前用過嘅台徽：

• 
  廣州電視台從1988年到2000年用嘅台徽
• 
  廣州電視台從2000年到2001年用嘅台徽
• 
  廣州電視台從2001年到2009年用嘅台徽
• 
  廣州電視台從2009年之後用嘅台徽（喺2010年之後喺改咗嗌「廣州廣播電視台」嘅名）

廣州有綫

内文：廣州有線珠江數碼同中華人民共和國電視審查

喺1989年出咗單六四事件之後，呢個台就開始用咗雜波嚟幹擾嗮香港嘅翡翠台、明珠台、本港台、國際台嘅信號，搞到廣州市民睇都睇唔到呢四個台，之前有嘅香港頻道都俾佢霸嗮嚟播廣州台入面嘅節目。喺1993年，佢重推出咗有線電視嚟統一接收香港嘅4個頻道，嚟用清晰嘅視頻嚟氹啲市民冇用未經過濾嘅原始訊號嚟接收節目。

由於廣電總局有規定啄住啲境外嘅電視，廣州有線係可以喺境外電視入面隨便插播商業同宣傳廣告都得，甚至可以喺郊區政府嘅中轉站度整啲廣告入去都得，搞到接收香港電視嘅本地廣告質量就好差。喺2011年開始，廣州有線重識喺每個星期一到五嘅翡翠台劇集入面，最後出現嘅上升字幕入面都嚟插播2——3個內地廣告，甚至重將下集預告都撳埋。但呢個現象直到2014年底先至唔搞。

2009年6月12號之前，市線同省線都係用咗兩條獨立嘅香港信號源。但係到咗2009年6月4號嘅六四事件20週年嗰日，由於市線冇撳到喺翡翠台播嘅成10秒《六點半新聞報導》嘅六四片，搞到有部分編輯俾人停咗職或處罰都有，就係噉，佢都冇咗單獨接收香港電視嘅權利。嗰晚值班嘅廣州台播出部嘅其中5個編輯停咗職，但係，廣州台都話呢件嘢冇發生過。結果廣電總局規定喺2009年6月12號凌晨開始，廣東省各市縣轉播播香港地面電視嘅4條頻道入面，必須要用廣東省有線電視先至得，而之前有嘅廣州有線明珠台嘅麗音頻道同MTV嘅身歷聲功能都冇埋。就係噉，市線重會插入埋廣東電視台同南方電視台嘅商業廣告同宣傳廣告都有，搞到境外電視頻道嘅畫質同聲重差過之前，而翡翠同明珠台嘅台徽入面，有時都會變成黑白都有。由於商業原因嘅關係，搞到佢重覆蓋埋省線嘅廣告，搞到市線嘅廣告重鬼咁長，幾乎差唔多冚唪唥嘅節目（除咗深夜播嘅節目之外）都出現咗超時插播。由於中國大陸有個電視審查响度，所以有啲時政節目都唔可以睇到完整版，但係喺市有線就成日一刀切方式，就係攞咗其他節目嚟撳嗮成個節目。

而家廣州電視台嘅珠江數碼係公司嘅品牌，而珠江寬頻係寬頻接入嘅業務品牌、珠江移動就係地面數字電視嘅業務品牌、珠江線上就係IPTV、視頻點播等呢啲業務嘅品牌。