足球球證

足球球證係足球比賽入面跟住足球比賽規則執法嘅人。一場正式足球比賽通常有四個球證，包括主球證、兩名旁證同埋一位第四裁判球證，部份比賽有另外兩個底線球證。

主球證

主球證會喺場入面近距離跟住個波或者控球嘅球員而走動，睇實佢哋有冇犯規，佢身上會配有一支哨子，用嚟吹響示意比賽開始或結束，吹罰犯規、個波出界或示意換人等等；另外佢身上會袋住一張黃牌同埋一張紅牌，黃牌係用嚟警告球員犯規，表示如果再犯領黃就要趕出場，而紅牌就係畀啲嚴重犯規，或者已經得到一張黃牌而又再犯黃牌嘅球員，每次當球員初犯時見到主球證隻手插入袋要攞牌嘅時候都祈禱希望只係黃牌，因為如果抽出嚟嘅係紅牌，即係話要趕佢出球場。

旁證

兩位旁證唔會企入球場入面，而只會分別企喺兩方區域嘅邊線上下游走；佢哋嘅手上會各拎一支旗（多數係黃紅色格仔旗），用嚟傳遞重要訊息畀場內主球證，例如個波係由邊方球員踢出界、進攻球員有冇越位、邊個球員動作過激要吹罰…等，有時主球證睇唔到一啲球員嘅犯規動作，就會同最接近嘅旁證了解事件，跟住先決定判唔判罰。

第四球證

第四球證係負責場邊換人，檢查吓出場嘅球員身上嘅配備有冇問題，舉燈牌示意換人嘅號碼，而當球賽到咗中場前或者完場前，亦會根據主球證畀嘅訊號而用燈牌示意嗰場波會補幾多分鐘比賽時間。當主球證或者旁證因為受傷而唔能夠繼續執行職務嗰陣，第四球證就會上場頂替佢哋。

底線球證

部份比賽會有另外兩個底線球證，主要職責係協助主球證決定喺禁區裏面發生嘅事，同埋個波係唔係已經過咗龍門白界。