六榕寺

六榕寺（粵拼：luk6 jung4 zi2）係中國一間有千幾年歷史嘅佛寺，亦係廣州佛教聖地兼名勝古蹟，喺廣州市越秀區六榕路。寺裡面有六榕花塔。佢嘅大門有一副對聯：「一塔有碑留博士，六榕無樹記東坡」，係民國初年順德文人岑學侶寫嚟紀念蘇東坡嘅。

六榕寺
中華人民共和國 全國重點文物保護單位
喺邊	廣東省廣州市
類	古建築
時代	宋
冧	6-681
登錄	2006年
地圖

史

十九世紀後葉六榕寺嘅樣

南梁武帝蕭衍派佢嘅母舅沙門曇裕大智法師到真臘，卽係而家嘅柬埔寨，求得佛舍利帶返廣州。回國之後，就命令廣州刺史蕭譽起咗呢座寺同埋塔，嗰時分別嗌「寶莊嚴寺」同「舍利塔」。

相傳大唐上元二年，初唐四傑之一嘅王勃嚟到廣州，應寶莊嚴寺住持嘅邀請，寫低咗《廣州寶莊嚴寺舍利塔記》。

南漢嗰時改成長壽寺，逢親上元節、中秋節，大家都蜂擁到寺入邊，點燈祈求豐年。

宋太宗嗰時再重修，改名淨慧寺。之後毀於火災，連塔都燒埋。宋哲宗嗰陣，廣州人林修喺原塔基下重建千佛塔，並將舍利埋喺塔下邊。宋元符三年，蘇軾貶到嶺南期滿，由海南返北方，經過廣州，嗰時淨慧寺僧人仰慕佢嘅名聲，邀請佢去寺題字。蘇東坡見寺裡邊有六樖古榕，枝葉繁盛，就寫低「六榕」兩隻遒麗奇雅、厚重雍容嘅楷體字。

大明永樂九年，改名六榕寺。蘇軾所題嘅匾額，今陣仍然懸喺寺門。

近況

家下寺裡面剩得三樖榕樹。寺內有宋鑄造禪宗六祖惠能嘅銅像。1949年之後，市政府將佢大修葺，開放畀遊客，之後列為廣東省重點文物保護單位。1997年，六榕寺以「六榕花塔」入選廣州市十大旅遊景點。由於花塔經歷咗近千年嘅風吹雨打，雖然多次維修，但係塔身裂咗，又斜咗一米七。因此，廣州市政府有關部門使咗四百幾萬人民幣，由2001年2月開始，用「中華791化學漿」、碳素纖維布等材料，做咗「箍」加固維修，並喺同年八月尾，驗收及格，而家已重開。

未來規劃

廣州政府而家已經計劃將六榕寺擴建，根據規劃稿，擴建後嘅六榕寺面積將會大一倍幾，佔地會超過兩萬方，並重現六樖榕樹嘅古貌，整體走向有望保持而家嘅東西軸線格局。

攷

• 六榕寺-中國廣州網