ობჟათე გვერდოსფერო
![](http://upload.wikimedia.org/wikipedia/commons/thumb/b/b1/Hemisferio_Sur.png/250px-Hemisferio_Sur.png)
![](http://upload.wikimedia.org/wikipedia/commons/thumb/a/a1/MapS.png/250px-MapS.png)
ობჟათე გვერდოსფერო (ინგლისურნინამ ლიტერატურას: ობჟათე ჰემისფერო) — დიხაუჩაშ ნორთი, ნამუთ ეკვატორიშ ობჟათეშე იფაჩუ. ობჟათე გვერდოსფერო იკენს ანტარქტიდაშ, ავსტრალიაშ, ობჟათე ამერიკაშ დიდ ნორთის დო აფრიკაშ ობჟათე მუნაკვათის, ოკიანეთიშ დიდ ნორთის, თაშნეშე ატლანტიშ, ინდოეთიშ დო რჩქალ ოკიანეეფიშ ობჟათე ტერიტორიას, თაშ ჯოხოდვალირი ობჟათეშ ოკიანეს. თეშ მოხ, ობჟათე გვერდოსფეროშ დორხველობას რე აზიაშ კონტინენტიშ დორხველური კოკეფი, თინეფს შქას მალაიშ არქიპელაგიშ გორკვიაფილი ნორთი.
ზარხული თაქ ქირსეთუთაშე მელახშა რე, ზოთონჯი - მანგიშე დო ეკენიაშამო იგჷნძორებუ. 22 ვარდა 23 ეკენია აფუნიშ ბუნიობაშ თუთეფი რე, 20 ვარდა 21 მელახი - დამორჩილიშ ბუნიობაშ თუთეფი. კლიმატეფი ზომიერ ხასიათიშ რე, გჷმნარკი რე ანტარქტიდა, ნამუშ ჰავა არქტიკაშ კლიმატშე უმოსი რგილი რე. თენა თით ეინწყუმუ, ნამჷ-და ობჟათე გვერდოსფეროს ელაზჷმათ უმოსი წყარი რე, ვინემ სქირონა, მუშ გეშათ წყარი გოტიბაფას დო გორგილაფას ელაზჷმაფათ დიდხანს იკორინუანს, ვინდარო სქირონა.
ოორუე გვერდოსფეროწკჷმა ალაზჷმაფათ, ობჟათე გვერდოსფერო მერკეთ რე დოწინდარებული, მუთ მერჩხე ოხორუეფით (მოსოფელიშ მახორობაშ 10-12% ობჟათე გვერდოსფეროშა მოურს) დო მერკე ინდრუსტრიალიზაციათ რე გოპიჯალსფირი.
ირფელწკჷმა ართო ობჟათე გვერდოსფეროშო ვარე დჷმახასიათაფალი ლინგვისტური მიარეფერუამობა. მახორობა ხვალე 5 ნინაშა რაგადანს: პორტუგალიურ, ინგლისურ, ესპანურ, ფრანგულ ვარდა ინდონეზიურ ნინეფშა.
ობჟათე გვერდოსფეროს ციკლონეფი დო ტროპიკული შტორმეფი ირთანს სათიშ ისარიშ მეჯინათ. ობჟათე ზომიერი ორტყაფუეფი დახე ედომუშამო ოკიანური რე. ეშანილი ზონა აკმაართიანენს: ურუგვაის, ლესოთოს, ესვატინის დო ახალ ზელანდიას; ჩილეშ, არგენტინაშ, ობჟათე აფრიკაშ დო ავსტრალიაშ დიდ ნორთის; პარაგვაიშ, ბრაზილიაშ, ნამიბიაშ, ბოტსვანაშ, მოზამბიკიშ დო მადაგასკარიშ ნორთეფს. ობჟათე პოლუსი ორიენტირებული რე გალაქტიკურ ცენტრშა.
ჩილეს დო ახალ ზელანდიას მუთმოფხვადჷნა უნიკალური წიფურიშ გვარობეფი, თაშ ჯოხოდვალირი ნოთოფაგუსი. ევკალიპტი ჩანს მუჭოთ ავსტრალიას, თეშ ობჟათე აფრიკასჷთ დო ლათინურ ამერიკასჷთ.