Burundi: Imvo n'imvano ku ngingo ya CENI yo kwanka intonde za CNL na Burundi bwa Bose

Kaze mu kiganiro Imvo n'Imvano yo kuri uyu wa gatandatu tariki 11 z'ukwezi kwa 1 mu 2025. Kuwa gatatu w'iki cyumweru, urukiko rushinzwe kubahiriza itegeko nshinga mu Burundi rwanze ikirego rwari rwashyikirijwe n'amashyaka atavuga rumwe n'ubutegetsi, CNL n'urunani Burundi bwa Bose.

Ayo mashyaka yaregaga akanama gashinzwe amatora mu Burundi CENI ko kabarenganyije mu kwanga intonde zabo z'abaziyamamaza mu matora ateganijwe muri uyu mwaka.

Urukiko rwasabye CNL gutanga urutonde rushya rukurikije amategeko, naho urunani Burundi bwa Bose, rugakura ku rutonde rwabo abari mw'ishyaka CNL kuko ritari muri urwo runani. Uru rukiko rero rwahaye iminsi 3 ayo mashyaka kuba yakoze intonde nshya akazigeza ku kanama gashinzwe amatora.

Mu cyumweru gishize, kw'itariki ya 31 z'ukwa 12 mu 2024, akanama gashinzwe amatora mu Burundi katangaje urutonde rw'abantu bemerewe kuzahiganwa mu matora y'abashingamateka, abakenguzamateka, abajyanama b'amakomini, n'abajyanama bo ku mitumba, amatora ateganijwe kuzaba guhera mu kwezi kwa 6 k'uyu mwaka.

Ku rubuga rw'akanama gashinzwe amatora mu Burundi, CENI, haboneka ko amatora ya mbere azaba ay'abashingamateka n'abajyanama b'amakomini, akazaba kw'itariki ya 5 z'ukwa 6 muri uyu mwaka, akurikirwe n' ay'abakenguzamateka azaba 23 z'ukwa 7. Ayanyuma muri uyu mwaka akazaba ay'abajyanama bo ku mitumba n'amaquartier / imidugudu, azaba kw'itariki 25 z'ukwa 8.

Muri iki kiganiro turareba ingingo akanama gashinzwe amatora kavuga ko zitubahirijwe muri iryo tegeko rigenga amatora. Turanumva uko izo mpande zangiwe zivuga ko zarenganijwe, n'uko urukiko rwaciye uru rubanza.

Si ubwa mbere abatavuga rumwe n'ubutegetsi mu Burundi basaba uru rukiko rushinzwe kwubahiriza itegeko nshinga kubarenganura. Mu matora y'ubushize yabaye mu 2020 nabwo ishyaka CNL ryitabaje uru rukiko ariko ntiryahawe ibyo ryashakaga. Ese ubu ho ryiteze ko hari ikizavamo bumva kibarenganura ?

Abatumire bacu ni Francois Bizimana, umuvugizi w'akanama gashinzwe amatora mu Burundi, CENI, turi kumwe na Kefa Nibizi, umuvugizi w'urunani Burundi Bwa Bose, rwangiwe urutonde rw'abaziyamamaza, abandi twari twatumiye ni abo mw'ishyaka CNL naryo ryangiwe urutonde rw'abaziyamamaza, ariko batubwiye ko batakibishoboye. Twanashatse kumenya icyo abo ku ruhande rwa Agathon Rwasa bakiri muri CNL ariko bari bashatse kwiyamamaza ku rutonde rwo mu runani Burundi bwa Bose, nabo ntibashoboye kuza muri iki kiganiro.

Iki kiganiro mwagiteguriwe kandi murakigezwaho na Felin Gakwaya.