宋朝
宋朝（960年2月4号- 1279年3月19号），是中国历史当中个一个大一统朝代。迭个朝代个第一个皇帝是后周大将赵匡胤。挨末一个皇帝是赵昺。弗过，当中因为靖康之变，断档过一趟，一般分成北宋搭南宋两个阶段。宋朝个统治家族姓赵，所以也叫做赵宋。因为五德始终个影响，宋帝国自称有火德，所以也有"火宋“、”炎宋“个称呼。立在周边国家个历史书当中，对迭个帝国个称呼也有变化，辽国搭金国称呼宋叫做南朝，西夏称呼宋朝叫做东朝。
960年，后周个大将赵匡胤通过发动军事政变，篡夺后周个帝位建立。赵匡胤为防止别个节度使效仿自家。就杯酒释兵权，威逼利诱，拿各地区个自主权侪强行收缴。之后，又设立转运使，到各地区搜刮赋税，服务伊个大一统帝国。伊生怕各地有自家个势力， 就命令拿各地精装个士兵侪送到首都，让老弱病残待在当地。为达到”稳定“个效果，伊拉拢从中唐辰光开始发展个寒门读书人，用科举笼络伊拉作为自家统治集团个助手。采取崇文抑武个国策。从此，武将立在大一统帝国当中个地位就弗如老早哉。
因为之前五代十国个积累，立在宋帝国接盘个辰光，南方各地发展水平侪超过之前唐朝，邪气繁荣。宋帝国依靠迭个老本。成为大一统帝国当中顶顶繁荣个。尤其是经济搭文化高头，创造蛮多成就。个辰光，佛教搭道教个社会组织功能衰落，又因为宋帝国大搞科举，让想成为社会精英个读书人大部分亲近儒学，对佛教道教个发扎能带来负面影响。弗过同时也造成程朱理学之类新型儒家思想个发展。宋朝个书院教育发展蛮快，湖湘个岳麓书院，江右个白鹿洞书院，侪是宋朝建立个。
宋帝国对宦官防范比较严格，又因为大规模限制地方兵权，所以宦官干涉朝政个事体老少，弗过，因为压迫导致个老百姓起义还是有发生。个当中，比较有影响力个包括宋徽宗辰光个吴越人方腊大起义，搭南宋开始辰光荆湖北路个钟相、杨幺起义。
北宋挨末阶段，因为统治集团个昏庸搭好大喜功，发生荒谬个靖康之难，让宋徽宗、宋钦宗被女真人抓走。之后，宋徽宗个九儿子康王赵构逃到钱塘，改此地叫做行在，建立南宋。1276年，南宋被蒙古人灭脱。1279年，南宋个残余势力立在崖山海战当中被全歼。宋帝国正式灭亡。