Wikipedia:分類

維基百科个頁面儕應該有合適个分類。添加分類个辦法是寫上相應个分類鏈接，位置一般性擺勒頁面个最底下，譬如說寫[[Category:英国]]就好拿該只頁面加進Category:英國。使用可視化編輯器或者HotCat可以比較方便个增刪分類。

決定一篇文章屬於囉里些分類，需要一點經驗。先看看別樣閒話版本个分類，再翻翻吳語維基百科乃朝有个分類；實在尋弗着合適个，就自家新建一隻。

分類頁

維基百科个全部分類構成仔樹狀結構。除脫樹根以外，所有个分類頁儕要屬於至少一隻上級分類。

分類个存在，方便讀者搭仔編者尋同樣主題个文章。只有一篇文章个分類是嘸不啥用个，可以考慮拿箇篇文章移到上一級分類。

弗要拿一隻分類重定向到另外只分類，介樣做弗會讓兩隻分類里个物事顯示勒一道。如果出現同質異名个多隻分類，拿里向个頁面亨八冷打合併到一隻分類里，別名分類讓管理員快速刪除就好。

要改動一隻分類个名字，分類里向个全部頁面儕要手動改，鏈接到新个名字。如果移動仔一隻分類，箇麼要麻煩儂拿舊个名字交畀管理員快速刪除。