Pablo Sarachaga
Pablo Sarachaga (on scrît cobén Saratxaga, a môde basse), c' est on rcwereu sol walon, k' a skepyî e 1971 e Tchili, et k' a vnou el Walonreye e 1981. E 1998, il atôtcha Lorint Hendschel po fé des ratournaedjes do sistinme d' operance Linux e walon. Did la, il a moussî dins les rfondeus.
Di s' mestî, il esteut infôrmatikî.
![](http://upload.wikimedia.org/wikipedia/commons/thumb/2/20/Pablo_djoozef_elizete.jpg/220px-Pablo_djoozef_elizete.jpg)
![](http://upload.wikimedia.org/wikipedia/commons/thumb/a/a0/Saratxaga_cwaute_vizite.jpg/220px-Saratxaga_cwaute_vizite.jpg)
Etimolodjeye
Pablo
Loukîz a :[1]
Pablo est l' omonime spagnol da På, pitit no d' oridjene crustinne (vir Sint På) eyet laténe ([LA] Paulus). Paulus vout dire ene djin k' est pitite eyet fwebe.[1]
Saratxaga
Saratxaga est on mo-fraze basse ki vout dire : "la wice k' i gn a des sås".[2]
Ouve pol walon
come bouteu et rcwereu
C' est a cåze di lu kel walon est eployî come langue dins les programes Linux.
Dispu 1989, il est waiburlin tecnike di l' Aberteke, et des ôtès waibes do dominne "walon.org".
E 2002, i fourit eto les cåzes del ricnoxhance do walon pa l' ISO, dizo l' essegne "wa".
E 2000, il aveut enondé l' idêye d' èn esplicant motî do walon. Il a coplé tecnicmint Lucyin Mahin k' a metou l' pordjet en alaedje.
E 2003, i ratourna tot seu l' eterface Wikipedia, po poleur diswalper ene eciclopedeye e walon. Pu ratourner e walon ene banslêye di hagnons k' i gn aveut so ls ôtes Wikipedia.
E 2003, il a eto apontyî on programe po l' codjowaedje des viebes e walon. Did la, trover l' atuze des troes bodjes ki poite si no.
Il a divnou penleu del Rantoele e 2000, et onk des pî-stoks del tåvlotêye rifondaedje del Rantoele. C' est lu k' a astaplé li prumî fond di dnêyes po fé ene ricoridjrece e walon. Et copler Francis Baudoux e 2005, po basti ene ricoridjrece k' on pout eto eployî so les sistinmes d' operance Microsoft.
A pårti des anêyes 2010, I va bråmint rarindjî l' DTW, po ndè fé on fond di dnêyes mo pouxhant.
come sicrijheu
Mågré k' i n' åye djamåy sicrît des ouves di Belès Letes, il est onk des cis k' ont l' pus scrît e walon.
Ses scrijhaedjes, c' est aprume les ratournaedjes sol Wikipedia walon et po fé sacwants pådjes po l' Aberteke.
Mins c' est ossu tote les bates di dvizes, so des sudjets ordinaire et des sacwès d' linwince, so les djåspinreyes éndjolikes, foiravant Berdelaedjes.
Hårdêyes difoûtrinnes
Li Wiccionaire si rsieve di sacwantès fråzes da Pablo Sarachaga po-z enimådjî des mots k' i gn a.
- Li waibe da sinne.
- L' esplicant motî do walon, k' il a enondé, et l' manaedjî tecnicmint.
- Li waibe di l' Aberteke, k' il manaedje eto tecnicmint.
- Si pådje so l' Aberteke.
- Si pådje d' uzeu so l' eciclopedeye Wikipedia.