Tau Ceti
 Plad ela Tau Ceti in eläd Sivalüt. | |
| Nünis küpedik Timäd J2000 | |
|---|---|
| Steläd | Sivalüt (Cetus) |
| Ascensio recta | 01h 44m 04,1s |
| Declinatio | −15° 56' 14" |
| Litagret jinik (V) | 3,49 |
| Patöfs späktrumik | |
| Pated späktrumik | G8 V |
| kölanüm U-B | 0,21 |
| kölanüm B-V | 0,72 |
| Pated cenastel | nonik |
| Stelamafav | |
| Lönamuf (μ) | AR: −1721,82 mbs/yl Dec.: 854.07 mbs/yl |
| Paralak (π) | 274,39 ± 0,76 mbs |
| Fagot | 11,89 ± 0,03 ly 3,64 ± 0.01 ps |
| Litagret verik (MV) | 5,68 |
| Patöfs füsüdik | |
| Masat | 0,81 M☉ |
| Diametalaf | 0,82 R☉ |
| Stralanäm | 0,59 L☉ |
| Vamot | 5.380 K |
| Metalöf | 22-74% uta Sola |
| Tulatim | dels 34 |
| Bäldot | yels za 1 × 1010 |
| Nems votik | |
Tau Ceti (τ Cet / τ Ceti) binon stel sümik ad Sol tefü masat e pated späktrumik, ed i tefädiko nilik Solasite. Binon i stel „metalodefik“, klu binos läs luveratik, das labon planetis klifagik zü ok. Too küpeds etuvons püfamödoti 10na gretikumi zü el Tau Ceti, kas binon pö Solasit. Kompenastel nonik jünu petuvon dub mafams stelavik moikamavifa. El Tau Ceti logädon loge as stel litagreta kilid nilü Steläd Sivalüt (Cetus).
El Tau Ceti no labon nemi kösömik vemo sevädik, distü stels logädikum mödik. Se planetasit mögik zü el Tau Ceti, Sol binon stel litagreta telid in Steläd: Boötes.
Küpeds
Lönamuf ela Tau Ceti binon tefädiko vifik (o.b. plad onik in silasfer votikon tefädiko vifiko): bobädasekun za bal a yel. Too milats anik yelas zesüdons one ad votükön pladi okik mö bobädagred bal.
Lönamuf vifik malon nili Sole: stels nilik mufons jiniko vifikumo ka stels fagik, e binons kludo zeils gudik pro paralakastuds. Dö el Tau Ceti, mufams jonons, das stel at binon fagotü litayels bosilo läs ka 12; abinon kludo bal stelas nilikün Sole, stel nilikün telid (pos el Alpha Centauri A), kel duton lü späktrumaklad G.
Moikamavif, distü lönamuf, no kanon paküpedön stedöfiko, ab muton pavestigön dub mafam späktruma. Sekü sleafam ela Doppler, nüsugamaliens späktruma sleafons lüodü red (volfalunots gretikum) if stel momufon, u lüodü blöv (volfalunots smalikum) if lümufon lü obs. Moikamavif el Tau Ceti binon milmets za -17 a sekun, kelos sinifon, das mufon lüodü Sol.
Fagot tefädiko smalik ela Tau Ceti, ed i lönamuf e moikamavif tefädiko gretikis, dälons kalkulami mufa stela at da lespad. Vif lölöfik ona binon milmets 37 a sekun; stabü kalkulam at, mögos ad kalkulön züvegi ela Tau Ceti Miligaveg: galaxid obik. Fagot de zänd galaxida binon litayels za 32.000, e plödazänöf binon 0,22.
Patöfs füsüdik
Cifadil nünas sevädik dö patöfs füsüdik ela Tau Ceti petuvon dub späktrumamafams: dub leigod späktruma onik lä späktrums spetabik bai teorod stelavolfa, bäldot, masat, diametalaf e stralanäm ela Tau Ceti kanon patäxetön.