Sluus (stad)
Sluus (Nederlands: Sluis) is e stadje en gemêente in de Ollandsche provinsje Zêeland, in Zêeuws-Vloandern. De toale da' ze doa klapp'n is in feite e West-Vlams dialect, moa 't wordt ook dikkes Zêeuws genoemd.
Sluus wos in de joarn '60 en '70 surtoe gekend voe ze seksboetieksjes, moa dat toerisme is styf verminderd oewel dat er nog alsan van die wienkeltjes zin. Nu is 't e rustig stadje mè wienkelstratjes en veel groen.
Veel West-Vloamiengn goan nu en ton noa Sluus achter homeopatische en andere nateurproduct'n.
Den Damsche Voart, die begint in Brugge, komt toe in Sluus.
De legende va Jantje va Sluus
Jantje van Sluus wos in tiede (roend 1600) de klokkeluder va Sluus. Op e nacht, op de kop of 'n driejn, giengn de Spanjoarn Sluus binnvoln. Moa Jantje adde tevele efêest, en e wos i sloape evolln. De Spanjoarn vertrouwnde 't boeltje ni (z'ôornde gèn klokk'n) en z'hen ton ni anevolln. Jantje va Sluus is nu verêeuwigd in e biertje me zie noame.
Bekende inweuners va Sluus
- Johan Hendrik van Dale, woordenboekenmoakre
- Emile Buysse, schryver, loater uutgeweken noa Brugge