جینیات

ڈی این اے ضرر کی وجہ سے سرطان جیسی بیماریاں پیدا ہوتی ہیں۔ فطرت میں اس ضرر کی مرمت کرنے کيليے ایک مکمل نظام خلیات میں موجود ہوتا ہے۔ یہاں اس کا ایک پہلو دکھایا گیا ہے جس میں پیوستگر خامرے (رنگدار بادل نما) کی مدد سے ڈی این اے کی مرمت کا کام انجام دیا جا رہا ہے۔

جینیات یا وراثیات (انگریزی: Genetics) وراثوں (genes) کی ساخت، ان کے افعال اور ان کے رویے کے مطالعے کو کہا جاتا ہے اور یہ حیاتیات کی ایک ذیلی شاخ ہے۔ اس کی تعریف ایک اور انداز میں یوں بھی کی جا سکتی ہے کہ حیاتیات کی وہ شاخ ہے جس میں وراثوں کا مختلف پہلوؤں سے مطالعہ کیا جاتا ہے یعنی ان کے ذریعہ خواص کی اولاد میں منتقلی (طرزوراثی سے طرزظاہری کی تشکیل)، وراثوں میں ہونے والے طفرہ (mutation)، طفرہ سے ہونے والے امراض اور ان امراض کے معالجے کا مطالعہ کیا جاتا ہے۔ ابتدا میں دو اہم الفاظ کی وضاحت اور ان کے مفہوم کا فرق

• وراثی امراض (Genetic diseases) : یہ وراثوں میں پیدا ہونے والے مختلف نقائص کی وجہ سے نمودار ہونے والے امراض ہیں۔ یہ نقص، قبل از پیدائش یعنی وراثتی (heredity) بھی ہو سکتا ہے اور بعداز پیدائش یعنی حصولی (acquired) بھی۔
• وراثتی امراض (Hereditary diseases) : یہ وراثوں میں پیدا ہونے والے مختلف نقائص کی وجہ سے نمودار ہونے والے امراض ہیں۔ یہ نقص، قبل از پیدائش یعنی وراثتی (heredity) ہوتا ہے اور اسی ليے ان کو پیدائشی امراض بھی کہتے ہیں۔