Numunə:Haftə vyžnijə nyvyštəj
Zulfuǧar Əhmədzadə (14 ijun, 1898 sor, Pensər di, Lankoni ǧəzo, Urusijəti Imperijə — 1 ijun 1942 sor, Mariinsk šəhər, SSRI) — tolyšə šair, ənyvyšt, ičtimoijə u sijosijə xodim, peəgordyn, publisist, 1930-nə soron millijə-mədənijə rostbemoni navəžən.
Əhmədzadə Zulfuǧar 1898-minə sorədə Pensər dijədə kosibə tolyšə xyjzonədə bə dynjo omə. 9 sinədə de yštə pyə vote dij miəllimi tono šedəbe, končo 2 sor dylədə umutyše hande, nyvyšte u farsi zyvonədə gəp žəj. 1913—1914 soronədə Pensərədə farsi zyvonədə dij məktəbyš oroxni, ərəbi zyvoni umute bino kardyše. 1916—1917 soronədə 2 sinifə məktəbi Pensər dijədə oryxniše. Vej bo hande həvəsyš hestbe, əv bə Lankon še u əjo bə məktəbi 1-nə grup dəše. 12 sinədə həvəsyš bo rəssam kəše u šeir nyvyšte pəjdo kardyše.
Ofəjevonəti
Tolyšonku besəvodəti ləǧv karde gornə 1928 sorədə latyn əlifbo əsosədə bo tolyšə zyvoni əlifbo soxtə be, Zulfuǧari cy həminə əlifbo myəllifonədə hisob kardejdən. By myddətədə tolyšə zyvonədə məktəbon okardəšonbe, Lankonədə Tolyšə pedagoži texnikum təškil kardə be. Bo tolyšə məktəbon tosə 6-nə sinifi bo notəmomə mijonə təhsili səjro dərsə kitobon nyvyštə bin. 1920-nə soron oxojədə tolyšə zyvonədə kitobon cap karde təškil kardə be Boku «Azərnəšr» nəšrədə, tolyšə teətr soxtə be. Zulfuǧar vej šeiron u poemon tolyšə zyvonədə nyvyštəše, vej məšhurin «Tolyši žimon», «Dəvardə ružon», u «Arktika dastany» (bə tyrki, bijədə təsə «Celjuskin» paroxodi barədə), «Handə kitob», «Tolyšə zyvon» 1937 sori, «Kyryngo».