Vuoptah
![](http://upload.wikimedia.org/wikipedia/commons/thumb/0/03/Woman_redhead_natural_portrait_1.jpg/220px-Woman_redhead_natural_portrait_1.jpg)
Vuoptah' láá ulmuu uáivist šaddee soksâmeh. Toh šaddeh vuoptâtuupâin, moh láá uáiviliškeest. Vuoptâtuupâst šaddee ovtâskâs vuoptâ ađai vuoptâčalme puáhtá leđe juurbâs, kuheldâlâšjuurbâs teikkâ tuolbâs. Jurbâ vuoptâtuupâst šoddâm vuoptâčalme lii njuolgâd, já mađe tuolbâsub vuoptâtuppâ lii tađe kuárvib tot vuoptâčalme lii. Ulmuu uáivist láá koskâmiärálávt 100 000 vuoptâd. Toh šaddeh suulân 1–1,5 senttimeetter mánuppaajeest. Vuoptâčalme šadda suulân kulmâ ive ovdil ko ton šoddâm nohá já viijmâg tot kačča já uđđâ vuoptâčalme šodâškuát. Ulmuu uáivist njalaneh suulân 20–150 vuoptâčalmed peeivist.
Vuoptâi iivneh mulsâšudeh čappâdist ruškâdân, kuovgâdân, ruopsâdân, ránásân já vielgâdân. Vuoptâčalmeest láá kulmâ keerdi. Siskerdi lii medulla. Nubbe kerdi lii cortex, mii lii kasemus kerdi já siskeeld vuoptâi ivne ađai melaniin. Cuticula lii vuoptâčalme olgokerdi.