ⴱⴰⵔⵉⵣ

ⴱⴰⵔⵉⵣ (ⵙ ⵜⴼⵔⴰⵏⵙⵉⵙⵜ : ⴱⴰⵔⵉⵙ), ⴰⵔ ⴰⵙ ⵜⵜⵉⵏⵉⵏ ⵓⵍⴰ ⵜⴰⵎⴷⵉⵏⵜ ⵏ ⵜⵉⴼⴰⵡⵉⵏ, ⵜⴳⴰ ⵜⴰⵎⴰⵥⵓⵏⵜ ⴷ ⵜⵎⴷⵉⵏⵜ ⵍⵍⵉ ⴰⴽⴽⵯ ⵉⵎⵇⵇⵓⵔⵏ ⵖ ⴼⵕⴰⵏⵙⴰ. ⵜⵖⵯⵉ ⵢⴰⵜ ⵜⵊⵓⵎⵎⴰ ⵏ 105,40 ⴽⵎ² ⴷ ⴽⵔⴰ ⵏ 2.15 ⵉⴷ ⵎⵍⵢⵓⵏ ⵏ ⵎⵉⴷⴷⵏ ⴰⴷ ⴳⵉⵙ ⵉⵣⴷⵖⵏ. ⵉⵖ ⵏⵙⵙⵉⴹⵏ ⵓⵍⴰ ⵜⵉⵙⴳⵉⵡⵉⵏ ⵏⵏⵙ, ⵔⴰⴷ ⵉⵍⴽⵎ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⴱⴰⵔⵉⵣ ⵙ 10.7 ⵉⴷ ⵎⵍⵢⵓⵏ ⵏ ⵓⵎⵣⴷⴰⵖ. ⵏⵜⵜⴰⵜ ⴰⴷ ⵉⴳⴰⵏ ⵜⴰⵎⴷⵉⵏⵜ ⵏⵏⴰ ⵎⵉ ⴰⴽⴽⵯ ⵜⵎⵇⵇⵓⵔ ⵜⵏⵥⵥⵉ ⵖ ⵜⵎⴷⵉⵏⵉⵏ ⵏ ⵜⴰⵎⵓⵏⵜ ⵜⴰⵡⵔⵓⴱⴱⵉⵜ, ⵙ ⴽⵔⴰ ⵏ 20,755 ⵓⵎⵣⴷⴰⵖ ⵉ ⵢⴰⵏ ⵓⴽⵉⵍⵓⵎⵉⵟⵕ ⴰⵎⴽⴽⵓⵥ.

ⴱⴰⵔⵉⵣ ⴱⴰⵔⵉⵙ (ⵜⴰⴼⵔⴰⵏⵙⵉⵙⵜ)
ⵜⵓⵥⵥⵓⵎⵜ ⵏ ⴱⴰⵔⵉⵣ ⵏⵏⴰ ⵖ ⴷ ⵉⵜⵜⴱⴰⵢⵢⴰⵏ ⴰⴳⵯⴷⴷⵉⵏ ⵏ ⵉⴼⵉⵍ ⴷ ⵍⴰ ⴷⵉⴼⵓⵏⵙ ⴳ ⴹⴰⵕⴰⵜ ⵏⵏⵙ.
ⵉⵙⵎⴰⵡⵏ
ⵉⵙⵎ ⴰⴼⵔⴰⵏⵙⵉⵙ	ⴱⴰⵔⵉⵙ
ⵜⴰⵎⵙⵙⵓⴳⵓⵔⵜ
ⵜⴰⵎⴰⵣⵉⵔⵜ	ⴼⵕⴰⵏⵙⴰ
ⵜⴰⵙⴳⴰ	ⵜⴰⴳⵣⵉⵔⵜ ⵏ ⴼⵕⴰⵏⵙⴰ
ⵜⴰⵏⴱⴱⴰⴹⵜ	ⴰⵏⵏⴻ ⵀⵉⴷⴰⵍⴳⵓ
ⵉⵏⵉⴳⵍ ⴰⵙⴰⵡⴰⵢ	75001 ⴰⵔ 75020, ⴷ 75116
ⵜⴰⵔⴰⵖⵔⴼⵜ
ⴰⵙⵎⵖⵔⴼ	ⴰⵢⵜ ⴱⴰⵔⵉⵣ
ⵉⵎⵣⴷⴰⵖⵏ	2 187 526 (2017)
ⵜⴰⵏⵥⵥⵉ	20 755 ⵎⵣⴷⵖ./ⴽⵎ2
ⴰⴽⴽⵯ ⵉⵎⵣⴷⴰⵖⵏ	10 784 830 (2017)
ⵜⴰⵔⴰⴽⴰⵍⵜ
ⴰⵎⵙⵉⴷⴳ	48° 51′ 24″ ⵏ, 2° 21′ 07″ ⵡ
ⵜⴰⵊⵓⵎⵎⴰ	105,40 ⴽⵎ2
ⴰⵙⵉⵜ ⵏ ⵍⵡⴻⴱ
https://www.paris.fr/

ⴰⵔ ⵉⵣⵔⴰⵢ ⵡⴰⵙⵉⴼ ⵏ ⵙⵉⵏⵏ ⵖ ⵜⵓⴷⴷⵓⵔⵉⵏ ⵜⵉⵇⴱⵓⵔⵉⵏ ⵏ ⵜⵎⴷⵉⵏⵜ ⵏ ⴱⴰⵔⵉⵣ ⵍⵍⵉ ⵉⴱⵟⵟⵓ ⴼ ⵙⵉⵏ ⵉⴳⵣⵣⵓⵎⵏ ⵏⵏⴰ ⵉⵜⵜⵢⵓⵙⵙⴰⵏⵏ ⵙ ⵜⴰⵙⴳⴰ ⵜⴰⴼⴰⵙⵉⵜ ⴷ ⵜⴰⵙⴳⴰ ⵜⴰⵥⵍⵎⴰⴹⵜ. ⵙⵙⵓⵜⵍⵏ ⴰⵙ ⴰⴳⵓⴷⵉ ⵏ ⵜⴰⴳⴰⵏⵉⵏ.

ⴱⴰⵔⵉⵣ ⴰⴷ ⵉⴳⴰⵏ ⵜⵓⵥⵥⵓⵎⵜ ⵏ ⵜⴷⴰⵎⵙⴰ, ⵜⵙⵔⵜⵉⵜ ⴷ ⵜⴷⵍⵙⴰ ⵜⴰⴼⵕⴰⵏⵙⴰⵡⵉⵜ. ⵍⵍⴰⵏⵜ ⴳ ⴱⴰⵔⵉⵣ ⴽⵉⴳⴰⵏ ⵏ ⵜⵙⵏⵏⵉⵖⵉⵏ ⵏ ⵜⵥⵓⵕⵉ ⴷ ⵜⵓⵚⴽⴰⵡⵉⵏ ⵜⵉⵎⵣⴰⵔⴰⵢⵏ. ⵜⴳ ⴷⴰⵖ ⴱⴰⵔⵉⵣ ⵜⵓⵥⵥⵓⵎⵜ ⵏ ⵓⵙⵜⵜⵉ, ⵜⵟⵟⴰⴼ ⵉⵍⵎⵎⴰ ⵢⴰⵜ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ ⵉⴼⵓⵍⴽⵉⵏ ⵏ ⵓⵎⵉⵜⵔⵓ. ⵜⵟⵟⴰⴼ ⵓⵍⴰ ⵙⵉⵏ ⵉⵣⴰⴳⵯⵣⵏ ⴳ ⵓⴳⵏⵙⵓ ⵏ ⵜⵎⴷⵉⵏⵜ. ⵉⵜⵜⵓⴱⵏⴰ ⵢⴰⴷⵍⵍⵉ ⵓⵎⵉⵜⵔⵓ ⵖ 1900, ⴷ ⵜⵉⵖⵣⵉ ⵏⵏⵙ ⴰⵔ ⵜⵍⴽⴽⵎ ⵓⴳⴳⴰⵔ ⵏ 200 ⴽⵎ.

ⵜⴰⵎⴷⵉⵏⵜ ⴰⴷ ⴷⴰⵔⵙ ⵢⴰⵜ ⵜⵎⴰⵎⴽⵜ ⵉⴳⴰⵏ ⵜⴰⴳⵜⴷⵍⵙⴰⵏⵜ, ⴰⵛⴽⵓ 19% ⵏ ⵎⵉⴷⴷⵏ ⵍⵍⵉ ⴳⵉⵙ ⵉⵍⵍⴰⵏ ⵓⵛⴽⴰⵏ ⴷ ⵣⵖ ⴱⵕⵕⴰ ⵏ ⴼⵕⴰⵏⵙⴰ. ⵉⵍⵉⵏ ⴳⵉⵙ ⴽⵉⴳⴰⵏ ⵏ ⵉⴷ ⵔⵔⵉⵚⵜⵓⵔⴰⵏ ⵥⵍⵉⵏⵉⵏ ⵙ ⴽⵔⴰⵢⴳⴰⵜ ⴰⵏⴰⵡ ⵏ ⵜⵉⵔⴰⵎ. ⵍⵍⴰⵏ ⴳ ⴱⴰⵔⵉⵣ ⵉⵎⵓⴽⵔⵉⵙⵏ ⵏ ⵜⵎⵔⴽⵉⵜ ⵣⵓⵏ ⴷ ⵜⵉⵎⵔⴽⵉⵜ ⵏ ⵡⴰⴹⵓ ⴷ ⵜⵉⵎⵔⴽⵉⵜ ⵏ ⵜⵉⴼⴰⵡⵜ.

ⵜⴰⵎⴰⵍⵍⴰⵢⵜ

ⴱⴰⵔⵉⵣ ⴷⴰⵔⵙ ⴽⵉⴳⴰⵏ ⵎⴰⴷ ⵜⴰⴽⴽⴰ ⵖ ⵜⵙⴳⴰ ⴰⴷ ⵏ ⵜⵎⴰⵍⵍⴰⵢⵜ, ⵀⴰ ⵚⴹⵉⵚ ⵉⵎⴷⵢⴰⵜⵏ ⵜⵜⵢⵓⵙⵙⴰⵏⵏⵉⵏ:

• ⴰⴳⵯⴷⴷⵉⵎ ⵏ ⵉⴼⵉⵍ ⴰⴷ ⵉⴳⴰⵏ ⵜⵓⵚⴽⴰ ⵍⵍⵉ ⴰⴽⴽⵯ ⵉⵜⵜⵢⵓⵙⵙⴰⵏⵏ ⴳ ⴱⴰⵔⵉⵣ, ⵉⴱⵏⴰ ⵜ ⴳⵓⵙⵜⴰⴼ ⵉⴼⵉⵍ ⵖ ⵓⵙⴳⴳⵯⴰⵙ ⵏ 1889 ⵙ 6,300 ⵟⵓⵏⵏ ⵏ ⵡⵓⵣⵣⴰⵍ, ⴰⴷ ⵜ ⵉⴳⴰⵏ ⴷ 18,000 ⵓⴳⵣⵣⵓⵎ ⵏ ⵡⵓⵣⵣⴰⵍ ⴷ 2,5 ⵉⴷ ⵎⵍⵢⵓⵏ ⵏ ⵉⵡⵇⴰⴼⵏ. ⵙ ⵢⴰⵜ ⵜⵖⵣⵉ ⵏ 300 ⵉⴷ ⵎⵉⵜⵔⵓ, ⵜⴽⴽⴰ ⵜⵜ ⵉⵏⵏ ⵖ ⵢⴰⵏ ⵓⵣⵎⵣ ⵜⴳⴰ ⵜⵓⵚⴽⴰ ⵍⵍⵉ ⴰⴽⴽⵯ ⵉⵖⵣⵣⵉⴼⵏ ⵖ ⵓⵎⴰⴹⴰⵍ. ⵓⴳⴳⴰⵔ ⵏ 6 ⵉⴷ ⵎⵍⵢⵓⵏ ⵏ ⵎⵉⴷⴷⵏ ⴰⵔ ⵜ ⵜⴽⴽⴰⵏ ⴽⵔⴰⵢⴳⴰⵜ ⴰⵙⴳⴳⵯⴰⵙ. ⵍⵍⴰⵏ ⴽⵔⴰⴹ ⵉⵙⵡⵉⵔⵏ ⵏⵏⴰ ⵉⵥⴹⴰⵕ ⴰⴷ ⵜⵏ ⵉⴽⴽ ⵓⵎⵍⵓⵍⵍⵓⵢ, ⵡⴰⵍⵍⵉ ⴰⴽⴽⵯ ⵉⵖⵣⵣⵉⴼⵏ ⵉⴳⴰ ⵜ ⵡⵉⵙⵙ ⵙⵉⵏ ⵖ ⵉⴳⴳⵉ ⵏ ⵡⴰⴽⴰⵍ.
• ⵍⵓⴼⵔ ⵢⴰⵜ ⵜⴰⵙⵏⵏⵉⵖⵜ ⵏⵏⴰ ⵖ ⵍⵍⴰⵏ ⵉⴳⵉⵜⵏ ⵉⵏⴰⵥⵓⵕⵏ ⵉⵇⴱⵓⵔⵏ ⴱⴰⵀⵔⴰ ⵜⵜⵢⵓⵙⵙⴰⵏⵏⵉⵏ, ⵣⵓⵏ ⴷ ⵎⵓⵏⴰ ⵍⵉⵣⴰ ⴷ ⴼⵉⵏⵓⵙ ⴷⵓ ⵎⵉⵍⵓ. ⵜⴻⵜⵜⵢⵓⴱⵏⴰ ⵢⴰⴷⵍⵍⵉ ⵜⵓⵚⴽⴰ ⴼⴰⴷ ⴰⴷ ⵜⴳ ⵜⵉⴳⵎⵎⵉ ⵉ ⵉⴳⵍⵍⵉⴷⵏ ⵉⴼⵕⴰⵏⵙⴰⵡⵉⵢⵏ. ⵍⵓⴼⵔ ⵉⴳⴰ ⵜⵙⵏⵏⵉⵖⵜ ⵜⵉⵙⵙ ⴽⵔⴰⴹⵜ ⵍⵍⵉ ⴰⴽⴽⵯ ⵉⵎⵇⵇⵓⵔⵏ ⴳ ⵓⵎⴰⴹⴰⵍ, ⵙ ⵢⴰⵜ ⵜⵊⵓⵎⵎⴰ ⵏ 60,000 ⵉⴷ ⵎⵉⵜⵔ ⴰⵎⴽⴽⵓⵥ ⵏ ⵜⴷⴰⵍⴰ ⵏ ⵓⴼⵙⴰⵔ. ⵏⵜⵜⴰⵜ ⴰⴷ ⵉⴳⴰⵏ ⵜⵙⵏⵏⵉⵖⵜ ⵏ ⵜⵥⵓⵕⵉ ⵏⵏⴰ ⴷ ⴰⴽⴽⵯ ⵜⴽⴽⴰⵏ ⵎⵉⴷⴷⵏ ⵙ ⵓⴳⴳⴰⵔ ⵏ 5 ⵉⴷ ⵎⵍⵢⵓⵏ ⵏ ⵓⴼⴳⴰⵏ ⵍⵍⵉ ⵜ ⵉⴷ ⵉⵜⴽⴽⴰⵏ ⴽⵔⴰⵢⴳⴰⵜ ⴰⵙⴳⴳⵯⴰⵙ.
• ⵜⴰⵙⵏⵏⵉⵖⵜ ⵏ ⵓⵔⵙⴰⵢ ⵜⴽⴽⴰ ⵜⵜ ⵉⵏⵏ ⵜⴳⴰ ⵍⴰⴳⴰⵔ ⵖ ⵎⴰⴷ ⵉⵣⵔⵉⵏ, ⵎⴰⵛ ⵖⵉⵍ-ⴰⴷ ⵜⴳⴰ ⵜⴰⵙⵏⵏⵉⵖⵜ ⵏ ⵜⵥⵓⵕⵉ. ⵜⵓⴳⵜ ⵏ ⵉⴳⵉⵜⵏ ⴷ ⵜⵡⵓⵔⵉⵡⵉⵏ ⵏ ⵜⵥⵓⵕⵉ ⵏ ⵜⵙⵏⵏⵉⵖⵜ ⵏ ⵓⵔⵙⴰⵢ ⵜⵜⵢⵓⵙⴽⴰⵔⵏⵜ ⵖ ⵉⵙⴳⴳⵯⴰⵙⵏ ⴳⵔ 1848 ⴷ 1915. ⵜⴳ ⵜⴰⵎⵢⵏⵓⵜ ⵜⴰⵎⴰ ⵏ ⵜⵙⵏⵏⵉⵖⵜ ⵏ ⵍⵓⴼⵔ.
• ⴰⵣⵔⴳ ⴰⵣⴳⴳⵯⴰⵖ ⵉⴳⴰ ⵢⴰⵏ ⵓⴽⴰⴱⴰⵕⵉ ⵏⵏⴰ ⵖ ⵜⵜⵉⵍⵉⵏ ⴰⴳⵓⴷⵉ ⵏ ⵓⴼⵕⵕⵊ, ⵉⵕⵥⵎ ⵜⵉⴳⴳⵓⵔⴰ ⵏⵏⵙ ⵖ 1889 ⵖ ⵢⴰⵜ ⵜⵓⴷⴷⵓⵔⵜ ⵉⵙⵎ ⴰⵙ ⵎⵓⵏⵜⵎⴰⵔⵜⵔ, ⵢⴰⵜ ⵜⵓⴷⴷⵓⵔⵜ ⵖ ⴱⴰⵔⵉⵣ ⵉⵜⵜⵢⵓⵙⵙⴰⵏⵏ ⵙ ⵜⵓⴷⵔⵜ ⵏ ⵢⵉⴹ . ⵖ ⵓⵣⵔⴳ ⴰⵣⴳⴳⵯⴰⵖ ⴰⵔ ⵜⵜⵃⵓⵛⵏⵜ ⵜⵎⵖⴰⵔⵉⵏ ⵢⴰⵏ ⵡⴰⵏⴰⵡ ⵏ ⵓⵃⵡⴰⵛ ⴰⵔ ⴰⵙ ⵜⵜⵉⵏⵉⵏ ⴽⴰⵏⴽⴰⵏ ⴰⴼⵕⴰⵏⵙⴰⵡⵉ.
• ⴰⵙⵓⴽ ⵏ ⵛⴰⵏⵣⵉⵍⵉⵣⵉ ⵉⴳⴰ ⴰⵙⵓⴽ ⵍⵍⵉ ⴰⴽⴽⵯ ⵉⵜⵜⵢⵓⵙⵙⴰⵏⵏ ⵖ ⵜⵎⴷⵉⵏⵜ ⵏ ⴱⴰⵔⵉⵣ, ⵉⴳ ⵢⴰⵏ ⵖ ⵉⵙⵡⴰⴽ ⵍⵍⵉ ⴰⴽⴽⵯ ⵜⵜⵢⵓⵙⵙⴰⵏⵉⵏ ⴳ ⵓⵎⴰⴹⴰⵍ. ⵍⵍⴰⵏ ⴳⵉⵙ ⴽⵉⴳⴰⵏ ⵏ ⵉⴷⵖⴰⵔⵏ ⵏ ⵡⵓⵜⵛⵉ ⴷ ⵉⴳⴰⴷⴰⵣⵏ. ⵖ ⵜⵜⵎⵉ ⵏⵏⵙ ⴰⵔ ⵏⵜⵜⴰⴼⴰ ⵍⴰⵔⴽ ⴷⵓ ⵜⵔⵉⵢⵓⵎⴼ.
• ⵜⵉⵎⵣⴳⵉⴷⴰ ⵜⴰⵔⵓⵎⵉⵜ ⵏ ⵏⵓⵜⵔ ⴹⴰⵎ ⴷⵓ ⴱⴰⵔⵉⵣ, ⵜⴳⴰ ⵢⴰⵜ ⵜⵎⵥⵥⴰⵍⵓⵜ ⵜⴰⴽⴰⵜⵓⵍⵉⴽⵜ ⵜⴰⴳⵓⵜⵉⴽⵜ ⵉⵎⵇⵇⵓⵔⵏ, ⵍⵍⵉ ⴷ ⵕⵥⴰⵏ ⴳ 15 ⴰⴱⵔⵉⵍ 2019. ⵜⵍⵍⴰ ⵖ ⵜⴳⵣⵉⵔⵜ ⵏ ⵍⴰ ⵙⵉⵜⵉ.
• ⴱⴰⵣⵉⵍⵉⴽ ⵏ ⵙⴰⴽⵔⵉ ⴽⵓⵔ ⵜⴳⴰ ⵢⴰⵜ ⵜⵎⵥⵥⴰⵍⵓⵜ ⵜⴰⴽⴰⵜⵓⵍⵉⴽⵜ ⵉⵡⴰⵍⴰⵏ ⵉ ⵙⴰⴽⵔⵉ ⴽⵓⵔ.

• 
  ⴰⴳⵯⴷⴷⵉⵎ ⵏ ⵉⴼⵉⵍ
• 
  ⵜⴰⵙⵏⵏⵉⵖⵜ ⵏ ⵍⵓⴼⵔ
• 
  ⵍⴰⵔⴽ ⴷⵓ ⵜⵔⵉⵢⵓⵎⴼ
• 
  ⵉⵖⵔⵎ ⵏ ⵖⴰⵔⵏⵉⵀ
• 
  ⵏⵓⵜⵔ ⴷⴰⵎ ⵏ ⴱⴰⵔⵉⵣ

ⵉⵎⵣⴷⴰⵖⵏ

ⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⴱⴰⵔⵉⵣ (1800-2080)

ⵉⵍⴽⵎ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⵜⵎⴷⵉⵏⵜ ⵏ ⴱⴰⵔⵉⵣ 2,234,105 ⵏ ⵢⴰⵏ ⴳ ⵓⵙⵉⴹⵏ ⵏ ⵓⵙⴳⴳⵯⴰⵙ ⵏ 2009. ⵉⵖⵯⵍⵉ ⵙ 2,243,833 ⵓⵙⴳⴳⵯⴰⵙ ⵏ 2010. ⵎⴰⵛ ⵢⴰⴳⴳⵓⴳ ⵙⵓⵍ ⴼ ⵜⵎⵙⵍⵉⵡⵜ ⵜⴰⵎⵣⵔⴰⵢⵜ ⵍⵍⵉ ⵉⵍⴽⵎ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⵜⵎⴷⵉⵏⵜ ⵖ 1921. ⵍⵍⵉⵖ ⵉⵍⴽⵎ ⵡⵓⵟⵟⵓⵏ ⵏⵏⵙⵏ ⵓⴳⴳⴰⵔ ⵏ 2.9 ⵉⴷ ⵎⵍⵢⵓⵏ ⵏ ⵢⴰⵏ. ⵣⵖ ⵉⵎⵡⵓⵔⵉⵢⵏ ⵉⵎⵇⵇⵔⴰⵏⵏ ⵏⵏⴰ ⴷ ⵉⵙⵙⵍⴽⵎⵏ ⵉ ⵡⵓⴳⵓⵣ ⵏ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⵜⵎⴷⵉⵏⵜ ⴳⴰⵏ ⵜⵏ ⵡⵓⴳⵓⵣ ⵎⵇⵇⵓⵔⵏ ⵏ ⵡⴰⴷⴷⵓⴷ ⵏ ⵜⴰⵡⵊⴰ ⵜⴰⴱⴰⵔⵉⵣⵉⵜ, ⴷ ⵜⵎⵣⵡⴰⴳⵜ ⵏ ⵉⵎⵣⴷⴰⵖⵏ ⵉⵎⵇⵇⵓⵔⵏ ⵙ ⵉⴳⵍⴰⴳⴰⵍⵏ ⵏ ⵜⵎⴷⵉⵏⵜ ⵖ ⵉⵙⴳⴳⵯⴰⵙⵏ ⵏ 1960 ⴷ 1970. ⴳⴳⵓⵜⵏⵜ ⵜⵎⵏⵜⴰⵍ ⵏ ⵜⵎⵣⵡⴰⴳⵜ ⴰⴷ, ⵜⵉⵍⵍⵉ ⵅⴰⵜⵔⵏⵉⵏ ⵣⴳⵉⵙⵏⵜ ⴳⴰⵏ ⵜⵏⵜ ⵓⴳⵓⵣ ⵏ ⵓⵎⵓⵙⵙⵓ ⴰⵎⴳⵓⵔⴰⵏ ⴷ ⵜⴰⵜⵜⵓⵢⵜ ⵏ ⵡⴰⵜⵉⴳⵏ ⵏ ⵍⴽⵔⴰ ⴳ ⵜⵎⴷⵉⵏⵜ. ⵉⴽⴽⴰ ⵜⵜ ⵉⵏⵏ ⵓⴳⵓⵣ ⵏ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⵜⵎⴷⵉⵏⵜ ⵏ ⴱⴰⵔⵉⵣ ⵢⴰⵏ ⵖ ⵡⵉⵍⵍⵉ ⴰⴽⴽⵯ ⵉⵎⵇⵇⵓⵔⵏ ⴳ ⵡⴰⵏⴰⵡ ⵏⵏⵙ ⵏⴳⵔ ⵜⵎⴷⵉⵏⵉⵏ ⵏ ⵓⵎⴰⴹⴰⵍ; ⴰⵢⴰⵏⵏ ⴰⴼ ⵜⵙⴽⵔ ⵜⴰⵎⵙⵙⵓⴳⵓⵔⵜ ⵏ ⵜⵎⴷⵉⵏⵜ ⵜⵓⴳⴳⴰⵣ ⵎⵇⵇⵓⵔⵏⵉⵏ ⴰⴼⴰⴷ ⴰⴷ ⵜⵃⴰⴼⴹ ⴼ ⵉⵎⵣⴷⴰⵖⵏ ⵏ ⵜⵎⴰⵥⵓⵏⵜ ⵜⴰⴼⵔⴰⵏⵙⵉⵙⵜ, ⵜⵏⵊⵃ ⵉⵍⵎⵎⴰ ⴳⵉⵙ. ⴰⵢⴰⴷ ⴰⴷ ⵉⵎⵎⴰⵍ ⵓⵙⵏⵎⴽⵜⴰ ⵏ ⵢⵓⵍⵢⵓⵣ 2014 ⵍⵍⵉ ⵉⵎⵍⴰⵏ ⵢⴰⵜ ⵜⴰⵜⵜⵓⵢⵜ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ ⵏ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵉ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ ⵣⵖ 1954, ⵙ 2,144,700 ⵏ ⵓⴼⴳⴰⵏ.

ⴱⴰⵔⵉⵣ ⵜⴳⴰ ⵢⴰⵜ ⵖ ⵜⵎⴷⵉⵏⵉⵏ ⵏ ⵓⵎⴰⴹⴰⵍ ⵏⵏⴰ ⵖ ⴱⴰⵀⵔⴰ ⵉⵎⵇⵇⵓⵔ ⵓⵛⴽⵓⴽⵍ ⵏ ⵉⵎⵣⴷⴰⵖⵏ. ⴰⵔ ⵉⵜⵜⵉⵏⵉ ⵓⵙⵏⵎⴽⵜⴰ ⵏ 1999 ⵎⴰⵙ ⴰⵔ ⵉⵍⴽⴽⵎ ⵓⵛⴽⵓⴽⵍ ⵏ ⵉⵎⵣⴷⴰⵖⵏ ⵏ ⵜⵎⴷⵉⵏⵜ ⵉⵖ ⵓⵔ ⵏⵙⵙⵉⴹⵏ ⵜⴰⴳⴰⵏⵉⵏ ⵏ ⴱⵓⵍⵓⵏⵢⴰ ⴷ ⴼⴰⵏⵙⵏ 24,448 ⵓⴼⴳⴰⵏ/ⴽⵎ ⴰⵎⴽⴽⵓⵥ. ⵓⵔ ⵏⵥⴹⴰⵕ ⴰⴷ ⵏⵙⵎⵣⴰⵣⴰⵍ ⵡⵓⵟⵟⵓⵏ ⴰⴷ ⴰⴱⵍⴰ ⴷ ⴽⵔⴰ ⵏ ⵜⵎⴷⵉⵏⵉⵏ ⵎⵇⵇⵓⵔⵏⵉⵏ ⵏ ⴰⵙⵢⴰ, ⴷ ⵓⵍⴰ ⵎⴰⵏⵀⴰⵜⴰⵏ ⴳ ⵏⵢⵓⵢⵓⵔⴽ. ⴰⵎⵎⴰ ⵉⵖ ⵏⵙⵙⵉⴹⵏ ⵜⴰⴳⴰⵏⵉⵏ, ⵔⴰⴷ ⵉⴳ ⴰⴽⵓⴷ ⴰⵏⵏ ⵓⵛⴽⵓⴽⵍ ⵏ ⵉⵎⵣⴷⴰⵖⵏ 20,169 ⵓⴼⴳⴰⵏ/ⴽⵎ ⴰⵎⴽⴽⵓⵥ. ⵙ ⵎⴰⵢⴰⴷ ⴷⴰ ⵜⴳⴳⴰ ⴱⴰⵔⵉⵣ ⵜⵉⵙⵙ ⵙⵎⵎⵓⵙⵜ ⵖ ⵜⵉⴳⵔⴰⵡⵉⵏ ⵜⵉⴼⵔⴰⵏⵙⵉⵙⵏ ⵏⵏⴰ ⵖ ⵉⵎⵇⵇⵓⵔ ⵓⵛⴽⵓⴽⵍ ⴹⴰⵕⴰⵜ ⵍⵓ ⴱⵔⵉ ⵙⴰⵏⵜ ⵊⵉⵔⴼⵉⵀ, ⴼⴰⵏⵙⵉⵏ, ⵍⵓⴼⴰⵍⵡⴰ-ⴱⵉⵔⵔⵉ ⴷ ⵙⴰⵏⵜ ⵎⴰⵏⴷⵉ, ⴰⴷ ⵓⵔ ⵏⵜⵜⵓ ⵎⴰⵙ ⵜⴳⵔⴰⵡⵉⵏ ⴰⴷ ⴽⵓⵍⵍⵓ ⵜⵏⵜ ⵍⵍⴰⵏ ⵖ ⵓⴳⵏⵙ ⵏ ⵉⵡⵜⵜⴰ ⵏ ⵜⵎⴷⵉⵏⵜ.

ⵖ ⵓⵙⵉⴹⵏ ⵏ ⴱⴰⵔⵉⵣ ⵏ ⵉⵎⵣⴷⴰⵖⵏ ⵖ ⵓⵙⴳⴳⵯⴰⵙ ⵏ 1999, 19.4% ⵏ ⵉⵎⵣⴷⴰⵖⵏ ⵍⵓⵍⵏ ⵖ ⴱⵕⵕⴰ ⵏ ⴼⵕⴰⵏⵙⴰ. ⵣⵖ ⵓⵙⵉⴹⵏ ⴰⴷ ⵏⵉⵜ, 4.2% ⵏ ⵉⵎⵣⴷⴰⵖⵏ ⵏ ⵜⵙⴳⴰ ⵏ ⴱⴰⵔⵉⵣ ⵜⴰⵖⵔⵎⴰⵏⵜ ⴽⴽⴰⵏ ⵜⵜ ⵉⵏⵏ ⴳⴰⵏ ⵉⵎⵣⵡⴰⴳⵏ ⵉⵎⴰⵢⵏⵓⵜⵏ (ⵍⵍⵉ ⵏⵏ ⵉⵣⵓⴳⵏ ⴳⵔ ⵉⵙⴳⴳⵯⴰⵙⵏ ⵏ 1990-1999), ⵜⵓⴳⵜ ⵏⵏⵙⵏ ⴳⴰⵏ ⵣⵖ ⴰⵙⵢⴰ ⴷ ⵜⴼⵔⵉⵇⵜ. ⴷⴷⵔⵏ ⴽⵔⴰ ⵏ 37% ⵏ ⵉⵎⵣⵡⴰⴳⵏ ⵍⵍⵉ ⵉⵣⴷⵖⵏ ⵖ ⴼⵕⴰⵏⵙⴰ ⵖ ⵜⵙⴳⴰ ⵏ ⴱⴰⵔⵉⵣ. ⵜⴱⴷⴰ ⵜⴰⴹⴹⴰⵏⴳⴰ ⵏ ⵓⵣⵡⴰⴳ ⵜⴰⵎⴰⴹⵍⴰⵏⵜ ⵜⴰⵎⵣⵡⴰⵔⵓⵜ ⵙ ⴱⴰⵔⵉⵣ ⵖ ⵉⴷ ⵙⵉⵎⵔⴰⵡ ⵏ ⵜⴰⵙⵓⵜ ⵜⵉⵙⵙ ⵜⵥⴰ ⴷ ⵎⵔⴰⵡ ⵙ ⵓⴽⵛⵛⵓⵎ ⵏ ⵉⴼⵍⵍⴰⵃⵏ ⵏ ⵍⴰⵍⵎⴰⵏ ⵍⵍⵉ ⴷ ⵉⵔⵡⵍⵏ ⵣⵖ ⵜⴰⵙⵙⴰⵙⵜ ⵏ ⵣⵣⵉⵔⴰⵄⴰ ⴳ ⵜⵎⴰⵣⵉⵔⵜ ⵏⵏⵙⵏ. ⵜⴹⴼⴰⵕ ⵜ ⵏⵉⵜ ⵜⴰⴹⴹⴰⵏⴳⴰ ⵏ ⵓⵣⵡⴰⴳ ⵢⴰⵜ ⵉⴳⴳⵉ ⵏ ⵜⴰⵢⵢⴰⴹ ⴰⵔ ⵖ ⴰⵙⵙ ⴰⴷ ⵏ ⵉⵟⴰⵍⵢⴰⵏⵉⵢⵏ, ⵓⴷⴰⵢⵏ ⵏ ⵓⵔⵓⴱⴱⴰ ⵜⴰⵏⴰⵎⵎⴰⵙⵜ ⵍⵍⵉ ⴷ ⵉⵣⵓⴳⵏ ⵖ ⵓⵣⵎⵣ ⵏ ⵜⴰⵙⵓⵜ ⵜⵉⵙⵙ ⵜⵥⴰ ⴷ ⵎⵔⴰⵡ. ⵣⵖ ⴰⴽⵓⴷ ⴰⵏⵏ ⵓⵛⴽⴰⵏ ⴷ ⴷⴰⵖ ⵉⵔⵓⵙⵉⵢⵏ ⴹⴰⵕⵜ ⵜⴰⴳⵔⴰⵡⵍⴰ ⵏ 1917, ⵓⵍⴰ ⴰⵢⵜ ⴰⵔⵎⵉⵏⵢⴰ ⵉⵔⵡⵍⵏ ⵣⵖ ⵉⵎⵏⵖⵉ ⵏ ⴰⵔⵎⴰⵏ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏ ⵉⵄⵓⵜⵎⴰⵏⵉⵢⵏ. ⴰⵎⵎⴰ ⴳ ⵓⵣⵎⵣ ⵏ ⵉⵎⵏⵖⵉ ⴰⵎⴰⴹⵍⴰⵏ ⴰⵎⵣⵡⴰⵔⵓ, ⵉⵣⵓⵢⴷ ⴷⴰⵖ ⵓⵣⵡⴰⴳ ⵏ ⵉⵎⵣⴷⴰⵖⵏ ⵏ ⵜⵎⵉⵣⴰⵔ ⵍⵍⴰⵏⵉⵏ ⴷⴷⵓ ⵓⵙⴷⵓⵔⵔⵉ, ⵏⵏⵉⴳ ⵏ ⴰⵢⴰ ⵉⴱⵓⵍⵓⵏⵉⵢⵏ ⵖ ⵓⵣⵎⵣ ⵏⴳⵔ ⵉⵎⵏⵖⴰⵏ ⵙ ⵙⵉⵏ. ⵎⵏ ⴱⵄⴷ ⵓⵛⴽⴰⵏ ⴷ ⵉⵚⴱⵏⵢⵓⵍⵉⵢⵏ, ⵉⵟⴰⵍⵢⴰⵏⵉⵢⵏ, ⵉⴱⵔⵜⵇⵇⵉⵣⵏ ⴷ ⵉⵎⵣⴷⴰⵖⵏ ⵏ ⵜⴼⵔⵉⵇⵜ ⵏ ⵓⴳⴰⴼⴰ ⵖ ⵉⴷ ⵙⵎⵎⵓⵎⵔⴰⵡ ⴰⵔ ⵉⴷ ⵙⴰⵎⵔⴰⵡ ⵏ ⵜⴰⵙⵓⵜ ⴰⴷ ⵍⵍⵉ ⵉⵣⵔⵉⵏ, ⴹⴰⵕⵜ ⵏ ⵎⴰⵢⴰ ⵢⴰⵜ ⵜⴰⴹⴹⴰⵏⴳⴰ ⵏ ⵓⵣⵡⴰⴳ ⵏ ⵓⴳⴰⵢⵏ ⵏ ⵜⴼⵔⵉⵇⵜ ⵏ ⵓⴳⴰⴼⴰ ⴹⴰⵕⵜ ⵜⴰⵙⵉⵎⴰⵏⵜ ⵏ ⵜⵎⵉⵣⴰⵔ ⵏⵏⵙⵏ. ⴰⵎⵎⴰ ⵖⵉⵍ ⴰⴷ, ⵜⵓⴳⵜ ⵏ ⵉⵎⵣⵡⴰⴳⵏ ⴳⴰⵏ ⵣⵖ ⴰⵙⵢⴰ ⴷ ⵜⴼⵔⵉⵇⵜ.

ⵜⴰⵎⴷⵉⵏⵜ ⵏ ⴱⴰⵔⵉⵣ ⵜⴳⴰ ⵢⴰⵜ ⵜⵎⴷⵉⵏⵜ ⵜⴰⵄⵔⵔⵉⵎⵜ; ⵣⵖ ⴰⵢⵍⵍⵉ ⵉⵍⵍⴰⵏ ⵖ ⵓⵙⵉⴹⵏ ⵏ 2008, ⵜⴽⴽⴰ ⵜⵜ ⵉⵏⵏ ⵜⴳⵎⵉⴹⵉ ⵏ ⵉⵎⵣⴷⴰⵖⵏ ⵏ ⵜⵎⴷⵉⵏⵜ ⵏⵏⴰ ⴷⴰⵔ ⵇⵍ ⵎⵏ 35 ⵓⵙⴳⴳⵯⴰⵙ 46%. ⵜⴰⴳⵎⵉⴹⵉ ⴰⴷ ⵜⵣⵔⵉ ⵍⵎⵓⵄⴷⴷⴰⵍ ⴰⵏⴰⵎⵓⵔ ⵍⵍⵉ ⵉⴳⴰⵏ 41.8%.

ⴰⵙⵏⵖⵎⵙ

ⴱⴰⵔⵉⵣ ⵜⴳⴰ ⵜⴰⵎⴰⵣⵉⵔⵜ ⵏ ⴽⵉⴳⴰⵏ ⵏ ⵉⵖⵎⵉⵙⵏ ⴷ ⵜⵙⵖⵡⴰⵏ, ⵙ ⵓⵎⴷⵢⴰ ⵍⵓ ⵎⵓⵏⴷ, ⵍⵓ ⴼⵉⴳⴰⵔⵓ, ⵍⵉⴱⵉⵔⴰⵙⵢⵓⵏ ⴷ ⵍⵓ ⵏⵓⴼⵉⵍ ⵓⴱⵙⵉⵔⴼⴰⵜⵓⵔ ⴷ ⵡⵉⵢⵢⴰⴹ. ⴰⵔ ⵜⵜⵉⵣⵡⵓⵔⵏ ⵖ ⵢⵉⴳⵔ ⵏ ⵜⵥⵕⵉⴳⵜ ⴰⴱⴰⵔⵉⵣⵉ ⵉⵖⵎⵉⵙⵏ ⵏ ⵍⵓ ⵎⵓⵏⴷ ⴷ ⵍⵓ ⴼⵉⴳⴰⵔⵓ, ⵙⵉⵏ ⴰⴷ ⴰⵢⴷ ⵉⴳⴰⵏ ⵉⵖⵎⵉⵙⵏ ⵍⵍⵉ ⴰⴽⴽⵯ ⵉⵜⵜⵢⴰⵡⵙⵙⴰⵏⵏ ⵖ ⴼⵕⴰⵏⵙⴰ. ⵖⵎⴽ ⵍⵍⵉ ⵙ ⵜⵃⵜⴰⴹⴰⵏ ⴱⴰⵔⵉⵣ ⴰⵎⵎⴰⵙ ⵏ ⵜⵙⵏⵓⵔⴰⵢⵜ ⴼⵔⴰⵏⵙ ⴱⵔⵉⵙⵙ ⵣⵖ ⵜⵓⴷⴷⵎⴰ ⵏⵏⵙ ⴰⵙⴳⴳⵯⴰⵙ ⵏ 1835, ⵏⵜⵜⴰⵜ ⴰⴷ ⴰⴽⴽⵯ ⵉⵇⴱⵓⵔⵏ ⵖ ⵡⴰⵏⴰⵡ ⵏⵏⵙ ⵖ ⵓⵎⴰⴹⴰⵍ ⴷ ⵜⴰⴷ ⴰⴽⴽⵯ ⵉⵇⴱⵓⵔⵏ ⵖ ⴼⵕⴰⵏⵙⴰ ⴷ ⵢⴰⵜ ⵖ ⵜⵉⵙⵏⵓⵔⴰⵢ ⵜⵉⵏⵖⵎⴰⵙ ⵖ ⵓⵎⴰⴹⴰⵍ (ⵜⴰⵎⴰ ⵏ ⵔⵡⵉⵜⵔⵣ ⴷ ⴰⵙⵓⵛⵉⵜⴷ ⴱⵔⵉⵙⵙ). ⵖⵎⴽ ⵍⵍⵉ ⵙ ⵜⵃⵜⴰⴹⴰⵏ ⵓⵍⴰ ⴰⵎⵎⴰⵙ ⵏ ⵜⴱⴰⴷⵓⵜ ⵏ ⴼⵕⴰⵏⵙⴰ 24 ⵍⵍⵉ ⵉⵡⴰⵍⴰⵏ ⵉ ⵜⵏⴱⴰⴹⵜ ⵜⴰⴼⵔⴰⵏⵙⵉⵙⵜ.

ⵉⵍⵍⴰ ⵖ ⴱⴰⵔⵉⵣ ⵓⵍⴰ ⵡⴰⵎⵎⴰⵙ ⵏ ⵜⴱⴰⴷⵓⵜ ⵏ ⵜⴼ1, ⵏⵜⵜⴰⵜ ⴰⵢⴷ ⵉⴳⴰⵏ ⵜⴰⴱⴰⴷⵓⵜ ⵏⵏⴰ ⵖ ⴱⴰⵀⵔⴰ ⵜⵜⴼⵕⵕⴰⵊⵏ ⵉⴼⵕⴰⵏⵙⴰⵡⵉⵢⵏ, ⵏⵏⵉⴳ ⵏ ⴰⵢⴰ ⴰⴳⵓⴷⵉ ⵏ ⵜⴱⴰⴷⵓⵜⵉⵏ ⵢⴰⴹⵏⵉⵏ, ⵣⵓⵏ ⴷ: ⴼⵕⴰⵏⵙⴰ 2, ⴼⵕⴰⵏⵙⴰ 3, ⴼⵕⴰⵏⵙⴰ 4, ⴼⵕⴰⵏⵙⴰ 5, ⴽⴰⵏⴰⵍ ⴱⵍⵓⵙ, ⴱⴼⵎ ⴷ ⵓⴳⴳⴰⵔ. ⵖⵎⴽ ⵍⵍⵉ ⵙ ⵜⵃⵜⴰⴹⴰⵏ ⵓⵍⴰ ⵡⴰⵎⵎⴰⵙ ⵏ ⵕⴰⴹⵢⵓ ⵏ ⴼⵕⴰⵏⵙⴰ ⴰⵎⴰⴹⵍⴰⵏ.

ⴰⵙⵙⴰⵢ

ⴰⴱⵔⵉⴷ ⴰⵡⵔⴻⵔⵔⵉ ⵙ ⵓⵡⵔⴰⵖ, ⴰⴱⵔⵉⴷ ⴰ86 ⵙ ⵓⵥⵕⵡⴰⵍ ⴷ ⵓⴱⵔⵉⴷ ⵏ ⴼⵔⴰⵏⵙⵍⵢⴰⵏ ⵙ ⵓⵣⴳⵣⴰⵡ.

ⵜⵟⵟⴰⴼ ⴱⴰⵔⵉⵣ ⵉⵥⴹⵡⴰⵏ ⵏ ⵡⴰⵙⵙⴰⵢ ⵉⴱⵓⵖⵍⴰⵏ ⴽⵉⴳⴰⵏ, ⵙ ⵓⵎⴷⵢⴰ ⵏ ⵉⴱⵔⵉⴷⵏ ⵏ ⵡⵓⵣⵣⴰⵍ, ⵉⴱⵔⴱⵔⵉⴷⵏ ⴷ ⵉⵣⴰⴳⵯⵣⵏ. ⴰⵏⵎⴰⵍⵍⵓ ⵏ ⵡⴰⵙⵙⴰⵢ ⵏ ⵜⴳⵣⵉⵔⵜ ⵏ ⴼⵕⴰⵏⵙⴰ (ⵖ ⵎⴰⴷ ⵉⵣⵔⵉⵏ: ⴰⵏⵎⴰⵍⵍⵓ ⵏ ⵡⴰⵙⵙⴰⵢ ⴰⴱⴰⵔⵉⵣⵉ) ⴰⴷ ⵉⵖⵯⵉⵏ ⴷ ⵏⵜⵜⴰⵏ ⴰⴷ ⵉⵜⵜⴽⵍⴼⵏ ⵙ ⵓⵥⵟⵟⴰ ⵏ ⵡⴰⵙⵙⴰⵢ ⵖ ⵜⵙⴳⴰ. ⵉⵏⵏⵓⵕⵥⵎ ⵓⵥⵟⵟⴰ ⵏ ⵓⵎⵉⵜⵔⵓ ⴳ ⴱⴰⵔⵉⵣ ⴰⵙⴳⴳⵯⴰⵙ ⵏ 1900, ⵏⵜⵜⴰⵏ ⴰⴷ ⵉⴳⴰⵏ ⵡⴰⵎⵎⴰⴽ ⵏ ⵡⴰⵙⵙⴰⵢ ⵍⵍⵉ ⴰⴽⴽⵯ ⵉⵜⵜⵓⵙⵎⵔⴰⵙⵏ ⵖ ⵓⴳⵯⵏⵙ ⵏ ⵜⵎⴷⵉⵏⵜ ⵙ ⴽⵔⴰ ⵏ 9 ⵉⴷ ⵎⵍⵢⵓⵏ ⵏ ⵓⵎⵙⵙⵓⴷⵓ ⴽⵓ ⴰⵙⵙ. ⵉⵍⵍⴰ ⴳ ⵓⵎⵜⵔⵓ ⴰⴷ 300 ⵉⵙⵔⴰⵙ (384 ⵏ ⵜⵏⵇⵇⴰⴹ ⵏ ⵓⴱⴷⴷⴰⴷ) ⴷ ⵜⴼⴳⴳⵉⴳⵉⵏ ⴰⵔ ⵜⵍⴽⴽⵎ ⵜⵖⵣⵉ ⵏⵏⵙⵏⵜ 214 ⴽⵎ, 16 ⵏ ⵢⵉⵣⵔⵉⵔⴰⵏ ⴳⴰⵏ ⴰⵙⵏ ⵓⵟⵟⵓⵏⵏ ⵣⵖ 1 ⴰⵔ 14, ⵏⵏⵉⴳ ⵏ ⴰⵢⴰ ⵙⵉⵏ ⵢⵉⵣⵔⵉⵔⴰⵏ ⵢⴰⴹⵏⵉⵏ (3ⴱⵉⵙ ⴷ 7ⴱⵉⵙ), ⴷ ⵔⴻⵔ ⵖⴷ ⵏⵜⵜⴰ, ⵉⴳⴰ ⵢⴰⵏ ⵓⵥⵟⵟⴰ ⵏⵏⴰ ⵖ ⵍⵍⴰⵏ 5 ⵢⵉⵣⵔⵉⵔⴰⵏ ⵉⴼⵙⵙⵓⵙⵏ (ⴰ, ⴱ, ⵛ, ⴷ, & ⴻ) ⵏⵏⴰ ⵉⵍⴽⴽⵎⵏ ⵙ ⵢⵉⴷⵖⴰⵔⵏ ⵢⴰⴳⴳⵓⴳⵏ ⴼ ⵡⵉⴷ ⵣⵡⴰⵔⵏⵉⵏ, ⵢⵉⵍⵉⵏ ⴳⵉⵙⵏ 257 ⵏ ⵜⵏⵇⵇⴰⴹ ⵏ ⵓⴱⴷⴷⴰⴷ ⴷ ⵜⴼⴳⴳⵉⴳⵉⵏ ⵙ ⵢⴰⵜ ⵜⵖⵣⵉ ⵏ 587 ⴽⵎ. ⵖⵎⴽ ⵍⵍⵉ ⵙ ⵔⴰⴷ ⵙⵜⴻⵜⵎⵔⵏ 26.5 ⵉⴷ ⵎⵍⵢⴰⵔ ⵏ ⵢⵓⵕⵓ ⵖ ⵙⵏⴰⵜ ⵜⵎⵔⴰⵡⴰⵏⵉⵏ ⵍⵍⵉ ⴷ ⵢⵓⵛⴽⴰⵏ ⴼⴰⴷ ⴰⴷ ⵙⵙⵉⵎⵖⵓⵔⵏ ⴰⵥⵟⵟⴰ ⵏ ⵓⵎⵉⵜⵔⵓ ⵖ ⵉⴷⵖⴰⵔⵏ ⴷ ⵜⵎⵏⴰⴹⵉⵏ ⵍⵍⵉ ⵉⵙⵙⵓⵜⵍⵏ ⵉ ⴱⴰⵔⵉⵣ.

ⵜⵟⵟⴰⴼ ⴷⴰⵖ ⴱⴰⵔⵉⵣ ⴰⵥⵟⵟⴰ ⵏ ⵜⵔⴰⵎⵡⴰⵢ ⵏⵏⴰ ⵖ ⵍⵍⴰⵏ 4 ⵢⵉⵣⵔⵉⵔⴰⵏ: ⴰⵔ ⵉⵣⴷⴷⵉ ⵉⵣⵔⵉⵔⵉ ⴰⵎⵣⵡⴰⵔⵓ ⴳⵔ ⵙⴰⵏⵜ ⴷⵉⵏⵉⵙ ⴷ ⵏⵡⴰⵣⵉ ⵍⵓ ⵙⴽ, ⵡⵉⵙⵙ ⵙⵉⵏ ⴰⵔ ⵉⵣⵔⴰⵢ ⵣⵖ ⵍⴰ ⴷⵉⴼⵓⵏⵙ ⴰⵔ ⵉⵙⵉ-ⴼⴰⵍ ⴷⵓ ⵙⵉⵏⵏ, ⵡⵉⵙⵙ ⴽⵔⴰⴹ ⴳⵔ ⴱⵓⵏ ⴷⵓ ⵖⴰⵍⵉⵖⵍⵢⴰⵏⵓ ⴷ ⴱⵓⵔⵜ ⴷⵉⴼⵉⵍⵉ, ⵡⵉⵙ ⴽⴽⵓⵥ ⵣⵖ ⴱⵓⵏⴷⵉ ⴰⵔ ⵓⵍⵏⴰⵢ-ⵙⵓ-ⴱⵡⴰ. ⵖⵉⵍ ⵏⵉⵜ ⴰⵔ ⵜⵜⵅⴷⴰⵎⵏ ⵖ ⵓⵙⵏⴼⵍⵓⵍ ⵏ ⵙⵉⵏ ⵢⵉⵣⵔⵉⵔⴰⵏ ⵢⴰⴹⵏⵉⵏ.

ⵍⵍⴰⵏ ⵖ ⴱⴰⵔⵉⵣ ⴽⵔⴰⴹ ⵉⵣⴰⴳⵯⵣⵏ ⵉⴳⵔⴰⵖⵍⴰⵏⵏ: ⴰⵣⴰⴳⵯⵣ ⵏ ⵛⴰⵔⵍ ⴷⵓ ⴳⵓⵍ, ⴰⵣⴰⴳⵯⵣ ⵏ ⴱⴰⵔⵉⵣ ⵓⵔⵍⵉ, ⴰⵣⴰⴳⵯⵣ ⵏ ⵍⵓ ⴱⵓⵔⴳⵉⵜ, ⴷ ⵓⵍⴰ ⴰⵣⴰⴳⵯⵣ ⵏ ⴱⴰⵔⵉⵣ ⴱⵓⴼⵉ. ⵉⵣⴰⴳⵯⵣⵏ ⵉⵎⵇⵇⵔⴰⵏⵏ ⴳⴰⵏ ⵜⵏ ⴰⵣⴰⴳⵯⵣ ⵏ ⴱⴰⵔⵉⵣ ⵓⵔⵍⵉ ⵍⵍⵉ ⵉⵍⵍⴰⵏ ⴳ ⵉⴼⴼⵓⵙ ⵏ ⵜⵎⴷⵉⵏⵜ, ⴷ ⵓⵣⴰⴳⵯⵣ ⵏ ⵛⴰⵔⵍ ⴷⵓ ⴳⵓⵍ ⵍⵍⵉ ⵉⵍⵍⴰⵏ ⴳ ⵉⵥⵥⵍⵎⴹ ⴰⴳⵎⵓⴹⴰⵏ ⵏ ⵜⵎⴷⵉⵏⵜ ⴷ ⵏⵜⵜⴰⵏ ⴰⴷ ⵉⴳⴰⵏ ⴰⵎⵎⴰⵙ ⵏ ⵜⵎⵙⵙⵓⵔⵜ ⵏ ⵉⵔ ⴼⵔⴰⵏⵙ, ⵉⴳ ⵓⵍⴰ ⵢⴰⵏ ⵖ ⵉⵣⴰⴳⵯⵣⵏ ⵍⵍⵉ ⴰⴽⴽⵯ ⵉⵄⵎⵕⵕⵏ ⴳ ⵓⵎⴰⴹⴰⵍ.

ⵜⵟⵟⴰⴼ ⴱⴰⵔⵉⵣ ⴰⵥⵟⵟⴰ ⵏ ⵉⴱⵔⴱⵔⵉⴷⵏ ⵍⵍⵉ ⴰⴽⴽⵯ ⵢⵓⴼⵏ ⵖ ⴼⵕⴰⵏⵙⴰ. ⵙⵙⵓⵜⵍⵏ ⵉ ⵜⵎⴷⵉⵏⵜ ⴽⵔⴰⴹ ⵢⵉⴱⵔⴱⵔⵉⴷⵏ: ⴰⴱⵔⵉⴷ ⴰⵡⵔⴻⵔⵔⵉ, ⵍⵍⵉ ⵉⴹⴼⴰⵕⵏ ⴰⵣⴰⵣⵓ ⵏ ⵢⵉⵖⵔⵎⴰⵏ ⵏ ⵡⴰⵜⵜⴰⵢⵏ ⵏ ⴱⴰⵔⵉⵣ ⵏ ⵜⴰⵙⵓⵜ ⵜⵉⵙⵙ ⵜⵥⴰ ⴷ ⵎⵔⴰⵡ ⵃⴰⵇⵇⴰⵏ, ⴷ ⵓⴱⵔⵉⴷ ⴰ86 ⵍⵍⵉ ⵉⵍⵍⴰⵏ ⵖ ⵓⵏⵎⵉⵍⴰ ⴰⴳⵯⵏⵙⴰⵏ, ⴷ ⵓⴱⵔⵉⴷ ⵏ ⴼⵔⴰⵏⵙⵍⵢⴰⵏ ⵍⵍⵉ ⵉⵍⵍⴰⵏ ⵖ ⵓⵏⵎⵉⵍⴰ ⵏ ⴱⵕⵕⴰ. ⵜⴰⵎⴷⵉⵏⵜ ⴰⴷ ⴷⴰⵔⵙ ⵢⴰⵏ ⵓⵥⵟⵟⴰ ⵉⵎⵇⵇⵓⵔⵏ ⵏ ⵉⵖⴰⵔⴰⵙⵏ ⵉⵍⴽⴽⵎⵏ ⵓⴳⴳⴰⵔ ⵏ 2000 ⴽⵎ. ⵉⵥⴹⴰⵕ ⵢⴰⵏ ⴰⴷ ⵉⵍⴽⵎ ⵙ ⴱⵔⵓⴽⵙⵉⵍ ⵣⵖ ⴱⴰⵔⵉⵣ ⵖ ⵉⴳⴳⵉ ⵏ ⵡⴰⴽⴰⵍ ⵖ ⴽⵔⴰⴹⵜ ⵜⴰⵙⵙⴰⵄⵉⵏ, ⵙ ⴼⵔⴰⵏⴽⴼⵓⵔⵜ ⵖ ⵚⴹⵉⵚⵜ ⵜⴰⵙⵙⴰⵄⵉⵏ, ⵙ ⴱⴰⵔⵙⴰⵍⵓⵏⴰ ⵖ ⵙⵏⴰⵜ ⴷ ⵎⵔⴰⵡ ⵜⴰⵙⵙⴰⵄⵉⵏ, ⵙ ⵍⵓⵏⴹⵓⵏ ⵖ ⵙⵏⴰⵜ ⵜⴰⵙⵙⴰⵄⵉⵏ ⵖ ⵜⴰⵍⵎⴰⵛⵉⵏⵜ.

ⵜⴰⵙⴳⴰ ⵏ ⴱⴰⵔⵉⵣ ⵜⴳⴰ ⵢⴰⵜ ⵖ ⵜⵙⴳⵉⵡⵉⵏ ⵜⵉⴼⵔⴰⵏⵙⵉⵙⵏ ⵏⵏⴰ ⴱⴰⵀⵔⴰ ⵉⵙⵙⵎⵔⴰⵙⵏ ⵡⴰⵙⵙⴰⵢ ⵏ ⵡⴰⵎⴰⵏ, ⴰⵔ ⵙⵉⵙ ⵙⵙⵍⴽⴰⵎⵏ ⵙⵙⵍⵉⵄⵜ. ⵏⵖⵉⵢ ⴰⴷ ⵏⵍⴽⵎ ⵙ ⵡⴰⵙⵉⴼ ⵏ ⵍⵡⴰⵔ, ⵔⴰⵢⵏ, ⵔⵓⵏ, ⵎⵢⵓⵙ, ⴷ ⵛⵉⵍⴷⵜ, ⴷ ⵏⵖⵉⵢ ⴰⴷ ⵏⵍⴽⵎ ⵙ ⵉⵙⴰⴼⴼⵏ ⴰⴷ ⵣⵖ ⵉⵙⵍⴷⴰⵢⵏ ⵉⵣⴷⵉⵏ ⴷ ⵡⴰⵙⵉⴼ ⵏ ⵙⵉⵏⵏ.

ⵉⵎⵊⵕⵉⵜⵏ

• 1900 – ⵓⵔⴰⵔⵏ ⵓⵍⴰⵎⴱⵉⴽⵉⵢⵏ ⵡⵉⵙ 2 ⵏ ⵓⵏⴱⴷⵓ ⵓⵇⵄⴰⵏ ⵉⵎⵊⵕⵉⵜⵏ ⵏⵏⵙ ⵖ ⴱⴰⵔⵉⵣ.
• 1924 – ⵓⵔⴰⵔⵏ ⵓⵍⴰⵎⴱⵉⴽⵉⵢⵏ ⵡⵉⵙ 8 ⵏ ⵓⵏⴱⴷⵓ ⵓⵇⵄⴰⵏ ⵉⵎⵊⵕⵉⵜⵏ ⵏⵏⵙ ⵖ ⴱⴰⵔⵉⵣ.
• 1998 – ⴰⴽⵔⵡⴰⵙ ⵏ ⵓⵎⴰⴹⴰⵍ ⵏ ⵜⴽⵓⵔⵜ ⴼⵉⴼⴰ.
• 2024 – ⵓⵔⴰⵔⵏ ⵓⵍⴰⵎⴱⵉⴽⵉⵢⵏ ⵡⵉⵙ 33 ⵏ ⵓⵏⴱⴷⵓ ⵔⴰⴷ ⵓⵇⵄⵓⵏ ⵉⵎⵊⵕⵉⵜⵏ ⵏⵏⵙ ⵖ ⴱⴰⵔⵉⵣ.

ⵖⵔ ⵓⴳⴳⴰⵔ

• ⴰⵎⵉⵜⵔⵓ ⵏ ⴱⴰⵔⵉⵣ
• ⴼⵕⴰⵏⵙⴰ
• ⴰⵙⵉⴼ ⵏ ⵙⵉⵏⵏ

ⵜⵉⵙⵇⵇⴰⵏ ⵜⵉⴳⵔⴰⵖⵍⴰⵏⵏ

ⵜⵉⵎⴷⵉⵏⵉⵏ ⵜⵉⴽⵏⵉⵡⵏ ⴷ ⵜⵉⵙⵜⵎⴰⵜⵉⵏ

ⵣⵖ ⴰⵙⵙ ⵏ 9 ⴰⴱⵔⵉⵍ 1956, ⵓⵔ ⵜⴳⵉ ⴱⴰⵔⵉⵣ ⵜⴰⵎⴷⵉⵏⵜ ⵜⴰⴽⵏⵉⵡⵜ ⴷ ⵃⵜⵜⴰ ⴽⵔⴰ ⵏ ⵜⵎⴷⵉⵏⵜ ⵢⴰⴹⵏ ⴰⴱⵍⴰ ⴷ:

• ⵔⵓⵎⴰ, ⵟⵟⴰⵍⵢⴰⵏ, 1956

Seule Paris est digne de Rome ; seule Rome est digne de Paris. (ⵙ ⵜⴼⵔⴰⵏⵙⵉⵙⵜ)

Solo Parigi è degna di Roma; solo Roma è degna di Parigi. (ⵙ ⵜⴰⵟⴰⵍⵢⴰⵏⵉⵜ)

« ⴱⴰⵔⵉⵣ ⴽⴰ ⴰⴷ ⵉⵍⵍⴰⵏ ⵖ ⵓⵙⵡⵉⵔ ⵏ ⵔⵓⵎⴰ ; ⴷ ⵔⵓⵎⴰ ⴽⴰ ⴰⴷ ⵉⵍⵍⴰⵏ ⵖ ⵓⵙⵡⵉⵔ ⵏ ⴱⴰⵔⵉⵣ. »

ⵉⵙⴰⵖⵓⵍⵏ

ⴽⵓⵎⵎⵓⵏⵙ ⵢⴰⵏ ⵖ ⵉⵙⵏⴼⴰⵕⵏ ⵏ ⵡⵉⴽⵉⵎⵉⴷⵢⴰ ⵜⵓⴼⵉⵜ ⴰⴷ ⴳⵉⵙ ⵜⴰⴳⴳⵯⵜ: ⴱⴰⵔⵉⵣ.