Universal Declaration o Human Richts

The Universal Declaration o Human Richts (UDHR) is a declaration adoptit by the General Assembly o the Unitit Nations (10 December 1948 at Palais de Chaillot, Paris). The Guinness Book of Records describes the UDHR as the "Maist Translate Document" in the warld. The Declaration cam aboot direct frae the experience o the Seicont Warld War an represents the first global expression o richts that aw bodies is inherently enteetelt. It conseests o 30 airticles that haes been elaboratit in follaein internaitional treaties, regional human richts instruments, naitional consteetutions an laws.

The UDHR wis pitten ower intae Scots for tae merk the 60t anniversar o the settin furth o the document.

Human richts setten oot in the Declaration

The richts setten oot by the declaration. (Taen direct frae Amnesty International's offeecial Scots translate)

Airticle 1

Aw sowels is born free and equal in dignity and richts

Airticle 2

Awbody, makkin nae distinctions whitsaever, is entitelt til aw the richts and freedoms furthset in this Declaration

Airticle 3

Awbody hes the richt tae life, liberty and bield

Airticle 4

Nane sall be hauden in thirldom or under thoums. Thirldom and trade in thirlt folk sall be clean forbid in aw its kinds

Airticle 5

Nane sall be pit tae torture or thole cruel, inhuman or bemeanin haunlin or punishment

Airticle 6

Awbody hes the richt in ilka place tae be kent as a body afore the law

Airticle 7

Aw are equal afore the law and entitelt wi nae fauts or favours tae the exact same bield o the law

Airticle 8

Awbody hes the richt tae wyce legal remeid gin their richts isna respectit

Airticle 9

Nane maun thole wulsome arrest, detention nor exile

Airticle 10

Awbody chairged wi a crime is entitelt, ilkane exactly the same, tae fair ba’s in a public hearin by an independent and uncoggled tribunal

Airticle 11

Awbody hes the richt tae be thocht innocent til pruved guilty accordin tae law

Airticle 12

Nane maun thole wulsome dackers on their privacy, faimily, hame or communings, nor assauts on their renoun

Airticle 13

Awbody hes the richt tae traivel freely and bide inwith the mairches o ony state, and the richt tae win oot frae and back intil their countrie

Airticle 14

Awbody hes the richt tae seek and tae enjoy in ither countries asylum frae persecution

Airticle 15

Awbody hes the richt tae be of a nation

Airticle 16

Men and wemen that’s come of eild hes the richt tae wed and stert a faimily, wi free and ful consent and wi ilkane the exact same richts in or efter mairriage

Airticle 17

Awbody hes the richt tae haud guids and gear

Airticle 18

Awbody hes the richt tae freedom o thocht, conscience and religioun

Airticle 19

Awbody hes the richt tae freedom o opinioun and expression, and tae seek, get and gie wittings and conceits throu ony medium heedless o frontiers

Airticle 20

Awbody hes the richt tae freely forgether and associate wi lown intents

Airticle 21

Awbody hes the richt tae tak a haun in the governance o their countrie. The wull o the people expressed throu elections sall be the grunds for the authority o government

Airticle 22

Awbody, as a body in society, hes the richt tae win til theirsels the social, cultural and economic richts that maun be haen for their dignity

Airticle 23

Awbody hes the richt tae daily darg, tae free choice o wark, tae fair and equal pey, and tae mak and jyne trades unions

Airticle 24

Awbody hes the richt tae saucht and leisure

Airticle 25

Awbody hes the richt til a standart o life fit for their guid health and heal, especially mithers and bairns

Airticle 26

Awbody hes the richt tae learnin, includin free compulsory primary scuil

Airticle 27

Awbody hes the richt freely tae tak a pairt in the cultural life o the commonty, tae brook and enjoy the airts and the guid that comes o advances in science, and tae hae their ain moral and material interests for their ain creative wark weel-hained

Airticle 28

Awbody maun hae a social and international order whaur aw thir richts and freedoms is weel-haint

Airticle 29

Awbody hes duties tae the commonty: the state can ainly pit branks on a body’s richts tae mak respect for the richts and freedoms o ithers siccar

Airticle 30

Nae governments, groups or lane bodies can mank ony o thir richts and freedoms.

Fremmit airtins

• The Universal Declaration o Human Richts in Scots