Archivo Nashonal Kòrsou
Fecha di fundashon òf kreashon | 26 ougùstùs 1969 ![]() |
---|---|
Pais | Kòrsou ![]() |
Situá na teritorio administativo | Kòrsou ![]() |
Lokalisá na | Skálo ![]() |
Koordinato geográfiko | 12°6′14″N 68°55′25″W ![]() |
Adres | Scharlooweg 77, Willemstad ![]() |
Wèpsait ofisial | https://www.nationaalarchief.cw ![]() |
![Map](https://maps.wikimedia.org/img/osm-intl,10,12.104,-68.923722222222,266x266.png?lang=pap&domain=pap.wikipedia.org&title=Archivo_Nashonal_K%C3%B2rsou&groups=_b589427a14b459d3c81f7ff365dd84c96a4ef335)
Archivo Nashonal Kòrsou òf Archivo Nashonal (ANK) ta e archivo nashonal di Kòrsou. E archivo nashonal ta maneha e archivo di pais Kòrsou i di su antesesor legal, Antias Hulandes. Di e archivonan relashoná ku Antias Hulandes komo antesesor legal, tin mas o ménos 25 kilometer sin selekshon. Di e archivonan ku ta relashoná ku Kòrsou, esaki ta suma mas o ménos 15 kilometer.[1] ANK ta manehá mas o menos 4 kilometer di dokumento, mapa, dibuho, foto, negativo, diapositivo i videonan ku ta disponibel via e sala di estudio i (partialmente) riba e wèpsait.[2] E archivo ta situá for di 1986 na Scharlooweg 77 den e edifisio monumental, Bolo di Batrei, ku ta data di 1916. Patrás di e edifisio aki a traha na 2011 un edifisio moderno komo depósito, entre otro pa alohá e archivonan di Antia Hulandes i Teritorio Insular di Kòrsou te ku aña 1995.[3]
Historia
[editá | editá fuente]Antesesor di Archivo Nashonal tabata e Archivo Sentral Históriko (ASH), fundá 26 di ougùstùs 1969 i ku tabata resortá bou di minister di Asuntunan General di Antia Hulandes.[4] Archivo Sentral Históriko tabatin komo enkargo pa mantené dokumentonan di gobièrnu den un estado bon i ordená, ku e meta pa pone nan disponibel na públiko i gobièrnu. Durante e promé periodo, e periodo di transishon di informashon di gobièrnu, a opta pa traspasá tur e dokumentonan te ku 30 aña bieu pa ASH. Na 1969 a traspasá tambe tur dokumentu di gobièrnu, di e periodo 1828 pa 1939, pa ASH. Na aña 1989 a keda aprobá e promé Ordenansa di Archivo[5], den kua a stipulá un oumento di e periodo di traspaso di dokumento pa ASH pa 40 aña. Den e adaptashon di e Ordenansa di Archivo na 2008, e término a wòrdu redusí na 20 aña i asina den liña ku e términonan internashonal di publikashon. Na momentu ku e departamentonan di gobièrnu traspasá nan archivonan selekshoná pa ASH, outomátikamente esakinan ta bira públiko.
Archivo Nashonal ta miembro di e asosiashon regional di 'Nationale Archivarissen uit de Caribische regio' (CARBICA) i tambe di 'International Council on Archives' (ICA). Riba nivel lokal e ta traha huntu ku Fundashon Amigunan di Archivo (Vrienden van het Archief). Tur kuartal e fundashon ta publiká un edishon dje revista, “De Archiefvriend”, konsistiendo di un kompilashon di artíkulonan históriko, mayoria di nan skibí for di fuentenan di archivo.
Lanternu
[editá | editá fuente]Desde 1986 ASH ta publiká e revista Lantèrnu, ku e meta pa stimula konosementu di historia i skirbimentu di historia (historiografia) di Antia Hulandes ku énfasis riba e uso di fuentenan di archivo relashoná ku historia antiano.[6] E publikashon ta aparesé dos biaha pa aña. Algun kolaboradó di redashon ta(bata) Nolda Römer-Kenepa, M.R. Francisco-Granviel i G.S. Joubert.[7]
Kolekshon
[editá | editá fuente]E kolekshon ta aksesibel pa un parti importante via inventarionan[8] i ta kontené archivonan di gobièrnu sentral di eks-Antia Hulandes i material di institushonnan privá. Den un parti di e inventarionan tambe ta disponibel skènnan di e dokumento di archivo. Por ehèmpel den e Archivo di e hefenan di e di tres, di kuater i di sinku distritonan Kolekshon Juliana-Brenneker.[9] Un parti di e potretnan ta aksesibel via e banko di imagen[10] di e Archivo Nashonal. Pa investigashon di pal’i famia[11] tin mas ku 800.000 nòmber ku por buska riba internet, i tambe skèn di e aktonan original. For di ougùstùs 2020 tambe e 'Registronan di katibu di Kòrsou' (1829-1863) a bira digitalmente disponibel[12], e kolekshon di 25.000 nòmbernan aki tambe por wòrdu konsultá via e wèpsait.[13] Den e kolekshon tin tambe e "Catecismo Corticu", e buki di mas bieu imprimí na Papiamentu i publiká na 1837. Na 2009 e katekismo aki a keda agregá na e registro 'Memory of the World'.[14]
Link eksterno
[editá | editá fuente]Fuente, nota i/òf referensia
|