Rudy Croes
Wak Croes (pagina di referencia) pa un otro nificacion di topico.Hyacintho Rudolfo (Rudy) Croes (☆ 5 di september 1947 na Aruba – † 20 di november 2021 na Oranjestad) tabata un politico Arubiano. E tabata Minister di Husticia di 1993 te 1994 y di 2001 te 2009. Como minister e tabata tambe encarga ku e cartera di deporte di 1993 pa 1994. Na 2005, prome di a keda nombra minister, e tabata brevemente presidente di Parlamento di Aruba.
| Rudy Croes | ||
|---|---|---|
| Imagen desea: Rudy Croes | ||
| Informacion basico | ||
| Nacemento | 5 di september 1947 Aruba | |
| Fayecimento | 20 di november 2021 Oranjestad | |
| Pais |  Aruba
| |
| Partido | MEP | |
| Funcion | ||
| 1989-1993 | Miembro di Parlamento di Aruba | |
| 1993-1994 | Minister di Husticia y Deporte | |
| 1994-2001 | Miembro di Parlamento di Aruba | |
| 2001-2009 | Minister di Husticia | |
| [Edita Wikidata] · [Manual] | ||
Biografia
editáRudy Croes tabata un di e diesdos yiu di Francisco Cornelio (Panchico) Croes y Maria Louisa (Mimita) Croes-Lopez. Su rumannan mayor Betico Croes y Hendrik Croes tabata politico prominente di partido MEP y e lucha pa Status Aparte di Aruba. Tres di su sobrinonan tambe a scoge un carera politico: Paul Croes, Glenbert Croes y Evelyn Wever-Croes.
Despues di su enseñansa basico na Colegio San Jose y Tarcisius College Croes a sigui MULO na Hulanda. El a continua su estudio na Analistenschool na Oss, Hulanda, graduando na 1969. Na Aruba e ta cuminsa su carera profesional como bio-analista na Landslaboratorium na Playa, kedando den servicio te 1989. Entre 1973 y 1974 e tabata traha tambe como hefe di laboratorio y produccion na LETI Laboratorios na Caracas.[1]
Na 1989, despues di e fayecimento di Betico Croes, Croes ta aparece pa prome biaha riba lista di MEP como candidato number 5. E ta obtene 4707 voto personal, surpasando e cantidad di voto di e number uno riba e lista.[2] E ta bira miembro di Parlamento di Aruba di 1989 te 1993. Despues di eleccion na 1993 Croes ta asumi e encargo di Minister di Husticia y Deporte den Gabinete Oduber II, como sucesor di su ruman Hendrik Croes. E tabata un defensor ferviente di uso di Papiamento y den su funccion como minister ta cambia tur e nombernan di su departamentonan di idioma Hulandes pa Papiamento. Despues di eleccion na 1994 e ta bolbe como miembro di parlamento te 2001. Na 2005 el a yega di fungi brevemente como presidente di parlamento. Di 2001 pa 2009 e ta ocupa e funcion di Minister di Husticia den Gabinete Oduber III y IV. Den e periodo aki ta tuma lugar e caso di disaparicion di Natalee Holloway y na 2008 Croes ta declara e sospechoso Joran van der Sloot "persona non grata".[3] Regularmente e tabata pega tambe cu e gabinete hulandes bou di Jan Peter Balkenende.[4] Na 2007 e ta declara cu Aruba mester corta tur laso cu Hulanda, pero despues ta hala atras. Croes ta bandona politica activo na 2009, pero ta keda e di dos den rango denter di partido MEP i tabata te na su morto un consehero importante di Evelyn Wever-Croes, premier di Aruba desde fin di 2017.[4]
Croes tabata co-fundador di MEP y a para fiel tras di e lucha di Status Aparte di Aruba. Na 1995 e ta postula su mes pa lider di partido, pero finalmente ta hala atras como contracandidato di Nel Oduber.[5] Entre 1996 y 1998 e tabata presidente di MEP. Croes tabata e prome Arubiano cu a fungi como vicepresidente di e Conferencia Permanente de Partidonan Politico di Latina América y Caribe (COPPPAL).
Na 2018 Croes ta publica e buki E hombr’i pueblo, un autobiografia di su trayectorio politico. E titulo aki ta referi na e nomber politico cu el a haya ora cu el a drenta arena politico.
Croes tabata co-fundador y integrante di e grupo musical "Grupo di Betico", conoci pa su participacion na varios festival di dande. E tabata canta, toca wiri y cuarta.[6] Despues di tabata sufri di cancer lympatico desde 2016 Croes ta fayece na 2021 na edad di 75 aña.[4] E tabata casa cu Damia Arends y tabata tata di cuater yiu.
Honor
editáCroes a ricibi na 1995 un condecoracion real como Cabayero ("ridder") den Orden di Leon Hulandes. Como protesta contra e trato di e islanan Caribense-Hulandes dor di politico di Hulanda e ta debolbe e medaya na 2020.[7] Dia 8 di november 2024 a duna e nomber Avenida Hyacintho Rudolfo (Rudy) Croes na e caminda cu ta cuminsa na rotonde di Santa Cruz y termina na rotonde banda di ex Drive Inn.[8]
Fuente, nota i/òf referensia
|