Lanamesa

Lanamesa qu'ei ua comuna situada en departament deths Hauts Pirenèus e era region de Miegjorn-Pirenèus.

Eths principaus quartièrs dera vila

-Eth centre, bastit ath torn dera maison comuna e dera glèisa Sent Joan Batista, qu'ei eth còr istoric dera vila e qu'estó arrenavada hè un detzenat d'annadas. Atau, era nava plaça deths Dreits deth Òmi e deth Ciutadans on òm tròba eth ofici deth torisme e que hè fàcia ath recent quiòsc qu'ei un lòc major deras animacions e deras manifestacions dera vila. Era carrèra Tièrs (Thiers), carrèra centrau, qu'ei era mes comerçanta dera comuna e presenta era entrada dera galaria comerciau Paul Bert. Quitament, qu'avem era plaça dera Pòsta, tanben arrehèta que presenta duas honts e eth monument aths morts deras granas guèrras

-Eths Bortolets, ath torn deth baloard deths Tilhs e près dera gara S.N.C.F., que's plaça en haut d'un cantau que domina eth centre e se desplega ath torn d'un larg boloard bordat d'arbos.

-Eth Gueriçà, quartièr pro recent ath sud dera ciutat, que's plaça en bòrd deth bòsc dera Plantada e deth canau dera Nèsta. Qu'ei sustot bastit d'ostaus individuaus bordant nombrós espacis verds.

-Las Moliàs. Ath nòrd, eth quartièr "deths molins" ath torn dera "cité des bans", deth collègi, qu'ei en mutacion gràcias ara construccion de navas parcèlas e d'un centre medicosociau.

-Eths Barraquets qu'ei un bordalat ancian situat ath extrèm nòrd dera comuna.

-Era "Mieja Lua", gròs bordalat ath escart dera vila situat ath èst d'aquesta sus era rota de Tolosa, qu'ei bastit a costat deth gran Parc de Receranças deth barri, bordant eth canau dera Nèsta, eth Gòlf e eth complèxe espitalèr de Lanamesa.

-Pèirahita. Adès tèrra de lanas ath extrèm sud dera comuna, qu'ei uei ua zòna industriau e comerciau en plen desvolopament.