Gadolini
Lo gadolini es l'element quimic de numerò atomic 64 e de simbòl Gd. De la familha dei lantanids, fa partida dei tèrras raras e a donc de proprietats quimicas ais autreis elements d'aqueu grop, en particular la capacitat de prendre l'estat d'oxidacion (+III) per formar l'ion Gd3+. Lo gadolini es egalament un dei quatre elements qu'es naturalament ferromagnetic. Dins la natura, existís pas a l'estat natiu, mai se tròba frequentament dins de mineraus coma la monazita ò la bastnäsita. A l'estat pur, es un metau gris argentat que s'oxida rapidament en preséncia d'umiditat.
Lo gadolini pur es pauc perilhós per leis organismes vivents, mai son ion Gd3+ es fòrça toxic car pòu intrar en concurréncia amb lo calci dins mai d'una reaccion metabolica. Pasmens, a d'aplicacions variadas coma agent de contrast en imatjariá medicala, element permetent de melhorar la duretat de certaneis aciers, fònt d'emissions lasèr e absorbent neutronic dins certanei reactors nuclears. Intra tanben dins la fabricacion de materiaus supraconductors ò fluorescents.