Sogndalsfjøra

«Sogndal» omdirigerer hit. For kommunen, sjå Sogndal kommune.

Sogndalsfjøra
stad
Sogndalsfjøra sett frå Åberge.
Land	Noreg
Fylke	Vestland
Kommune	Sogndal
Areal	2,1 km²
Folketal	4 324  (2023)
Folketettleik	2 059 / km²
Postnummer	6853 SOGNDAL
Innbyggjarnamn	sogndøl
Preposisjon	i Sogndalsfjøra
Ferdselsårer
Sogndalsfjøra 61.225555555556°N 7.1016666666667°E / 61.225555555556; 7.1016666666667
Wikimedia Commons: Sogndalsfjøra

Sogndalsfjøra er ein tettstad og administrasjonssenteret i Sogndal kommune med 4 324 innbyggjarar per 1. januar 2023.

Tettstaden ligg på vestsida av Sogndalsfjorden, ein nordgåande arm av Sognefjorden. Sogndalsfjøra er eit skolesentrum med Høgskolen i Sogn og Fjordane, vidaregåande skule og folkehøgskule. Her er også idretts- og symjehall i området rundt Fosshaugane Campus. Stiftelsen Vestlandsforsking held også til her. Staden er elles eit viktig handelssenter for midtre og indre delar av Sogn.

Sogndalsfjøra har kontor for Sogn og Fjordane tingrett. I tettstaden kryssar riksveg 5 (Lærdal–Florø) og riksveg 13 frå Hella. Lerum Konserves, som er den største norske produsenten av saft og syltetøy, låg her i perioden 1920–2018 før han flytta til nabobygda Kaupanger. Vidare finst sagbruk og trevareindustri, slakteri, fleire hotell og monaleg turisttrafikk.

Det finnes ein del gamal, verdifull byggningsmasse langs fjorden i sentrum. Nyare bustader ligg for ein stor del på austsida av fjorden. Sogndal lufthamn på Haukåsen ligg ti kilometer sør for tettstadefd.

Sogndalsfjøra vert no til dels brukt om heile sentrumsområdet i Sogndal, men Fjøra var opphavleg området som ligg mellom Gravensteinsgata (Riksveg 5) og fjorden, på nordsida av Dalaelvi. Heilt nede ved fjordfjøra ligg Dampskipskaia med ein liten kafe som har uteservering og matsal. Like ved går Fjordstien som går langs fjordkanten i Sogndalsfjøra og knyter sentrum saman med den nye Osenbrui.

Folketalsutvikling

Folketalsutvikling på Sogndalsfjøra
År			Innbyggjarar
1865			420
1875			459
1890			441
1900			431
1910			522
1920			553
1930			553
1946			677
1950			626
1960			1 513
1970			2 202
1980			2 502
1990			2 683
2000			2 653
2009			3 208
2012			3 455
Kjelder: SSB: Norske folketeljingar

Bilete

• 
  Dampskipskaia
• 
  Sognahallen
• 
  Loftesnesbrua
• 
  Kveld i Sogndalsfjøra

Kjelder

«Sogndalsfjøra» i Store norske leksikon, snl.no.

Bakgrunnsstoff

• Aage Engesæter: «Sogndalsfjøra» på nettstaden til Sogn og Fjordane Fylkesarkiv
• Eldre fotografi frå Sogndal på nettstaden til Nasjonalbiblioteket