Antonio Vivaldi
| Antonio Vivaldi | |
|---|---|
 Grabura de François Morellon de la Cave | |
| Anformaçon giral | |
| Alcunha | Vivaldi |
| Data de nacimiento | 4 de márcio de 1678 |
| Ourige | Beneza, Eitália |
| Paíç |  Eitália
|
| Acupaçon(es) | Músico Cumpositor |
| Strumiento(s) | Biolino |
| Período an atebidade | 1705–1741 |
Antonio Lucio Vivald (Beneza, 4 de márcio de 1678 — Biena, 28 de júlio de 1741) fui un cumpositor i músico eitaliano de l stilo barroco tardio. Tenie la nomeada de il prete rosso ("l padre burmeilho") por ser un cura de pelos ruibos.[1] Cumpuso 770 obras, antre las quales 477 cuncertos i 46 óperas. Ye subretodo coincido popularmente cumo outor de la série de cuncertos para biolino i ourquestra Le quattro stagioni ("Las Quatro Staçones")[2]
Biografie
[eiditar | eiditar código-fuonte]Filho de Camila Calichio i Giovanni Battista Vivaldi , era l mais bielho de siete armanos.[2] Sou pai, un barbeiro, mas tamien un talentoso biolenista (alguns chégan a cunsidrá-lo cumo un birtuoso), ajudou-lo a ampeçar ua carreira ne l mundo de la música, matriculando-lo inda pequeinho, na Capielha Ducal de San Marcos para aperfeiçoar sous coincimientos musicales [3] i fui respunsable pula sue admisson na ourquestra de la Basílica de San Marcos, adonde se tornou l maior biolenista de l sou tiempo. An 1703, Vivaldi tornou-se padre. An 1704, fui-le dada çpensa de la celebraçon de la Santa Eucaristia debido a la sue salude fragelizada (aparentemente sofrerie d'asma), tenendo-se bultado pa l'ansino de biolino nun uorfanato de moças chamado Ospedale della Pietà an Beneza. Pouco tiempo passado l ampeço nestas nuobas funçones, ls ninos ganhórun-le apreço i stima; Vivaldi cumpuso para eilhas la maiorie de ls sous cuncertos, cantatas i músicas sagradas. An 1705 la purmeira coleçon (racolta) de ls sous trabalhos fui publicada. Muitos outros se le seguíran. Ne l uorfanato, zampenhou dibersos cargos anterrompidos solo pulas sues muitas biaiges. An 1712 cumpuso l "Stro armonico", ua coleçon de 12 cuncertos que repercutiu an toda la Ouropa i mais tarde tubo seis obras trascritas por Bach, an 1713, tornou-se respunsable pulas atebidades musicales de l'anstituiçon. An paralelo cun sues atebidades sacras, Vivaldi oubtubo permisso para apersentar ne l triato de Santo Ángelo sues purmeiras óperas i alguns cuncertos: "Outtone in villa" i "Orlando Furioso" i antre outros cuncertos, "La Stravaganza"..[2] An 1723 publicou l Opus 8, que cuntén "Las Quatro Staçones", sue obra mais coincida.
Anque de l sou statuto de sacerdote, ye suposto tener tenido bários causos amorosos, un de ls quales cun ua de sues alunas, la cantora Anna Giraud,[3] cun quien Vivaldi era suspeito de mantener ua menos clara atebidade comercial nas bielhas óperas benezianas, adatando-las solo lhigeiramente a las capacidades bocales de la sue amante. Este negócio causou-le alguns dissabores cun outros músicos, cumo Benedetto Marcello, que terá scrito un panfleto contra el.
Obra
[eiditar | eiditar código-fuonte]Vivaldi fui rialmente un cumpositor perdutibo i sue fama debe-se subretodo a la cumposiçon de las seguintes obras:[2]
- Cuncertos: Hai dibergéncias subre l númaro eisato de cuncertos cumpuostos por Vivaldi. Alguas publicaçones cúntan 550 cuncertos cumpuostos por el.[1] An outras publicaçones, cita-se 477 cuncertos i outros inda 456.[2] Sous cuncertos mais coincidos i dibulgados son Le quattro stagioni (Las quatro staçones).
- 46 óperas,
- 44 motetos,
- sinfonias,
- 2 serenatas,
- 73 sonatas,
- 100 árias
- 30 cantatas
- música de cámara (mesmo se alguas sonatas para fraita, cumo Eil Pastor Fido, le téngan sido mal atribuídas, anque cumpuostas por Nicolas Chédeville),
- música sacra - trés ouratórios (Oratorio Juditha Triumphans, cumpuosto pa la Pietá; dous Gloria; Stabat Mater; Nisi Dominus; Beatus Vir; Magnificat; Dixit Dominus i outros).
Menos coincido ye l fato de l mais de l sou repertório tener sido çcubierto solo na purmeira metade de l seclo XX an Turin i Génoba, mas publicado na segunda metade. La música de Vibaldi ye particularmente einobadora, quebrando cula tradiçon cunsulidada an squemas; dou brilho a la strutura formal i rítmica de l cuncerto, repetidamente percurando cuntrastes harmónicos, ambentando melodies i cachos oureginales.
Para alhá desso, Vivaldi era francamente capaç de cumponer música nó-académica, apreciada supostamente pul público giral, i nun solo por ua minorie anteletual. L'alegre aparéncia de ls sous trabalhos rebela ua alegrie de cumponer. Estas stan antre las rezones de la basta popularidade de la sue música. Esta popularidade debrebe l tornou famoso an países cumo la Fráncia, na altura mui cerrada ne ls sou balores nacionales.
Lhegado
[eiditar | eiditar código-fuonte]Johann Sebastian Bach fui mui anfluenciado pul cuncerto i Aria de Vivaldi (rebebido nas sue Peixones i cantate). Bach trascrebiu[4] alguns de ls cuncertos de Vivaldi pa l crabo, bien cumo alguns para ourquestra, ancluindo l famoso Cuncerto para Quatro Biolinos i Bioloncelo, Cuordas i Baixo Cuntino (RB580). Assi i todo, nin todos ls musiqueiros demunstrórun l mesmo antusiasmo: Igor Stravinsky afirmou an ton probocatibo que Vivaldi nun tenerie scrito cientos de cuncertos mas un único, repetido cientos de bezes.
Anque todos ls detratores i de las críticas negatibas que Vivaldi recebiu, sou talento ye einegable. Fui l cumpositor qu'ambentou ó, pul menos, stableciu la strutura defenitiba de l cuncerto i de la sinfonie. Fui l purmeiro cumpositor a ousar cunsistentemente la forma ritornelo an sous cuncertos, cumo puode ser bereficado an "Las quatro staçones".[4] Sue facelidade na scrita era ampressionante, screbia tan rápido cume la pena l deixaba. Diç-se que demoraba a screbir un nuobo cuncerto an menos tiempo qu'un copista a copiá-lo.
La ressurreiçon de l trabalho de Vivaldi ne l seclo 20 debe-se subretodo als sfuorços de Alfredo Casella, qu'an 1939 ourganizou l'agora stórica Sumana Vivaldi. Zde anton, las cumposiçones de Vivaldi tubírun sucesso ounibersal, i l'adbento de la "atuaçon storicamente anformada" cunseguiu catapultá-lo pa l strelato outra beç. An 1947 l'ampresairo beneziano Antonio Fanna fundou l Istituto Italiano Antonio Vivaldi, an que l purmeiro diretor artístico fui l cumpositor Gian Francesco Malipiero, cul perpósito de promober la música de Vivaldi i publicar nuobas eidiçones de sous trabalhos.
La música de Vivaldi, a la par cula de Mozart, Tchaikovsky, Corelli i Bach fui ancluída nas teories de Alfred Tomatis subre ls eifeitos de la música ne l cumportamiento houmano, i ousada an terapie musical.
Radadeiros anhos i muorte
[eiditar | eiditar código-fuonte]Vivaldi, tal cumo muitos outros cumpositores de la época, treminou sue bida an pobreza. Las sues cumposiçones yá nun suscitában l'alta stima qu'ua beç tubírun an Beneza; gustos musicales an mudança debrebe l ponírun fuora de moda, i Vivaldi terá decedido bender un abultado númaro de ls sous manuscritos a précios eirrisórios, por forma a financiar ua migraçon para Biena. Las rezones de la partida de Vivaldi para essa cidade nun son claras, mas parece probable que terá querido coincer Carlos VI, qu'adoraba las sues cumposiçones (Vivaldi dedicou La Cetra a Carlos an 1727), i assumiu la posiçon de cumpositor rial na Corte Amperial. Assi i todo, pouco depuis de la sue chegada la Biena, Carlos VI benerie a morrer. Este trágico golpe d'azar deixou l cumpositor çprobido de la porteçon rial i de fuonte de rendimientos. Vivaldi tubo que bender mais manuscritos para subrebibir. Morriu-se pouco tiempo depuis, ne l die 28 de júlio de 1741.[3] Fui-le dada sepultura anónima de pobre (la missa de Requiem na qual l moço Joseph Haydn terá cantado, ne l coro). Eigualmente zafertunada, sue música benerie a caer na ouscuridade até als anhos de 1900.
Ber tamien
[eiditar | eiditar código-fuonte]Refréncias
- ↑ 1,0 1,1 .com.br/Vivaldi.htm «Vivaldi» Cunsulte valor
|url=(ajuda) (an pertués). Clássicos. Cunsultado an 25 de setembre de 2009 - ↑ 2,0 2,1 2,2 2,3 2,4 «Cumpositor Eitaliano Antonio Vivaldi» (an pertués). UOL. Cunsultado an 25 de setembre de 2009
- ↑ 3,0 3,1 3,2 «Antonio Lucio Vivaldi: Beneziano troca batina pula música» (an pertués). Fuolha on Lhine. Cunsultado an 18 d'outubre de 2009 Cunsulte data an:
|cunsultadata=(ajuda) - ↑ 4,0 4,1 «Personalidade:Vivaldi» (an pertués). Movimento. Cunsultado an 18 d'outubre de 2009 Cunsulte data an:
|cunsultadata=(ajuda)
Lhigaçones sternas
[eiditar | eiditar código-fuonte]
- Páigina de Vivaldi na Classical Net (an anglés)
- Catálogo de obras musicales de Vivaldi (an francés)
- Modelo:IMSLP
- Modelo:ChoralWiki
- Modelo:IMSLP
- Biografía do Arquibado an 2010-01-09 ne l Wayback Machine. The Grove Concise Dictionary of Music (aninglés)
- Anstituto Vivaldi Arquibado an 2008-03-17 ne l Wayback Machine. (an eitaliano)