ടെന്നസി

അമേരിക്കൻ ഐക്യനാടുകളുടെ തെക്കു കിഴക്കൻ പ്രദേശത്ത് സ്ഥിതി ചെയ്യുന്ന ഒരു സംസ്ഥാനമാണ് ടെന്നസി. 1796-ൽ 16-ആം സംസ്ഥാനമായി യൂണിയന്റെ ഭാഗമായി. 2008 ലെ കനേഷുമാരി അനുസരിച്ച് ഇവിടുത്തെ ജനസംഖ്യ 6,214,888 ആയിരുന്നു. 2000-ത്തിനുശേഷം ജനസംഖ്യയിൽ 9.5% വളർച്ച ഉണ്ടായിട്ടുണ്ട്. നാഷ്‌വിൽ ആണ് തലസ്ഥാനം. ഏറ്റവും വലിയ രണ്ടാമത്തെ നഗരവും കൂടിയായ ഇവിടുത്തെ ജനസംഖ്യ 626,144 ആണ്. 670,902 ജനസംഖ്യയുള്ള മെംഫിസാണ് ഏറ്റവും വലിയ നഗരം. അപ്പലേച്ചിയൻ പർവ്വതനിരകൾക്കും മിസ്സോറിക്കും ഇടയിലായി സ്ഥിതിചെയ്യുന്നു. മിസിസിപ്പി നദിയാണ് അർക്കൻസാസ്, മിസോറി സംസ്ഥാനങ്ങളെ ടെന്നസിയിൽനിന്നും വേർതിരിക്കുന്നത്. അതിരുകൾ: വ. കെന്റക്കി, വിർജീനിയ, കി. നോർത് കാരലീന, ജോർജിയ, തെ. അലബാമ, മിസിസിപ്പി, പടി. മിസിസിപ്പി നദി, വിസ്തീർണം: 106, 759 ച.കി.മീ.; ജനസംഖ്യ: 4877185 (1990); തലസ്ഥാനം : നാഷ്‍വിൽ (Nashville).

സ്റ്റേറ്റ് ഓഫ് ടെന്നസി
കൊടി ചിഹ്നം
വിളിപ്പേരുകൾ: The great volunteer State
ആപ്തവാക്യം: Agriculture and commerce
അമേരിക്കൽ ഐക്യനാടുകളുടെ ഭൂപടത്തിൽ ടെന്നസി അടയാളപ്പെടുത്തിയിരിക്കുന്നു
ഔദ്യോഗികഭാഷകൾ	English
നാട്ടുകാരുടെ വിളിപ്പേര്	Tennessean
തലസ്ഥാനം	Nashville
ഏറ്റവും വലിയ നഗരം	Memphis
ഏറ്റവും വലിയ മെട്രോ പ്രദേശം	Nashville Metropolitan Area
വിസ്തീർണ്ണം	യു.എസിൽ 36th സ്ഥാനം
- മൊത്തം	42,169 ച. മൈൽ (109,247 ച.കി.മീ.)
- വീതി	120 മൈൽ (195 കി.മീ.)
- നീളം	440 മൈൽ (710 കി.മീ.)
- % വെള്ളം	2.2
- അക്ഷാംശം	34° 59′ N to 36° 41′ N
- രേഖാംശം	81° 39′ W to 90° 19′ W
ജനസംഖ്യ	യു.എസിൽ 17th സ്ഥാനം
- മൊത്തം	6,214,888 (2008 est.)
- സാന്ദ്രത	138.0/ച. മൈൽ  (53.29/ച.കി.മീ.) യു.എസിൽ 19th സ്ഥാനം
ഉന്നതി
- ഏറ്റവും ഉയർന്ന സ്ഥലം	Clingmans Dome 6,643 ft. അടി (2,025 മീ.)
- ശരാശരി	900 അടി  (280 മീ.)
- ഏറ്റവും താഴ്ന്ന സ്ഥലം	Mississippi River 178 അടി (54 മീ.)
രൂപീകരണം	June 1, 1796 (16th)
ഗവർണ്ണർ	Phil Bredesen (D)
ലെഫ്റ്റനന്റ് ഗവർണർ	Ron Ramsey (R)
നിയമനിർമ്മാണസഭ	{{{Legislature}}}
- ഉപരിസഭ	{{{Upperhouse}}}
- അധോസഭ	{{{Lowerhouse}}}
യു.എസ്. സെനറ്റർമാർ	Lamar Alexander (R) Bob Corker (R)
യു.എസ്. പ്രതിനിധിസഭയിലെ അംഗങ്ങൾ	5 Democrats, 4 Republicans (പട്ടിക)
സമയമേഖലകൾ
- East Tennessee	Eastern: UTC-5/-4
- Middle and West	Central: UTC-6/-5
ചുരുക്കെഴുത്തുകൾ	TN Tenn. US-TN
വെബ്സൈറ്റ്	www.tennessee.gov

ചരിത്രം

ചരിത്രത്തിൽ നിരവധി പേരുകളിൽ ടെന്നസി സ്റ്റേറ്റ് അറിയപ്പെടുന്നു. ഇതിന്റെ ചരിത്രവും പ്രത്യേക ഭൂപ്രകൃതിയുമാണ് ഇതിനു കാരണം. 19-ാം ശ.-ൽ ഈ സംസ്ഥാനം 'വോളണ്ടിയർ സംസ്ഥാനം' (volunteer state) എന്ന് അറിയപ്പെട്ടിരുന്നു. 1812-ലെ യുദ്ധത്തിൽ പങ്കെടുക്കുന്നതിനുവേണ്ടി ആയിരക്കണക്കിന് ടെന്നസിക്കാർ സ്വയം സന്നദ്ധരായതിൽനിന്നാണ് പ്രസ്തുത പേര് ലഭിച്ചിട്ടുള്ളത്. മുമ്പ് 'മദർ ഒഫ് സൌത്ത് വെസ്റ്റേൺ സ്റ്റേറ്റ്സ്' (Mother of south western states) എന്ന പേരിലും ടെന്നസി അറിയപ്പെട്ടിരുന്നു. 1800-കളിൽ അമേരിക്കൻ സമ്പദ്ഘടനയെ വൻതോതിൽ സ്വാധീനിച്ച ടെന്നസി ഉത്പന്നങ്ങൾ (പ്രധാനമായും പന്നിയിറച്ചിയും ചോളവും) സംസ്ഥാനത്തിന് 'ഹോഗ് ആന്റ് ഹോമിനി (Hog and Hominy) സ്റ്റേറ്റ്' എന്ന നാമം പ്രദാനം ചെയ്തു. 'ബിഗ് ബെൻഡ് സ്റ്റേറ്റ്' (Big Bend State) എന്നും ഇതറിയപ്പെടുന്നുണ്ട്. ടെന്നസി നദി ഇവിടെ തീർക്കുന്ന വക്രാകൃതിയിലുള്ള പഥമാണ് ഈ പേരിന് ആധാരം. 'ടനസി' എന്ന ഗ്രാമനാമത്തിൽനിന്നാണ് സംസ്ഥാന നാമമായ ടെനസി നിഷ്പന്നമായിട്ടുള്ളത്.

ഭൂപ്രകൃതി

വടക്കേ അമേരിക്കൻ ഭൂഖണ്ഡത്തിലെ മൂന്നു പ്രധാന ഭൂവിഭാഗങ്ങളുടെ ചില ഭാഗങ്ങൾ ടെനസിയിൽപ്പെടുന്നു. കി. പ. എന്ന ക്രമത്തിൽ ഇവ അപ്പലേച്ചിയൻ ഉന്നതതടങ്ങൾ, മധ്യ നിമ്നസമതലങ്ങൾ, ഗൾഫ് തീരസമതലങ്ങൾ എന്നിങ്ങനെ വിന്യസിക്കപ്പെട്ടിരിക്കുന്നു. ഫലഭൂയിഷ്ഠമായ മണ്ണ്, സമൃദ്ധമായി ലഭിക്കുന്ന മഴ, സൗമ്യമായ കാലാവസ്ഥ എന്നിവ ഇവിടത്തെ അനുകൂല നൈസർഗിക ഘടകങ്ങളാകുന്നു. ടെനസിയിലെ പ്രധാന നഗരം

അതിർത്തികൾ

സംസ്ഥാനത്തിന്റെ കിഴക്കൻ അതിർത്തിയിലായി വ. കി., തെ. പടി. ദിശയിൽ സ്ഥിതിചെയ്യുന്ന പർവതശൃംഖലയാണ് അപ്പലേച്ചിയൻ ഉന്നതതടങ്ങൾ. ഈ പർവതനിരകളിൽ ഉൾപ്പെടുന്നതും 1800 മീ. -ലേറെ ഉയരമുള്ളതുമായ പതിനഞ്ചിലധികം കൊടുമുടികൾ ടെനസിയിലാണ്. 'ക്ളിങ്മാൻസ് ഡോം (Clingman's Dome) ആണ് സംസ്ഥാനത്തിലെ ഏറ്റവും ഉയരം കൂടിയ കൊടുമുടി (2013 മീ.). അപ്പലേച്ചിയൻ പർവതത്തിന് തെ. പ. ആയി ഉന്നതതടങ്ങളും താഴ്വാരങ്ങളും ഉൾക്കൊള്ളുന്ന പ്രദേശം 'ഗ്രേറ്റ്വാലി' എന്ന പേരിൽ അറിയപ്പെടുന്നു. പർവതനിരകളുടേയും താഴ്വരകളുടേയും സമാന്തര നിര ഇവിടത്തെ ഭൂപ്രകൃതിയുടെ പ്രത്യേകതയാണ്. 'ഗ്രേറ്റ്വാലി'യുടെ പ. സ്ഥിതിചെയ്യുന്ന കുംബർലൻഡ് പീഠഭൂമിക്ക് 600 മീ. -ലേറെ ഉയരമുണ്ട്. ചെങ്കുത്തായ ചരിവോടുകൂടിയ ഒരു ഭൂപ്രദേശമാണിത്.

ടെനസിയിലെ മധ്യ-നിമ്നതടങ്ങൾ യു.എസ്സിലെ തന്നെ വിസ്തൃതമായ ഒരു ഉൾനാടൻ ഭൂവിഭാഗത്തിന്റെ ഭാഗമാണ്. 'ക്വസ്റ്റാസ്' (cuestas) എന്നു പേരുള്ളതും ഒരു വശം കുത്തനെ ചരിഞ്ഞതുമായ ഉന്നത നിരകൾ, ഉയരം കുറഞ്ഞ പീഠഭൂമികൾ, നാഷ്വീൽ തടം തുടങ്ങിയവ ഈ ഭൂവിഭാഗത്തിന്റെ പ്രത്യേകതകളാണ്. നാഷ്വീൽ തടത്തിനു ചുറ്റുമുള്ള ഭൂപ്രദേശത്തെ 'ഹൈലൻഡ് റിം' (Highland rim) എന്നു വിളിക്കുന്നു.

വളരെ വിശാലമായ ഒരു ഭൂഭാഗമാണ് ടെനസിയുടെ ഗൾഫ് തീരപ്രദേശം. ഇത് മെക്സിക്കൻ ഉൾക്കടലിൽ നിന്നുമാരംഭിച്ച് സംസ്ഥാനത്തിന്റെ പടി. ഭാഗത്തേക്കു വ്യാപിച്ചിരിക്കുന്നു. ടെനസിയുടെ പടിഞ്ഞാറൻ ഭാഗങ്ങളിൽ 'ജാക്സൺ സമതലം' എന്ന പേരിലാണ് ഇത് അറിയപ്പെടുന്നത്. മിസിസിപ്പി-ടെനസി നദികൾക്കിടയിലുള്ള ഫലഭൂയിഷ്ഠമായ ഒരു നിമ്നോന്നത സമതലപ്രദേശമായ ഗൾഫ് തീരസമതലത്തിന്റെ തെ. പടിഞ്ഞാറേയറ്റത്താണ് ടെനസിയിലെ ഏറ്റവും താഴ്ന്ന പ്രദേശം സ്ഥിതിചെയ്യുന്നത്.

കാലാവസ്ഥ

യു.എസ്സിലെ അപ്പലേച്ചിയൻ പർവത കാലാവസ്ഥാവിഭാഗത്തിലാണ് ടെനസിയുടെ സ്ഥാനം. ഈർപ്പം നിറഞ്ഞ ഈ കാലാവസ്ഥയ്ക്ക് ഉത്തര യു.എസ്സിലെ കാഠിന്യമുള്ള വൻകര കാലാവസ്ഥയോടും, ദക്ഷിണ ഭാഗത്തെ ഉപോഷ്ണമേഖലാ കാലാവസ്ഥയോടും സാമ്യമുണ്ട്. താരതമ്യേന ചൂടു കൂടുതലുള്ള വേനൽക്കാലം, മിതമായ തണുപ്പോടുകൂടിയ മഞ്ഞുകാലം, സുലഭമായ മഴ എന്നിവ ഈ കാലാവസ്ഥാവിഭാഗത്തിന്റെ പ്രത്യേകതകളാണ്.

ജലസമ്പത്ത്

സംസ്ഥാനത്തിലെ നദികളെയെല്ലാം മെക്സിക്കൻ ഉൾക്കടലിലേക്ക് എത്തിക്കുന്നത് ഒഹായോ-മിസിസിപ്പി നദീശൃംഖലകളാണ്. സംസ്ഥാനത്തിന്റെ പകുതിയിലധികം ഭാഗങ്ങളെയും പ്രധാന നദിയായ ടെനസിയും അതിന്റെ പോഷക നദികളും ചേർന്ന്് ജലസേചിതമാക്കുന്നു; ബാക്കി പ്രദേശങ്ങളെ കുംബർലൻഡ് - മിസിസിപ്പി നദികൾ ചേർന്നും. 1811-12-ലെ നൂമാഡ്രിഡ് (New Madrid) ഭൂകമ്പത്തിൽ രൂപമെടുത്ത റീൽഫൂട്ട് (Reelfoot) തടാകമാണ് ടെനസിയിലെ ഏക നൈസർഗിക ജലാശയം. ഏറ്റവും വലിയ തടാകമായ കെന്റക്കിയെ കെന്റക്കി, ടെനസി സംസ്ഥാനങ്ങൾ പങ്കിടുന്നു. ഭാഗികമായോ പൂർണമായോ സംസ്ഥാനത്തിനുള്ളിൽവരുന്ന മറ്റു ജലാശയങ്ങൾ, ബർക്ക്ലി, സെന്റർ ഹിൽ, ചെറോകി, ചികമങ്ഗ, ഡേൽ ഹോളോ, ഡഗ്ളസ് നോറിസ്, ഓൾഡ് ഹിക്കറി, വാട്സ് ബാർ ലേക്സ് എന്നിവയാണ്.

സസ്യജാലം

മുമ്പ് സസ്യസമൃദ്ധമായൊരു പ്രദേശമായിരുന്നു ടെനസി. എന്നാൽ ഇന്ന് അപ്പലേച്ചിയനിലെ ഉയരം കൂടിയതും ഒറ്റപ്പെട്ടു കിടക്കുന്നതുമായ ഭാഗങ്ങളൊഴികെയുള്ള പ്രദേശങ്ങളിലെ വനങ്ങളെല്ലാം അപ്രത്യക്ഷമായി കഴിഞ്ഞിരിക്കുന്നു. സംസ്ഥാനത്തിന്റെ പകുതിയോളം ഭാഗങ്ങളിൽ വ്യാപിച്ചിരിക്കുന്ന രണ്ടാംകിട വനങ്ങൾ വ്യാപാരാവശ്യങ്ങൾക്കുള്ള തടിയുടെ പ്രധാന ഉറവിടമായി മാറിയിട്ടുണ്ട്. വനവിഭവങ്ങളെ ആശ്രയിക്കുന്ന പേപ്പർ - അനുബന്ധ വ്യവസായങ്ങൾ സംസ്ഥാനത്തുടനീളം കാണുന്നു. വിലപിടിപ്പുള്ളതും കടുപ്പമുള്ളതുമായ നല്ലയിനം തടികൾ ഇവിടത്തെ വനങ്ങളിൽനിന്നും ലഭിക്കുന്നു.

സമ്പദ്ഘടന

മുമ്പ് ഒരു കാർഷിക സമ്പദ്ഘടനയായിരുന്നു ഇവിടെ നിലനിന്നിരുന്നത്. രണ്ടാംലോകയുദ്ധത്തിനുശേഷമുണ്ടായ പുരോഗതി വ്യാവസായിക സമ്പദ്ഘടനയിലേക്ക് മാറാൻ സംസ്ഥാനത്തെ സഹായിച്ചു. 1930 -കൾക്കുശേഷം കാർഷിക വ്യവസ്ഥിതിയിൽനിന്നും വ്യാവസായികതയിലേക്ക് കാലൂന്നിയ ടെനസിയുടെ സമ്പദ്ഘടനയെ സ്വാധീനിക്കുന്ന ഒരു പ്രധാന ഘടകം ഇവിടത്തെ ഉത്പാദനമേഖലയാണ്. കൃഷിയുടെ പ്രാധാന്യം കുറഞ്ഞിട്ടുണ്ടെങ്കിലും ഇന്നും ഇത് ഇവിടത്തെ ഒരു പ്രധാന ജീവിതോപാധിയാണ്. കന്നുകാലിവളർത്തലും ഒരു പ്രധാന ഉപജീവനമാർഗ്ഗം തന്നെ. പരുത്തി, പുകയില, സോയാബീൻസ് തുടങ്ങിയവയാണ് പ്രധാന വിളകൾ. മുമ്പ് മലഞ്ചരിവുകളിലെ കൃഷിയിടങ്ങൾ വൻതോതിലുള്ള മണ്ണൊലിപ്പുഭീഷണി നേരിട്ടിരുന്നു. ടെനസിവാലി അതോറിറ്റി (TVA) പോലുള്ള പദ്ധതികൾ നടപ്പാക്കിയതോടെ മണ്ണൊലിപ്പ്, വെള്ളപ്പൊക്കം തുടങ്ങിയ പ്രകൃതിക്ഷോഭങ്ങളെ ഒരു പരിധിവരെ നിയന്ത്രിക്കുവാൻ സംസ്ഥാന ഭരണകൂടത്തിനു കഴിഞ്ഞിട്ടുണ്ട്.

ടെനസിയിലെ ഒരു പുകയിലപ്പാടം

പ്രധാന കാർഷികവിളകളായ പരുത്തിയും പുകയിലയും യഥാക്രമം ഫലഭൂയിഷ്ഠമായ പടിഞ്ഞാറൻ ടെനസി സമതലങ്ങളിലും, മധ്യ-കിഴക്കൻ ഭാഗങ്ങളിലും കൃഷി ചെയ്യപ്പെടുന്നു. വളരെ സുഖകരമായ യാത്രയ്ക്കു പേരുകേട്ട 'ടെനസി വാക്കിങ് ഹോഴ്സ്' എന്ന സങ്കരയിനം കുതിര ടെനസിക്ക് മാത്രം അവകാശപ്പെട്ടതാണ്.

വ്യവസായം

ഇരുമ്പുരുക്കു വ്യവസായമുൾപ്പെടെയുള്ള വ്യവസായങ്ങൾ ഇവിടെയുണ്ടെങ്കിലും വ്യാവസായികോത്പന്നങ്ങളിൽ രാസവസ്തുക്കൾ, കൃത്രിമനാരുകൾ, വൈദ്യുത സാമഗ്രികൾ, ഭക്ഷണ സാധനങ്ങൾ എന്നിവയ്ക്കാണ് മുൻതൂക്കം. സംസ്ഥാനത്തിലെ വൻനഗരങ്ങളിലായി പ്രധാന വ്യവസായങ്ങൾ കേന്ദ്രീകരിച്ചിരിക്കുന്നു. അപ്പലേച്ചിയൻ പർവതനിരകളിലെ കരകൗശല ഉത്പന്നങ്ങൾ ടെനസി സോർ - മാഷ് വിസ്കി (Tennessee sour -mash whisky) തുടങ്ങിയവ ഇവിടത്തെ മറ്റു പരമ്പരാഗത വ്യാവസായികോത്പന്നങ്ങളിൽപ്പെടുന്നു.

ഖനനത്തിന്റെ തോത് കുറവാണെങ്കിലും വൈവിധ്യമാർന്ന ഉപയോഗവും ദേശീയ പ്രാധാന്യവും ഇതു നേടിയെടുത്തിരിക്കുന്നു. ബാൾ ക്ളേ (BAll clay), പൈറൈറ്റ്, സിങ്ക്, ഫോസ്ഫേറ്റ് പാറ, മാർബിൾ, ഫുള്ളേഴ്സ് എർത്ത് തുടങ്ങിയവയുടെ ഒരു പ്രധാന ഉത്പാദനകേന്ദ്രമാണ് ടെനസി. മൊത്ത ഉത്പാദനമൂല്യത്തിന്റെ കാര്യത്തിൽ കൽക്കരി, സിങ്ക്, സിമന്റ്, മണൽ, ചരൽ, ഫോസ്ഫേറ്റ് പാറ എന്നിവ മുന്നിൽ നിൽക്കുന്നു. സ്വർണം, വെള്ളി, പെട്രോളിയം, പ്രകൃതി വാതകം തുടങ്ങിയവയും ഇവിടെ ചെറിയതോതിൽ ഉത്പാദിപ്പിക്കപ്പെടുന്നുണ്ട്. ഗതാഗതവും വാർത്താവിനിമയവും

ഗതാഗതം

18-ാം ശ. മുതൽതന്നെ പല പ്രധാന ഗതാഗതമാർഗങ്ങളും ടെനസിയിൽ നിലവിലുണ്ടായിരുന്നു. ഒരു മുഖ്യ ഉൾനാടൻ തുറമുഖം കൂടിയായ മെംഫിസ് (Memphis) ആണ് പ്രധാന ഗതാഗതകേന്ദ്രം. മിസിസിപ്പി, ടെനസി എന്നീ നദികളും ഒരു ചെറിയ അളവുവരെ കുംബർലൻഡു നദിയും ജലഗതാഗതത്തിന് ഉപയോഗിക്കപ്പെടുന്നു. ഈ നദികളിലെ ഗതാഗതയോഗ്യമായ ചാനലുകൾക്ക് ഏതാണ്ട് 1610 കി.മീ. ദൈർഘ്യമുണ്ട്. മെംഫിസ്, നോക്ക്സ്വീൽ, ചാറ്റനൂഗ, നാഷ്വീൽ എന്നീ നഗരങ്ങളിലുള്ള മുഖ്യ വിമാനത്താവളങ്ങളെ കൂടാതെ ബ്രിസ്റ്റോൾ, ജോൺസൺസിറ്റി, കിങ്സ്പോർട്ട് എന്നീ മൂന്നു നഗരങ്ങളെ ബന്ധിപ്പിക്കുന്ന അഞ്ചാമതൊരു വിമാനത്താവളംകൂടി ഇവിടെ പ്രവർത്തിക്കുന്നു.

13580 കി.മീ. ആണ് ടെനസിയിലെ റോഡുകളുടെ മൊത്തം ദൈർഘ്യം (1991); റെയിൽപ്പാതയ്ക്ക് 3960 കി.മീ. (1988) ഉം. മെംഫിസ് നഗരത്തിൽ ഒരു 'ട്രാംവേ' പ്രവർത്തിക്കുന്നു. 1989-ൽ ഇവിടെയുണ്ടായിരുന്ന 152 വിമാനത്താവളങ്ങളിൽ 74 എണ്ണം പൊതു മേഖലയിലും 78 എണ്ണം സ്വകാര്യ മേഖലയിലുമായിരുന്നു.

ജനങ്ങളും ജീവിതരീതിയും

ജനങ്ങളിൽ ഏറിയപങ്കും ക്രിസ്തുമത വിശ്വാസികളാണ്. ടെനസിയിലെ പ്രധാന നഗരങ്ങളിലെ ജനസംഖ്യ (1994): മെംഫിസ് 614, 289; നാഷ്വീൽ 504, 505; നോക്സിവീൽ 169, 311; ചാറ്റനൂഗ 152, 259; ക്ളാർക്സ്വീൽ 92, 116; ജാക്സൺ 52, 243; ജോൺസൺസിറ്റി 51, 573; മർഫ്രീസ്ബറോ 56, 194; കിങ്ഗ്പോർട്ട് 38, 476; ഓക്റിഡ്ജ് 28, 209. 1994-ലെ ജനസംഖ്യയനുസരിച്ചുള്ള പ്രധാന മെട്രോപൊളിറ്റൻ പ്രദേശങ്ങളും അവയിലെ ജനസംഖ്യയും: മെംഫിസ് (1,056,096), നാഷ്വീൽ (1,069,648), നോക്സ്വീൽ (631,107), ചാറ്റനൂഗ (439,189), ജോൺസൺ സിറ്റി - ബ്രിസ്റ്റോൾ കിങ്സ്പോർട്ട് (450, 641), ക്ളാർക്സ്വീൽ (186, 017), ജാക്സൺ (82,557).

വിദ്യാഭ്യാസരംഗം

7 മുതൽ 17 വരെ വയസ്സുള്ളവർക്ക് സ്കൂൾ വിദ്യാഭ്യാസം നിർബന്ധിതമാണ്. സംസ്ഥാന ഗവർണർ ഉൾപ്പെടുന്ന സംസ്ഥാന വിദ്യാഭ്യാസ ബോർഡിൽ ഗവർണർ നിയമിക്കുന്ന സംസ്ഥാന വിദ്യാഭ്യാസ കമ്മീഷണറും മറ്റ് 9 അംഗങ്ങളുമുണ്ട്. 1800-കളിൽ തന്നെ പല സ്വകാര്യ വിദ്യാഭ്യാസ സ്ഥാപനങ്ങളും ടെനസിയിൽ ഉടലെടുത്തിരുന്നു. ബ്ളൗണ്ട് കോളജ് (Blount college) എന്ന പേരിൽ 1794-ൽ ചാർട്ടർ ചെയ്ത ടെനസി സർവകലാശാല 1879-ലാണ് ഇപ്പോഴത്തെ പേരിൽ പുനഃസംഘടിപ്പിക്കപ്പെട്ടത്. നോക്സ് വീലിലുള്ള പ്രധാന കാമ്പസിനെ കൂടാതെ ഈ സർവകലാശാലയ്ക്ക് നാഷ്വീൽ, ടൂലഹോമ, ഓക്റിഡ്ജ്, മാർട്ടിൻ എന്നിവിടങ്ങളിലും കാമ്പസുകൾ ഉണ്ട്. വാൻഡർബിൽറ്റ് (Vander bilt) സർവകലാശാല (1873) ടെനസി സ്റ്റേറ്റ് യൂണിവേഴ്സിറ്റി (1912) യൂണിവേഴ്സിറ്റി ഒഫ് ടെനസി (1886), മെംഫിസ് സർവകലാശാല (1912), ഫിസ്ക് സർവകലാശാല (1866), തുടങ്ങിയവയാണ് ടെനസിയിലെ പ്രധാന ഉന്നത വിദ്യാഭ്യാസ സ്ഥാപനങ്ങൾ.

ചരിത്രം

ചരിത്രാതീതകാലത്തുണ്ടായിരുന്ന മനുഷ്യവാസത്തിന്റെ അവശിഷ്ടങ്ങൾ ടെന്നസിയിൽ കണ്ടെത്തിയിട്ടുണ്ട്. 15,000 വർഷങ്ങൾക്കുമുമ്പ് എത്തിയതെന്നു കരുതുന്ന പാലിയോ ഇന്ത്യൻ വംശജരെത്തുടർന്ന് ആർക്കായിക്, വുഡ്ലാൻഡ്, മിസിസിപ്പിയൻ എന്നീ വംശജർ ഇവിടെ എത്തിയതായി കരുതപ്പെടുന്നു. 16-ാം ശ. -ത്തിൽ യൂറോപ്യൻമാർ എത്തുമ്പോൾ പ്രധാനമായി ഇവിടെയുണ്ടായിരുന്നത് ചെറോക്കി (പൂർവ ടെനസിയിൽ), ചിക്കാസ (പശ്ചിമ ടെനസിയിൽ), ഷാവ്നി (മധ്യ ടെനസിയിൽ) എന്നീ അമേരിക്കൻ-ഇന്ത്യൻ വംശ വിഭാഗങ്ങളിലുള്ളവരായിരുന്നു. കിഴക്കൻ ടെനസിയിലൂടെ പ്രവേശിച്ച (1540-41) സ്പെയിൻകാരാണ് ഇവിടെ ആദ്യമായി സ്ഥാനമുറപ്പിച്ച യൂറോപ്യന്മാർ എന്നു കരുതപ്പെടുന്നുണ്ട്. ഇവിടെയെത്തിയ ആദ്യ സ്പാനിഷ് പര്യവേക്ഷകനാണ് ഹെർനാൻഡോ ദെ സോട്ടോ. 17-ാം ശ. -ത്തിന്റെ രണ്ടാം പകുതിയിൽ ഫ്രഞ്ചുകാരും ഇംഗ്ളീഷുകാരും ഇവിടെയെത്തി പല സ്ഥലങ്ങളും കയ്യടക്കി. മേൽക്കോയ്മക്കായി ഇവർ തമ്മിൽ മത്സരിച്ചിരുന്നു. 1763-ലെ പാരീസ് ഉടമ്പടിപ്രകാരം ഫ്രഞ്ചുകാരും ഇന്ത്യരും തമ്മിലുള്ള യുദ്ധം അവസാനിപ്പിച്ചപ്പോൾ ഫ്രഞ്ചുകാർ മിസിസിപ്പിക്കു കിഴക്കുള്ള പ്രദേശങ്ങളിലെ തങ്ങളുടെ അവകാശം ബ്രിട്ടീഷുകാർക്ക് വിട്ടുകൊടുത്തു. ഇതോടെ ഇവിടം നോർത്ത് കരോലിന കോളനിയുടെ ഭാഗമായി. തുടർന്ന് യൂറോപ്യന്മാരുടെ സ്ഥിരമായ അധിനിവേശം ആരംഭിച്ചു. കുടിയേറ്റക്കാർ തങ്ങളുടെ ഭരണപരമായ ആവശ്യങ്ങൾക്കായി വാറ്റൗഗാ (Watauga) അസ്സോസിയേഷൻ എന്ന പേരിൽ ഒരു പ്രാദേശിക ഭരണസമിതി 1772-ൽ രൂപീകരിച്ചു. ജോൺ സെവിയറും ജെയിംസ് റോബർട്ട്സണും ഇതിന്റെ നേതാക്കളായിരുന്നു. വാറ്റൌഗാ അസ്സോസിയേഷൻ ഭരണപ്രദേശം പിന്നീട് വാഷിങ്ടൺ ഡിസ്ട്രിക്റ്റ് ആയി. 1776-ൽ ഇത് നോർത്ത് കരോലിനയുടെ നിയന്ത്രണത്തിലാവുകയും 1777-ൽ വാഷിങ്ടൺ കൗണ്ടി ആയി മാറുകയും ചെയ്തു.

അമേരിക്കൻ സ്വാതന്ത്ര്യസമരത്തിൽ എടുത്തുപറയത്തക്ക സേവനമനുഷ്ഠിച്ച ടെനസിക്കാരനാണ് ജോൺ സെവിയർ. ഇദ്ദേഹത്തിന്റെ നേതൃത്വത്തിൽ ടെനസിസേന കിങ്സ്മൗണ്ടൻ യുദ്ധത്തിൽ ബ്രിട്ടീഷുകാരെ തോല്പിക്കാൻ സഹായിച്ചു (1780 ഒ.). നോർത്ത് കരോലിന 1784-ൽ ടെന്നസി പ്രദേശങ്ങൾ ഫെഡറൽ ഗവൺമെന്റിന് വിട്ടുകൊടുത്തതിനോട് ഇവിടത്തെ അധിവാസികൾ എതിർപ്പു പ്രകടിപ്പിച്ചിരുന്നു. വിട്ടുകൊടുത്ത പ്രദേശം ഉൾപ്പെടുത്തി പൂർവ ടെനസിയിലെ നിവാസികൾ സ്വാതന്ത്ര്യസമരാനന്തരം ഫ്രാങ്ക്ളിൻ സംസ്ഥാനം രൂപവത്ക്കരിച്ചു (1784). ഇവർ ഒരു ഭരണഘടനയുണ്ടാക്കുകയും ജോൺ സെവിയറെ മൂന്നു വർഷത്തേക്ക് ഗവർണറായി നിയമിച്ചുകൊണ്ട് ഫെഡറേഷനിലെ 14-ാമതു സംസ്ഥാനമായി നിൽക്കാനുള്ള ശ്രമം നടത്തുകയും ചെയ്തു. ഈ സംസ്ഥാനത്തെ അംഗീകരിക്കുവാൻ ഫെഡറൽ കോൺഗ്രസ്സോ നോർത്ത് കരോലിനയോ തയ്യാറായില്ല. 1788-ൽ നോർത്ത് കരോലിന ഇവിടം ആക്രമിച്ചു ചേർക്കുന്നതുവരെയുള്ള നാലു വർഷം മാത്രമേ ഫ്രാങ്ക്ളിൻ സംസ്ഥാനം നിലനിന്നുള്ളൂ. തുടർന്ന് നോർത്ത് കരോലിന ഇവിടം ഫെഡറൽ ഗവൺമെന്റിനു വീണ്ടും വിട്ടുകൊടുത്തു (1789). ടെനസി പ്രദേശം മുഴുവനും സൗത്ത് വെസ്റ്റ് ടെറിറ്ററി (ഒഹായോ നദിക്കു തെക്കുള്ള പ്രദേശം) എന്ന പേരിൽ യു.എസ്. 1790-ൽ പുനഃസംഘടിപ്പിച്ച് വില്യം ബ്രൌണ്ടിനെ ഗവർണറായി നിയമിച്ചു. തുടർന്ന് ടെനസി 1796 ജൂൺ 1-ന് യു.എസ്സിലെ 16-ാമതു സംസ്ഥാനമായി മാറി. സെവിയർ ആയിരുന്നു ആദ്യ ഗവർണർ, തലസ്ഥാനം നോക്സ്വീൽ.

ഗ്രേറ്റ് ബ്രിട്ടനുമായി 1812-ൽ യു.എസ്. ആരംഭിച്ച യുദ്ധത്തിന്റെ തുടർച്ചയായ ന്യൂ ഓർലിയൻസ് യുദ്ധത്തിൽ (1815) ടെനസിയാണ് മറ്റെല്ലാ സംസ്ഥാനങ്ങളെക്കാളും കൂടുതൽ സേനയെ നൽകിയത്. ടെനസിക്കാരനായ ആൻഡ്രൂ ജാക്സന്റെ (ഏഴാമതു യു.എസ്. പ്രസിഡന്റ്) നേതൃത്വത്തിൽ യുദ്ധവിജയമുണ്ടായി. യു.എസ്. പ്രസിഡന്റായ ആദ്യ ടെനസിക്കാരൻ ഇദ്ദേഹമാണ്. പ്രസിഡന്റായ രണ്ടാമത്തെ ടെനസിക്കാരൻ ജെയിംസ് പോക്ക് (1844) ആണ്. 19-ാം ശ. -ത്തിന്റെ ആദ്യപകുതിയിൽ ടെനസി അതിവേഗം വികാസം പ്രാപിക്കുകയും യു.എസ്സിലെ മധ്യ-ദക്ഷിണ സ്റ്റേറ്റുകളിൽ രാഷ്ട്രീയമായും സാമ്പത്തികമായും പ്രാധാന്യമുള്ളതായിത്തീരുകയും ചെയ്തു.

അമേരിക്കൻ ആഭ്യന്തരയുദ്ധകാലത്ത് ടെനസി ഒരു പ്രധാന യുദ്ധമേഖലയായിരുന്നു. ഇക്കാലത്ത് പൂർവ ടെനസി യൂണിയൻ പക്ഷത്തും, മധ്യ ടെനസിയും പശ്ചിമ ടെനസിയും കോൺഫെഡറേറ്റ് പക്ഷത്തും നിലകൊണ്ടു. ഒടുവിൽ ടെനസി പൂർണമായും കോൺഫെഡറേറ്റ് ഭാഗത്തായി. ആഭ്യന്തരയുദ്ധം ആരംഭിച്ചപ്പോൾ യൂണിയനിൽനിന്നും ഏറ്റവും ഒടുവിൽ പിരിഞ്ഞുപോയ സംസ്ഥാനമായിരുന്നു ടെനസി (1861 ജൂൺ). ആഭ്യന്തരയുദ്ധം അവസാനിച്ചപ്പോൾ കോൺഫെഡറേറ്റ് സ്റ്റേറ്റുകളിൽനിന്നും യൂണിയനിലേക്ക് ആദ്യം തിരിച്ചെടുക്കപ്പെട്ട സംസ്ഥാനവും ടെനസിയാണ് (1866 ജൂല.).

യുദ്ധത്തകർച്ച ടെനസിക്ക് ഏറെ ക്ളേശകരമായിരുന്നു. വസ്തുവകകൾക്ക് പരക്കെ നാശമുണ്ടായി. സംസ്ഥാനത്തിന്റെ കടബാദ്ധ്യത വർധിച്ചു, വ്യവസായം മുരടിച്ചു, കാർഷികമേഖല തകർന്നു. നീഗ്രോകളും വെള്ളക്കാരും തമ്മിലുള്ള ബന്ധവും വഷളായി. വെള്ളക്കാരുടെ മേധാവിത്വത്തിനുവേണ്ടിയുള്ള നീഗ്രോ വിരുദ്ധസംഘടനയായ കൂ ക്ലക്സ് ക്ലാൻ ടെനസിയിലെ പുലാസ്കയിൽ രൂപം കൊള്ളുകയും ചെയ്തു (1865-66).

1870-ൽ ടെന്നസിക്ക് ഒരു പുതിയ ഭരണഘടനയുണ്ടായി. യുദ്ധാനന്തരം നടത്തിയ വികസന പ്രവർത്തനങ്ങൾ ടെനസിയെ ക്രമേണ അഭിവൃദ്ധിയിലെത്തിച്ചു. പാഠ്യപദ്ധതി സംബന്ധിച്ച സ്കോപ്പസ് വിചാരണയിലൂടെ ടെനസി 1925-ൽ അന്താരാഷ്ട്രരംഗത്ത് ശ്രദ്ധിക്കപ്പെട്ടു. 1930-കളിലെ സാമ്പത്തികമാന്ദ്യം ടെനസിയെയും പ്രതികൂലമായി ബാധിച്ചു. ടെനസിയുടെ വികസനം ലക്ഷ്യമിട്ട് യു.എസ്. ഗവൺമെന്റ് 1933-ൽ ടെനസി വാലി അതോറിറ്റി എന്ന ഗവൺമെന്റ് കോർപ്പറേഷൻ രൂപവത്ക്കരിച്ചു. സംസ്ഥാനത്തിന്റെ ഇന്നത്തെ വ്യാവസായികാഭിവൃദ്ധിക്ക് അടിത്തറയിടുന്നതിൽ ടെനസി വാലി അതോറിറ്റിക്ക് പ്രധാന പങ്കുണ്ട്. രണ്ടാം ലോകയുദ്ധാനന്തരം ടൂറിസം ഒരു പ്രധാന വരുമാനമാർഗ്ഗമായി. 1960-കളുടെ ഒടുവിൽ ടെനസിയിൽ വർണവിവേചനം രൂക്ഷമായി. നീഗ്രോകൾക്കും മറ്റു ന്യൂനപക്ഷങ്ങൾക്കുംവേണ്ടി നടത്തപ്പെട്ട പൌരാവകാശസമരത്തിന്റെ പ്രമുഖ നേതാവും ബാപ്റ്റിസ്റ്റ് മതപുരോഹിതനുമായ, അമേരിക്കൻ ഗാന്ധി എന്നു ഖ്യാതി നേടിയ, മാർട്ടിൻ ലൂഥർ കിങ് 1968 ഏ. 4-ന് ടെനസിയിലെ മെംഫിസിൽ കൊല്ലപ്പെട്ടു.

ടെന്നസിയിൽ മൂന്നു തവണ (1796, 1834, 1870) ഭരണഘടനാനിർമ്മാണം നടന്നു. 1870-ൽ രൂപവത്ക്കരിച്ച് നിരവധി ഭേദഗതികൾ വരുത്തിയ ഭരണഘടനപ്രകാരമാണ് ഇപ്പോൾ ഭരണം നടക്കുന്നത്. ഗവർണറാണ് സംസ്ഥാന ഭരണത്തലവൻ. ഗവർണറെ നാലു വർഷത്തേക്ക് തെരഞ്ഞെടുക്കുന്നു. തുടർച്ചയായി രണ്ടുതവണത്തേക്കു മാത്രമേ ഒരു ഗവർണർ തെരഞ്ഞെടുക്കപ്പെടാവൂ എന്ന നിബന്ധനയുണ്ട്. നിയമനിർമ്മാണ സഭയ്ക്ക് രണ്ടു മണ്ഡലങ്ങളുണ്ട്. രണ്ടു വർഷത്തേക്കു തെരഞ്ഞെടുക്കപ്പെടുന്ന ഹൗസ് ഒഫ് റെപ്രസെന്റേറ്റീവ്സും നാലു വർഷത്തേക്കു തെരഞ്ഞെടുക്കപ്പെടുന്ന സെനറ്റും ചേർന്നതാണ് ഇത്. നഗരങ്ങൾക്കും പട്ടണങ്ങൾക്കും മേയറും കൗൺസിലും ചേർന്ന ഭരണസംവിധാനമാണുള്ളത്. രാഷ്ട്രീയമായി പൊതുവേ രണ്ടു ചേരികളിലായാണ് ടെനസിക്കാരുടെ നിലപാട്. പൂർവ ടെനസി റിപ്പബ്ളിക്കൻ ഭൂരിപക്ഷപ്രദേശവും, പശ്ചിമ, മധ്യ ടെനസികൾ ഡെമോക്രാറ്റിക് ഭൂരിപക്ഷപ്രദേശവുമാണ്.

മറ്റ് വായനക്ക്

• Bergeron, Paul H. Antebellum Politics in Tennessee. University of Kentucky Press, 1982.
• Bontemps, Arna. William C. Handy: Father of the Blues: An Autobiography. Macmillan Company: New York, 1941.
• Brownlow, W. G. Sketches of the Rise, Progress, and Decline of Secession: With a Narrative of Personal Adventures among the Rebels (1862)
• Cartwright, Joseph H. The Triumph of Jim Crow: Tennessee’s Race Relations in the 1880s. University of Tennessee Press, 1976.
• Cimprich, John. Slavery's End in Tennessee, 1861-1865 University of Alabama, 1985.
• Finger, John R. "Tennessee Frontiers: Three Regions in Transition". Indiana University Press, 2001.
• Honey, Michael K. Southern Labor and Black Civil Rights: Organizing Memphis Workers. University of Illinois Press, 1993.
• Lamon, Lester C. Blacks in Tennessee, 1791-1970. University of Tennessee Press, 1980.
• Mooney, James. "Myths of the Cherokee". 1900, reprinted Dover: New York, 1995.
• Norton, Herman. Religion in Tennessee, 1777-1945. University of Tennessee Press, 1981.
• Schaefer, Richard T. "Sociology Matters". New York, NY: McGraw-Hill, 2006. ISBN 0-07-299775-3
• Van West, Carroll. Tennessee history: the land, the people, and the culture University of Tennessee Press, 1998.
• Van West, Carroll, ed. The Tennessee Encyclopedia of History and Culture. 1998.

മറ്റ് ലിങ്കുകൾ

• State Government Website
• Tennessee State Databases Archived 2011-02-10 at the Wayback Machine. - Annotated list of searchable databases produced by Tennessee state agencies and compiled by the Government Documents Roundtable of the American Library Association.
• Tennessee Encyclopedia of History and Culture
• Tennessee State Library and Archives
• Energy Profile for Tennessee Archived 2010-11-17 at the Wayback Machine.
• USGS real-time, geographic, and other scientific resources of Tennessee Archived 2010-08-26 at the Wayback Machine.
• U.S. Census Bureau Archived 2015-02-07 at the Wayback Machine.
• Tennessee Blue Book Archived 2007-09-26 at the Wayback Machine. - All things Tennessee
• Timeline of Modern Tennessee Politics Archived 2007-02-05 at the Wayback Machine.
• Tennessee State Facts Archived 2013-02-23 at the Wayback Machine.
• Tennessee landforms
• Interactive Tennessee for Kids Archived 2010-01-02 at the Wayback Machine.
• The Annals of Tennessee to the End of the Eighteenth Century Archived 2017-05-25 at the Wayback Machine. - a history by J. G. M. Ramsey, 1853
• "BillHobbs.com" Tennessee's best-known and longest-running political news and commentary blog focused primarily on Tennessee politics and media.
• Tennessee ഓപ്പൺ ഡയറക്റ്ററി പ്രൊജക്റ്റിൽ

• 
• 
• 

മുൻഗാമി കെന്റക്കി

യു.എസ്. സംസ്ഥാനങ്ങൾ സംസ്ഥാനപദവി ലഭിച്ച ക്രമത്തിൽ 1796 ജൂൺ 1നു പ്രവേശനം നൽകി (16ആം)

പിൻഗാമി ഒഹയോ

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ ടെനസി എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.