Shirk
|
Quest articol chì l'è scrivud in lombard, con la Noeuva Ortografia Lombarda |
Per shirk se intend, in l'Islam, el pecad de sociàgh di compagn a Allah, roba che la po rivà de l'idolatria al politeism fina a robe 'me giurà in su 'n quajcoss che l'è minga Allah o sostegnì che 'l compartiss i so atribut divin cont un quajvun, roba contraria al principi de Tawhid. A l'è considerad el pecad pussee gram che se po fà e se vun el moeur senza pentìss el po minga vesser perdonad.
In del dirit islamegh, i mushrikūn a inn considerad tant 'me di infedei, e se vun che l'è musulman el stà adree a 'sti credenze el vegn mitud foeura de la comunità islamega. Cont el desvilup di dogma de l'Islam, shirk l'è deventad anca un termen contrari al concet de Tawhid, o ben che 'l gh'è domà un Dia e che l'è unegh, e doperad di voeulte anca di varie branche de la religion per parlà di credenze che lor sostegnen no.
Cont el temp, inn stad spartid vari tipi de shirk, de quella pussee grama, o ben l'adorà di divinità foeura de Allah, a quelle pussee linsgere 'me quella de venerazzion, de quei che ghe creden ai sant o veneren oget cread tant 'me i preje o i tombe di omen sacher, a quella del savé, indova che se cred in di strolegh, in quei che lensgen i soeugn o veden el futur.