Jean-Jacques Rousseau

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Retræto do Jean-Jacques Rousseau

Jean-Jacques Rousseau - Filozofo e scritô (Zeneivia 1712 - Ermenonville, Oise, 1778).

Biografia

Figgio de 'n relœuiâ, o no l'ebbe una regolâ instruçion, e a soli trezz'anni o fu mandao comme apprendista presso un incizô, ocupaçion ch'o l'aviæ ben fito abbandonao pe fuzzî in Savoia, començando una vitta dezordenâ ch'a saiæ diâ ben di anni. Indiriçao da-o parrego de Confignon, un villaggio vexin a Zeneivia, a Annecy, presso M.me Louise-Eléonore de Warens, o fu da questa a so votta indiriççao a Turin, inte 'n ospiççio pe catecumeni, dovv'o Rousseau o l'abbandonò l'originaia fè carvinista e o fu battezzao segondo o rito catollico (1728). Repigiao ben fito a vitta ramenga, o s'ocupò inti succescivi quattr'anni in umili loei presso de famigge scignorî, pe da pœu razonze torna M.me de Warens, da quæ o l'aiva da vegnî amante. Inti anni trascorsci con questa inta rescidença campestre de Les Charmettes, inti presci de Chambéry, o se dedicò a vaste lettue e a un'intensa attivitæ de studdio, privilegiando in particolâ a muxica.

Doppo un urteriô periodo de viægi pe-a França e a Sviççera, o tornò ancon da-a Warens, transferiase into frattempo a Chambéry; ma a pascion ch'a l'aiva ligao i doi a l'ea zœumoæ ezaoria e o Rousseau o s'allontanò definitivamente da-a so protettôa, occupandose comme precettô a Lion (1738-40). Into 1741 o l'ea a Pariggi, donde o praticò prevalentemente l'attivitæ de copista de muxica e dovve, into 1745, o se ligò a una popolaña, Thérèse Levasseur, da-a quæ o l'ebbe varri figgi, che fun affidæ a-a caitæ pubbrica. Doppo un breve periodo a Veneççia, ond'o fu segretaio de l'alloa ambasciao de França, o tornò a Pariggi e chì o l'intrò in contatto co-i filozzofi de l'Encyclopédie, Diderot, Condillac, Fontenelle, Voltaire, F. M. Grimm.

Da Diderot o riçeve' l'invio a collaborâ a l'œuvia, a-a quæ o contribuì co-e voxe de muxica (da pœu pubbricæ a parte comme Dictionnaire de musique, 1764) e co l'articcolo Économie politique, into quæ za emerzeiva i concetti fondamentæ da so œuvia in sce-o contræto sociâ. A-o 1750 remonta o so Discours sur les sciences et les arts, composto in ócaxon de un concorso bandio da l'Accademia de Dixon in sciô tema "Se o progresso de sciençe e di arte o l'agge contribuio a amegioâ i costummi". Into so scrito, co-o quæ o guaagnò, o Rousseau rispondeiva negativamente a-o quexito de l'Accademia, mettendo praticamente in discuscion o valô che i inluministi attribuivan a-o progresso e sostegnindo pe contra l'aomento da degradaçion morâ in connescion co l'evoluçion da çivilizzaçion. Texi, questa, che o Rousseau o l'aviæ ribadio e articolao into Discours sur l'origine et les fondements de l'inégalité parmi les hommes, composto into 1754 in risposta sto chì ascì a 'n quexito de l'Accademia de Dixon. Con questo segondo scrito i rapporti co-i ençiclopedisti, za avenæ a caoza do primmo, se rompin definitivamente e o Rousseau o passò a Zeneivia, dovve o fu accugeito con grendi onoî e dove o tornò a l'originaia fe' carvinista.

Tornao into mæximo anno a Pariggi, o s'aretiò da pœu presso Montmorency, dove, ospite de M.me d'Épinay e da pœu do maresciallo de Luxembourg, o compoze e so œuvie ciu importante, Julie ou la Nouvelle Héloïse (1761), Émile ou sur l'éducation e o Contrat social (tutti doi do 1762). Constreito a abbandonâ a França quande e so œuvie (l'Émile e o Contrat in particolâ) fun giudicæ peigoze in sciô cian politico e religiozo, o trovò refuggio in Sviççea, a Môtier-Travers, presso Neuchâtel, donde o compose e Lettres écrites de la montagne e o començò a travagiâ a-e Confessions (apparse postume in 4 vol., 1781-88). Ospite de D. Hume a Wootton (1766), o rompì ben fito co-o filozofo scoçeize pe via do so carattere sempre ciu raozo e de manie de persecuçion de quæ o commençava a sofrî. Tornao in França, o se stabilì torna a Pariggi (1770); incurante do mandao de cattua inti so confronti, o visse sempre ciu in solituddine, dedicando o so tempo a-a stezua de Rêveries du promeneur solitaire e di Dialogues ossæ Rousseau juge de Jean-Jacques. Ospite do marcheize de Girardin a Ermenonville, chì o moì, inta nœutte tra o 2 e o 3 luggio do 1778.

O contræto sociâ

O pensceo filozofico-politico de Rousseau o se colloca da un lao inte 'na poxiçion eccentrica a peto de l'idea illuministega de progresso, segge in senso conoscitivo segge in senso morâ, mentre o recuppera da l'atro di temi politichi fondamentalmente inluministeghi. Scin da-o Discours sur les sciences et les arts se riscontra in Rousseau un attezamento polemmico inti confronti de quello che a-i illuministi o l'appaiva inçivilimento e raffinamento, mentre in realtæ o no l'ea atro, a-i so œuggi, che mortificaçion e anullamento da spontaneitæ caratteristega de l'ommo e di rapporti umoen no ancon contaminæ da-e convençioin da societæ civilizzâ (spontaneitæ che Rousseau into primmo discorso o vedde rappresentâ inte çittæ-stato de l'antiga Greçia). De chì a texi radicâ che "e nostre añime se son corotte inta mezua inta quæ e nostre sciençe, e nostre arte han progredio verso a perfeçion".

L'argomento fondamentâ do Rousseau, bazao in sce l'ipottexi de l'existença de una natua umaña incorotta ch'a saiæ degenerâ moralmente a caoza di rapporti instaoræse inte coscì díte societæ çivî (e l'è eviddente ch'o Rousseau o generalizzava sorvettutto i træti da societæ françeize do so tempo), o l'imponeiva un ciarimento circa e caratteristeghe de l'ommo a-o de fœua de queste societæ. A tâ ascceimento l'ea dedicao o succescivo Discours sur l'origine et les fondements de l'inégalité parmi les hommes, dovve o Rousseau o l'ipotizza, benché soltanto in sciô cian concettoâ e no in sce quello storico, un "stato de natua" da-o quæ l'ommo o se saiæ de man in man sempre ciu allontanao: l'ipottexi do stato de natua a consente a-o Rousseau de deliniâ, pe sottraçion de convençioin e di artifiçioxitæ introdute da-a societæ, quelle caratteristeghe umañe no inquinæ da-a çivilizzaçion, de quæ, sciben che no inte l'aspetto ciu primitivo, o Rousseau o vaghezza o ripristino. A differença do stato de natua hobbexian, quello do Rousseau o no l'è bazao in sce un'inmaggine aggresciva de l'ommo; ciutosto, l'è legittimo ipotizzâ una completa armonia tra ommo e natua: sodisfaxendo e so exigençe primaie e svilupando un sentimento de compascion inti confronti di proppi scimmili, l'ommo o l'è, in natua, inte 'na condiçion de izoamento che, s'a n'impedisce da un lao o sviluppo morâ e intellettoâ, a ghe precludde da l'atro l'aquixiçion de quelle caratteristeghe deleteie indute da-a çivilizzaçion (egoismo, aggrescivitæ, prevaricaçion).

Int'o stato de natua no existe propietæ ni soverciaja e i esei umoen se trœuvan praticamente inte 'na condiçion de assoluta libertæ e ingoança. Co-a nascita de primme comunitæ patriarcæ, avegnua quande i scingoli s'en avisti di vantaggi che derivan, in sce-o cian de l'aotoconservaçion, da-o fâ parte de un gruppo organizzao, commença a deliniâse e primme rudimentæ forme de societæ, o nucleo originaio de quæ o l'è rapprezentao da-a famiggia. A questi raggruppamenti, che pe o Rousseau costituiscian l'ezempio ciu feliçe d'organizzaçion sociâ, segoe tuttavia de forme sociale sempre ciu strutturæ, sorvetutto pe via de l'avvento da propietæ. Apropiandose da tæra e di so produti, inventando e dœuviando e primme tecniche de transformaçion da natua, comme a metallurgia e l'agricortua, emerze cian cian a societæ çivî, fondâ in sce-a distinçion tra "mæ" e "to" e in sce-a dexingoança che, pe garantî a propietæ, e lezze vegnan a codificâ. In tâ moddo l'umanitæ a saiæ sciortia definitivamente da-e originaie condiçioin de naturalitæ pe struttuâse inte 'n'organizzaçion coerçitiva, fondâ in sce-a distinçion tra ricchi e povei, padroin e scciavi. Tuttavia questa accuza lançâ da o Rousseau contra a societæ çivî e e so struttue a no scignificava o dexideio de riportâ inderê l'umanitæ "inte foreste co-i orsci", a l'originaia innoxença e ingoança. Se trattava invece, e questo o l'è o scopo do Contrat social, de definî i fondamenti de una nœuva societæ in grao de ristabilî "into drito l'ingoança naturâ fra i ommi"; se trattava de trovâ i fondamenti de 'na societæ giusta: in questo o Rousseau o torna a condividde e prospetive de riforma politica che inspion e polemmiche inluministe.

O problema do "contræto sociâ" o l'è quello de trovâ una forma de associaçion pe-a quæ ognidun, protetto da-a força comuña de tutti, o l'areste patron de lê e libbero. Fin do contræto ò patto sociâ o l'è dunque ançitutto de garantî a libertæ de ciaschedun, ch'a no saiâ ciu a libertæ naturâ do stato de natua, perdua con questo, ma a libertæ ch'a nasce da-o contræto, a-a formaçion do quæ concore tutti i contraenti decidendo de sottomettise a-a voentæ generâ. A-e relaçioin individuæ se sostituisce a relaçion di çittadin co-a lezze, esprescion da voentæ generâ, a-a quæ tutti se sottomettan. Clàozoa centrâ do contræto a l'è "l'alienaçion totâ de ciascun associao con tutti i so driti a-a comunitæ"; nasce coscì o corpo politico into quæ i çittadin son parte integrante do tutto e into quæ tutti e ciaschedun detegnan a sovranitæ. S'escludde inte questa prospetiva a figua de 'n çittadin ò corpo separao rivestio da sovranitæ a traverso a renonçia di scingoli a-i proppi driti: tâ renonçia a l'è imposcibbile; o corpo politico o costituisce un tutto, un "corpo morâ e coletivo" composto de tutti i membri, ch'o trà da l'atto da propria voentæ o so "mi comun". O stato o l'è quindi una "persoña morâ", un "ente collettivo" ch'o no s'identifica ni co-ina persoña, ni co-a somma aritmetica da voentæ de tutti, ma co-a "voentæ generâ" che comme tâ a l'è de longo retta e a l'ha pe so fin l'utilitæ pubbrica. E lezze son esprescion da voentæ generâ, pe-a quæ tutti s'impegnan a-e mæxime condiçioin e godan di mæximi diritti.

Coscì a voentæ generâ "a restabilisce into diritto l'inguança naturâ tra i ommi" e a garantisce a libertæ de ciaschedun, libertæ ligâ a-a raxon e a-e lezze. Rispetto a-a libertæ naturâ, proppia di primmi ommi "stuppidi e limitæ", s'instaora una libertæ proppia de esei dotæ de raxon, capaxi de moralitæ. Se tratta da "libertæ çivî", limitâ solo da-a voentæ generâ inta quæ ciaschedun s'identiffica. Da-a conceçion do stato comme "ente collettivo", "mi comun", ch'o s'esprimme inta voentæ generâ e ch'o no l'ammette defeçioin ò negaçioin (onde libertæ coincidde con obediença) l'è derivao de interpretaçioin assolutisteghe de Rousseau, mentre da l'avento posto in sciô carattere inalienabile da sovranitæ eserçitâ da-o poppolo intrego s'inandia e interpretaçioin democrattiche.

L' Emile

A riforma de l'ommo inta vitta sociâ, proposta da-o Contrat, a se poñe comme problema educativo individoâ inte l'Émile, quæ formaçion de l'ommo nœuvo. Percose a natua a l'è boña, a preoccupaçion do Rousseau a saiâ de no turbâ l'armonia e o sviluppo da natua into figgiœu; l'educaçion do Millio a doviâ êse quindi esençialmente negativa, a no doviâ mai intervegnî into processo de natuâ maturaçion de facortæ do figgiœu, no pretende de "vedde into figgiœu l'ommo". Emilio o l'ha da atrovâ da lê i primmi rudimenti de sciençe, into travaggio manoâ, into contatto co-a natua no mediao da-i libbri, e manco suggestionao da-a societæ da-a quæ o doviâ arestâ lontan scin a quande o no l'aviâ conquistao, co-a raxon, a piña libertæ. De fæto, curmine de l'educaçion a l'è a conquista da raxon, da piña capaçitæ de giudiççio, l'affermâse da conscença morâ: chì s'inserisce ascì a scoverta de Dê fœua da-e raprezentaçioin antropomorfiche.

S'alœuga a questo punto inte lʼÉmile a Profession de foi du vicaire savoyard, ch'a comporta o riconoscimento de Dê creatô e providente a traverso l'orde do Creao; riconoscimento ch'o l'è fruto ançitutto de 'n sentimento, no da raxon discorsciva. Con Dê, a religion do Rousseau a comporta o riconoscimento de l'immortalitæ de l'añima a-a quæ l'è connesso no solo a moralitæ, ma a necessaia prospetiva otratereña de premmi e castighi quæ ristabilimento de 'n orde perdúo into mondo di ommi. Questi i perni da religion de l'ommo che o Rousseau o vedde coincidde co-a "pua e sencia religion do Vangelo". Da questa se distingue a religion do çittadin ligâ a colti e dogmi, despægia da paise a paise. Despægia ancon a l'è a fe' puramente çivî, saiv'a dî propria da societæ çivî: se o stato o no pœu intervegnî inti opignioin privæ di individdoi, tuttavia questo o deve stabilî i dogmi da religion çivî: existença de Dê possente e providente, inmortalitæ de l'annima, vitta futua con premmi e castighi, santitæ do contræto sociâ e de lezze: sença questa fe' no l'è poscibile pe Rousseau êse di boin çitten; chi refiese quelli dogmi, o doviâ êse cacciao da-o còrpo sociâ comme un ommo "incapaxe de amâ e lezze, a giustiççia, de sacrificâ, s'ocore, a proppia vitta a-o dovei"; chi da pœu tradisse a fe' çivî, o doviâ êse condannao a-a morte. Posta a-o centro questa fe' çivî, o Rousseau o difende ascì a tollerança religioza contra l'intollerança çivî e teologica, ch'a provvoca de contestaçioin e de guære dannoze a-a sovranitæ do stato.

O Rousseau o fu ascì curtô de muxica, manifestando di attituddine segge comme teorico (comme risurta da-a Dissertation sur la musique moderne, 1742, so primma œuvia stampâ, e da-e voxe ch'o scrisse pe l' Encyclopédie) segge comme compoxitô; in quest'urtima veste o fu aotô, tra i atre, de lʼopéra-ballet Les muses galantes (1745) e de l'œuvia buffa Le devin du village (1752), rappresentâ con grande successo a-o tiatro de corte de Fontainebleau. Aotô tiatrâ ascì, o scrisse e comeddie Les Festes de Ramire (1745) e Narcisse (1752), çimentandose ôtr'a ço inta trageddia.

Atri progetti

Altri progetti

• Wikimedia Commons
• Wikispecies

• Wikimedia Commons a contêgne di files in sce Jean-Jacques Rousseau
• Wikispecies a contêgne informaçioìn in sce Jean-Jacques Rousseau