Verveur

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Verveur of transport is 't verplaatse van luuj of geujer (juridisch "zake"). Dit kan mit beveurbeildj de wage, fietsj, trein, vleger en zo wiejer.

Bie verveur kan 't gaon euver tasbaar zake van dinger (wie geujerverveur), vleujstoffe (wie aoljetransport), gase (wie aerdgaas), bieëster (wie vieëtransport) of luuj (persoeaneverveur), mer ouch euver neet drek tasbaar zake wie enerzjie (wie lektriciteitstransport of wurmdjetransport) of infermaasje (wie datatransport).

Veur 't verveur wuuertj gebroek gemaak van verveursmiddele. Eder saort aan verveur kèntj hieveur zien eige specifieke verveurmiddele. 't Percès van verplaatsinge wuuertj verkieër geneump. Bie dees vörm van verveur verangertj 't verveursmiddel van plaats en daomit de zake. Mer ouch besteitj verveur middels verveursmiddele die op häör plaats blieve, wie piepleijinge, kabelen en dergelike.

't Waord "transport" is samegestèldj oet 't Letiense trans det "euver" mèntj, en portare, det "drage" mèntj. Ouch kan waere gewezen op 't verbandj tösse "trans" (doorhaer) en "porta" (paort), wodoor 't begrip zieëhave ("seaport") 'n dudelike meining krieg es "zieëpaort". Transport kan dus aevezieër waere begrepen inne zin det geujer, luuj en data mit behölp van dragers en door interfaces (knouppuntje, paorte) häör oetènjelike bestumming bereike.